Великий князь Ярослав Всеволодович Переяславский. Александр Андреев
(1194). Быша постриги у благоверного князя Всеволода сына Юрьева сыну его Ярославу, месяца априля в 27 день, на память святого Симеона при блаженном епископе Иоанне и бы радость велика в граде Володимири.
В лето 6703 (1195). Великий князь Всеволод заложи град Переяславль.
В лето 6708 (1200). Иде Святослав сын Всеволож, внук Юрьев, княжить Новугороду месяца декабря в 14 день на память старца великомученника Спиридона, брата же проводиша и с честью Констянтин, Юрий, Ярослав, Володимир и бы радость велика в граде Володимире.
В лето 6709 (1201). Посла Всеволод сына своего Ярослава в Переяславль-Русский на стол прадеда своего и деда, августа 3, тогда бяше князь великий в Переяславле Залесском с детми своими в полюдьи.
В лето 6712 (1204). Ходиша Рустии князи на половцы Рюрик Киевский, Ярослав Переяславский, великого князя Всеволода сын, Роман Галицкий и Мстислав и инии князи, бысть же тогда зима люта, и половцам бысть тегота велика, и взяша Рустии князи вежи их и полон много, и стада их забраша и возвратишася во своя си с полоном многим.
В лето 6713 (1205). На зиму великий князь Всеволод ожени сына своего Ярослава и приведоша за ны Юрьевну Кончаковича.
В лето 6715 (1207). Прииде Ярослав из Русского Переяславля с женою своею в Володимер Суждальский к отцу своему, великому князю Всеволоду, княжи в Руси лет 7.
В лето 6717 (1209). Посла Всеволод сына своего Ярослава на стол в Резань. Того же лета седящу Ярослав Всеволодович в Рязани, и бысть ему весть, яко хотят и няти резанцы. Слышав же се Ярослав и посла к великому князю Всеволоду, к отцу своему в Владимир, поведа беду свою. Слышав же се, великий князь Всеволод поиде вскоре к Резаню с дружиною своею, а полком по себе повелел поити, и тако пришед пожже Резань всю, и иных городов много пожгоша, и села все повоеваша, и, сотворив землю их пусту, поимав люди вси, и иде к Володимирю и разосла их по своим городом.
В лето 6751 (1213). Преставися благоверный и христолюбивый великий князь Всеволод сын Гюргев, внук Владимира Мономаха, месяца априля в 16 день. Тогда же в животе своем розда волости детем своим большему Констянтину Ростов, а потом Гюргю Владимир, Ярославу – Переяславль, Володимеру – Гюргев.
Гюрги же, веда непокорство брата своего Констянтина и другого Владимира, призвав к собе Ярослава и рече ему: «Брате Ярослав, аще поидет на мя Констянтин или Володимир, буди ты с мною в помощь мне. Пакы ли на тя поидет, то аз по тебе в помощь буду». Ярослав рече тогда: «Вельми, брате, тако буди». И тогда Ярослав целовав крест с братом Гюргем, и еха в Переяславль, месяца априля в 18 день, и созвав вси переяславци к святому Спасу, и рече им: «Братия переяславцы, се отец мои иде к богови, а вас удал мне, а меня вдал вам на руце. Да рците ми братия, аще хощете мя имети собе, яко же вместо отца моего, и головы своя за мя сложити?» Они же вси тогда рекоша: «Велми, господине, тако буди. Ты наш господин, ты Всеволод». И целоваша к нему вси крест. И тако седе Ярослав в Переяславли на столе, идеже родися.
В лето 6722 (1214) Ведена бысть Ростислава из Новгорода, дщи Мстиславля Мстиславича, за Ярослава, сына великого князя Всеволода, в Переяславль Суждальский.
В