A «San Francisco» : Un atto. Di Giacomo Salvatore

      Quanto… tutte nzieme… mme pare comme si fosse c' 'o peretto d' 'o vino se fosse rutto…

      Scasuarmente?

      Accussì mme pare… (cerca di ricordarsi)… Già… scasuarmente… Basta, nun è stato peretto rutto c'aggio visto scorrere 'o vino ncopp' 'a tavula comme si se fosse scatasciata na votta. Io dicevo: Ma ched'è, chesto scorre sempe? E tutto stu vino 'a do' esce?.. E chello scurreva, scorreva e ghingheva tutt' 'a cantina… e se faceva cchiù notte, e se stutaveno 'e lume a uno a uno… 'E cumpagne mieie… nun 'e bedevo cchiù… mme sentevo nfonnere 'e piede… 'e gamme… tutt' 'o cuorpo… e 'o vino… scurreva, scurreva sempe… e mm' arrivava m' pietto… (agitato, quasi tremante) Io… vulevo chiammà int' 'o scuro e… nun putevo chiammà… 'a voce mme veneva meno… mme mancava 'o sciato… e… chellu vino saglieva, saglieva… m' arrivava 'nganna, me sentevo affucà… (si leva, emozionato, con le mani alla gola, gli occhi stralunati. Totonno s'accosta e interroga con gli occhi don Gennaro. Luigiello, a bocca aperta, impiedi, ascolta anch'egli con molta attenzione).

      Chiano chiano… Accarmateve…

      Tuccateme nu poco sta mano… (gli stende la destra, tremante).

      Avite raggione. Ve site fatto friddo… (a Totonno, voltandosi) Tutt'affetto 'e neveratura… (Pausa. Peppe si passa la mano sulla fronte). Venimmo a nuie… Assettateve… (Peppe siede). Sti cumpagne vuoste ca steveno cu buie int' 'a cantina…