Цудоўныя прыгоды ліцвінскай прынцэсы ў Дацкім Каралеўстве. Наталія Бадзілоўская
героя ёсць свая краіна і ў кожнай краіны ёсць свой герой. У любой краіны мноства герояў. Але не ў кожнага героя (гераіні) ёсць некалькі краін.
У кожным дарослым жыве дзіцёнак, і з кожнага дзіцяці вырастае дарослы. Наталія ў дарослым жыцці – адказная асоба. Стваральніца тэкстаў і генератарка ідэяў… Дзіцячая літаратура патрабуе асаблівай адказнасці, і таму маюць права пісаць чароўныя казкі толькі шляхетныя асобы.
У дарослым і рэальным жыцці аўтар даследуе архітэктуру, Данію яна ўспрымае як цацачную краіну, у вандроўцы становіцца Прынцэсай. Па жанры аповяд можна вызначыць як дзіцячую казку для дарослых і дарослы аповяд для дзяцей. Гэта і дапаможнік для турыстаў, і рэальна-фантастычная гісторыя для вандроўнікаў, і Нанават параграф у падручніку, напісаны паэтычнай мовай.
Кніга змяшчае ў сабе як па-мастацку аформленыя статыстычныя дадзеныя пра краіну, так і бытаповяд. Перад тым, як ехаць у пэўную краіну, варта запытвацца ў тых, хто ўжо быў у тых мясцінах. Неабходна даведацца пра звычаі і традыцыі, што трэба браць з сабой і чым можна ўзбагаціцца там, як у матэрыяльным сэнсе, так і духоўным.
Такім чынам, У Даніі з’яўляецца, прытуляецца ліцвінская (беларуская) Прынцэса, дзе сустракае Прынца.
Што атрымалася далей? У рэцэнзіях ці рэфлексіях да прыгодніцкіх твораў не прынята раскрываць, чым скончваецца сустрэча Прынцэсы з Прынцам. Хіба што… адрозніваецца ад звычайнага (прынамсі, так мне падалося), і пра гэта можна будзе напісаць (прагаварыць) у прадмове да наступнай кнігі.
Яе абавязкова трэба прачытаць, асаблiва тым, хто збіраецца ў Данію, тым хто там знаходзіцца, і тым хто вярнуўся, каб супаставіць свае назіранні. Тым, хто прачытае кніжку, нельга пасля не трапіць у Данію, якая пачынае прыцягваць як нейкім чароўным магнітам, як цацка дзіцяці, як неба для летуценніка.
Бывае, кнігі робяцца жывымі істотамі, героямі. Кніжка можа таксама стаць шляхетнай асобай, яна трапляе ў асяроддзе такіх жа высакародных асоб на кніжнай паліцы, спіс адпаведнага шляхетнага выдавецтва, рэйтынгі рэкамендаванай для чытання літаратуры.
Напярэдадні казкі
Цуды адбываюцца штодня. Толькі мы, занятыя сваімі справамі, праблемамі, іх не заўважаем. І гэтая новая казка, якую прыдумала і напісала Наталія Бадзілоўская, сведчыць: незвычайнае побач з намі! Проста трэба прыгледзецца крыху ўважлівей да ўсяго, што адбываецца навокал… І звычайнае – стане незвычайным і вельмі прыгожым!..
Тады вы, дарагія сябры, убачыце, які разнастайны, цікавы і цудоўны свет вакол нас. Вы ўбачыце, што ён працяты любоўю, яркім святлом радасці, дружбы, натхнення, творчасці… Вы зразумееце, што святло заўсёды перамагае цемру, а добрае – заўсёды перамагае благое. Вы пераканаецеся ў тым, як важна, каб побач з намі заўсёды былі сяброўства, вернасць, надзейнасць, спагадлівасць, разуменне.
Увага і пяшчота, клопат, павага і любоў вяртаюцца да таго, ад каго паходзяць. Сардэчнасць і шчырасць нараджаюць дабрыню, светлыя пачуцці спараджаюць у адказ светлыя пачуцці, мары здзяйсняюцца! Казка раптам робіцца рэальнасцю!..
Гэта і ёсць той самы цуд, які мы часцяком не заўважаем!
Гэтая казка апавядае пра цудоўныя прыгоды казачнай прынцэсы ў казачнай краіне. Героі яе рэальныя і выдуманыя. Яны вельмі падобныя да тых, каго мы сустракаем штодня. Яны вельмі прывабныя, мілыя і цудоўныя.
І гэтая казка незвычайная якраз тым, што выдуманае ў ёй дзіўна спалучаецца з рэальным, і нараджаецца нешта зусім новае і незвычайнае…
Маленькая краіна, дзе заўсёды вясна
Ёсць на паўночным захадзе Еўропы невялікая краіна – Каралеўства Данія.
Гэтая дзяржава – краіна казачнікаў і казак.
Разам з тым, гэта адна з краін Скандынавіі. Яна займае тэрыторыю 43 098 квадратных кіламетраў, дзе жыве крыху болей за 5,5 млн чалавек. Часам Данію называюць паўночнай Італіяй. І небеспадстаўна. Як і Італія, яна з трох бакоў атачоная марской вадой і далёка заходзіць у мора. І на мапе Еўропы Каралеўства знаходзіцца амаль паралельна Італіі – толькі Італія на поўдні – а Данія на поўначы.
Данія займае паўвостраў Ютландыю, а таксама два вялікія астравы і яшчэ больш за 400 драбнейшых, сярод якіх найбольш вядомыя Зеландыя, Фюн, Лоланд, Фальстэр і Борнхальм. Абмываюцца яны двума морамі з усходу Балтыйскім, а на захадзе Паўночным.
На поўначы праліў Скагерак адмяжоўвае Данію ад Нарвегіі, пралівы Катэгат і Эрэсун ад Швецыі, а на поўдні краіна па сушы мяжуе з Германіяй.
Данія лічыцца невялікай краінай. Але насамрэч яна найбуйнейшая еўрапейская дзяржава. Справа у тым, што Данія валодае найвялікшым у свеце востравам Грэнландыяй, які знаходзіцца ў Атлантычным акіяне, і Фарэрскімі астравамі ў Нарвежскім моры. Грэнландыя па плошчы больш як у 50 разоў перавышае Данію, а яе насельніцтва (каля 58 тыс. чал.) складаецца, галоўным чынам, з эскімосаў, грэнландцаў і датчанаў.
Больш за тысячу гадоў Даніяй кіруюць каралі і каралевы. Гэтая краіна, між іншым, самае старое Каралеўства свету! У ім захаваліся маёнткі, якія будаваліся