Мин көтөр кынаттааҕым буоллар. Иван Арбита

      Дьулуо маҕан халлааммыт

      Дьурааланар кустуга

      Чараҥ тыаҕа хайҕаммыт

      Чаллах мастыын куустуһар.

      Халлаан эҥил баһыгар

      Хара былыт кэтириир,

      Ыраах этиҥ тыаһыгар

      Чуумпу салгын титириир.

      Талах тыллаах чыычааҕа

      Табыталын хомунар,

      Хойуу будьур лабааҕа

      Саһар сааскы Күөх Унаар.

      Ойуу-дьарҕаа кустугум

      Оргууй аҕай умуллан,

      Дьураа солко куоссунун

      Туран эрэн хомунар.

      Чуумпу ууну долгуппат

      Сөрүүн салгын сабардыыр,

      Эмиэ начаас чуумпурда

      Халлаан Сири саанардыы.

      Онтон курбуу чаҕылҕан

      Кустук охтуу дуксуйда,

      Саһан сыппыт айылҕам

      Өндөс гынна – соһуйда.

      Уордаах этиҥ эмискэ

      Хабырыттан тыаһаата,

      Хампарыта тэбистэ

      Халлаан кэтит таһаатын.

      Этиҥ тыаһын кытары

      Түргэн тыаллар түстүлэр –

      Хойуу самыыр кутарын

      Дьоннор көрөн үөрдүлэр.

      Иллээх-эйэлээх,

      Эдэр бэйэлээх

      Үлэһит ыччата

      Үөрүүбүт үксээтэ.

      Эргэни эһэргэ

      Эстибэт тиһилгэ,

      Эдэр ыччат,

      Эрэйи кыччат.

      Күүстээх үлэнэн

      Күүрэн, тиҥийэн,

      Дойдугун-сиргин

      Толору киэргэт.

      Дьоҥҥун-норуоккун

      Өйдөт, үөрэт,

      Кытарар уоккун

      Өрүтэ күөрэт!

      1931

      Унаар-тунаар оһуорбут,

      Оонньуур-күлэр ойуурбут

      Тыыннаах дьикти күөҕүнэн

      Тырым-тырым күөгэйэн!..

      Кыыдаан кыһын эстиитэ,

      Кэрэ сааспыт көстүүтэ

      «Эбэм» күлэр күөҕүнэн,

      Көрбүт ахан көрүөҕүнэн.

      Эмдэй-сэмдэй иирэтин

      Истээниктиир өттүттэн,

      Оһуор-ойуу хонуутун

      Орой төбө үрдүттэн

      Күөрэгэйим күүгүнээн,

      Көтөн-дайан көрүлээн

      Ити-ити тураахтыыр,

      Ииригирэ туойаахтыыр.

      Сырдык күҥҥэ наскыйбыт

      Сыттаах оттоох хонуулаах,

      Көҕөрөөхтүү дьалкыйбыт

      Күндү сырдык уулаах

      Табаҕалыыр алааһым,

      Холкуостарыҥ хойуннун!

      Таптыыр эдэр атаһым

      Күлбүтүнэн тоһуйдун!

      1931

      1

      Күлүмнүү күлэн мичиҥнии көрбүт

      Күндээрэ дьэргэйэн күн да күн!

      Ойуу-дьарҕаа чэлгийэ күөгэйбит

      Оһуор симэх от үүн да үүн!

      Сыргыйар сыралҕан, сандал куйаас

      Күөх дойдуну ыарыытын эмтээбит,

      Сибэкки симэҕинэн күлбүт алаас

      Айылгы быйаҥа сүрдүк элбээбит.

      Килбэйэр килиэ таас түннүккэ

      Күн уота тыган чаҕыллар,

      Куула диэки сөрүүн күлүккэ

      Хоһуулка анныттан хадьымал арыллар.

      Ол артыаллар оттоон