The Witches of Traquair and Other Tales from Scottish Highlands. James Hogg
the Andersons came frae a place they ca' Rannoch, some gate i' the north; and your ain family came first to this country then frae some bit lairdship near Glasgow. There were a set o' MacGregors and MacDougals, said to have been great thieves, came into Yarrow then, and changed their names to Scotts; but they didna thrive; for they warna likit, and the hinderend o' them were in the Catslackburn. They ca'd them aye the Pinolys, frae the place they came frae; but I dinna ken where it was. The Ballantynes came frae Galloway; and for as flourishing folks as they are now, the first o' them came out at the Birkhill-path, riding on a haltered pony, wi' a goat-skin aneath him for a saddle. The Cunninghams, likewise, began to spread their wings at the same time; they came a' frae a little fat curate that came out o' Glencairn to Ettrick. But that's nae disparagement to ony o' thae families; for an there be merit at a' inherent in man as to warldly things, it is certainly in raising himsell frae naething to respect. There is nae very ancient name amang a' our farmers now, but the Tweedies and the Murrays; I mean of them that anciently belanged to this district. The Tweedies are very auld, and took the name frae the water. They were lairds o' Drummelzier hunders o' years afore the Hays got it, and hae some o' the best blood o' the land in their veins; and sae also have the Murrays; but the maist part o' the rest are upstarts and come-o'-wills. Now ye see, for as far out-bye as I live, I can tell ye some things that ye dinna hear amang your drinking cronies."
"It is when you begin to these old traditions that I like to listen to you, Andrew. Can you tell me what was the cause of such a complete overthrow of the farmers of that age?"
"Oh, I canna tell, sir—I canna tell; some overturn o' affairs, like the present, I fancy. The farmers had outher lost a' their sheep, or a' their siller, as they are like to do now; but I canna tell how it was; for the general change had ta'en place, for the maist part, afore the Revolution. My ain grandfather, who was the son of a great farmer, hired himsell for a shepherd at that time to young Tam Linton; and mony ane was wae for the downcome. But, speaking o' that, of a' the downcomes that ever a country kenn'd in a farming name, there has never been ought like that o' the Lintons. When my grandfather was a young man, and ane o' their herds, they had a' the principal store-farms o' Ettrick Forest, and a part in this shire. They had, when the great Mr Boston came to Ettrick, the farms o' Blackhouse, Dryhope, Henderland, Chapelhope, Scabcleuch, Shorthope, Midgehope, Meggatknowes, Buecleuch, and Gilmanscleuch, that I ken of, and likely as mony mae; and now there's no a man o' the name in a' the bounds aboon the rank of a cow-herd. Thomas Linton rode to kirk and market, wi' a liveryman at his back; but where is a' that pride now?—a' buried in the mools wi' the bearers o't! and the last representative o' that great overgrown family, that laid house to house, and field to field, is now sair gane on a wee, wee farm o' the Duke o' Buecleuch's. The ancient curse had lighted on these men, if ever it lighted on men in this world. And yet they were reckoned good men, and kind men, in their day; for the good Mr Boston wrote an epitaph on Thomas, in metre, when he died; and though I have read it a hunder times in St Mary's kirk-yard, where it is to be seen to this day, I canna say it ower. But it says that he was eyes to the blind, and feet to the lame, and that the Lord would requite him in a day to come, or something to that purpose. Now that said a great deal for him, master, although Providence has seen meet to strip his race of a' their worldly possessions. But take an auld fool's advice, and never lay farm to farm, even though a fair opportunity should offer; for, as sure as He lives who pronounced that curse, it will take effect. I'm an auld man, and I hae seen mony a dash made that way; but I never saw ane o' them come to good! There was first Murray of Glenrath; why, it was untelling what land that man possessed. Now his family has not a furr in the twa counties. Then there was his neighbour Simpson of Posso: I hae seen the day that Simpson had two-and-twenty farms, the best o' the twa counties, and a' stockit wi' good sheep. Now there's no a drap o' his blood has a furr in the twa counties. Then there was Grieve of Willenslee; ane wad hae thought that body was gaun to take the haill kingdom. He was said to have had ten thousand sheep, a' on good farms, at ae time. Where are they a' now? Neither him nor his hae a furr in the twa counties. Let me tell ye, master—for ye're but a young man, and I wad aye fain have ye to see things in a right light—that ye may blame the wars; ye may blame the Government; and ye may blame the Parliamenters: but there's a hand that rules higher than a' these; and gin ye dinna look to that, ye'll never look to the right source either o' your prosperity or adversity. And I sairly doubt that the pride o' the farmers has been raised to ower great a pitch, that Providence has been brewing a day of humiliation for them, and that there will be a change o' hands aince mair, as there was about this time hunder and forty years."
"Then I suppose you shepherds expect to have century about with us, or so? Well, I don't see any thing very unfair in it."
"Ay, but I fear we will be as far aneath the right medium for a while, as ye are startit aboon it. We'll make a fine hand doing the honours o' the grand mansion-houses that ye hae biggit for us; the cavalry exercises; the guns and the pointers; the wine and the punch drinking; and the singing o' the deboshed sangs! But we'll just come to the right set again in a generation or twa; and then, as soon as we get ower hee, we'll get a downcome in our turn.—But, master, I say, how will you grand gentlemen tak wi' a shepherd's life? How will ye like to be turned into reeky holes like this, where ye can hardly see your fingers afore ye, and be reduced to the parritch and the horn spoon?"
"I cannot tell, Andrew. I suppose it will have some advantages—It will teach us to say long prayers to put off the time; and if we should have the misfortune afterwards to pass into the bad place that you shepherds are all so terrified about, why, we will scarcely know any difference. I account that a great advantage in dwelling in such a place as this. We'll scarcely know the one place from the other."
"Ay, but oh what a surprise ye will get when ye step out o' ane o' your grand palaces into hell! And gin ye dinna repent in time, ye'll maybe get a little experiment o' that sort. Ye think ye hae said a very witty thing there: but a' profane wit is sinfu'; and whatever is sinfu' is shamefu'; and therefore it never suits to be said either afore God or man. Ye are just a good standing sample o' the young tenantry o' Scotland at this time. Ye're ower genteel to be devout, and ye look ower high, and depend ower muckle on the arm o' flesh, to regard the rod and Him that hath appointed it. But it will fa' wi' the mair weight for that! A blow that is seen coming may be wardit off; but if ane's sae proud as no to regard it, it's the less scaith that he suffer."
"I see not how any man can ward off this blow, Andrew. It has gathered its overwhelming force in springs over which we have no control, and is of that nature that no industry of man can avail against it—exertion is no more than a drop in the bucket: and I greatly fear that this grievous storm is come to lay the axe to the root of the tree."
"I'm glad to hear, however, that ye hae some Scripture phrases at your tongue-roots. I never heard you use ane in a serious mode before; and I hope there will be a reformation yet. If adversity hae that effect, I shall willingly submit to my share o' the loss if the storm should lie still for a while, and cut off a wheen o' the creatures, that ye aince made eedals o', and now dow hardly bide to see. But that's the gate wi' a things that ane sets up for warldly worship in place o' the true object; they turn a' out curses and causes o' shame and disgrace. As for warding off the blow, master, I see no resource but throwing up the farms ilk ane, and trying to save a remnant out o' the fire. The lairds want naething better than for ye to rin in arrears; then they will get a' your stocks for neist to naething, and have the land stockit themsells as they had lang-syne; and you will be their keepers, or vassals, the same as we are to you at present. As to hinging on at the present rents, it is madness—the very extremity of madness. I hae been a herd here for fifty years, and I ken as weel what the ground will pay at every price of sheep as you do, and I daresay a great deal better. When I came here first, your father paid less than the third of the rent that you are bound to pay; sheep of every description were dearer, lambs, ewes, and wedders; and I ken weel he was making no money of it, honest man, but merely working his way, with some years a little over, and some naething. And how is it possible that you can pay three times the rent at lower prices of sheep? I say the very presumption of the thing is sheer madness. And it is not only this farm, but you may take it as an average of all the farms in the country, that before the French war began, the sheep were dearer than they are now—the farms were not above one-third of the rents at an average, and the farmers were not making any money. They have lost their summer day during the French war, which will never return