By fonteine langs. Nina Smit
het sy by sy voete gekniel en vir Hom gesê: “Here, as U hier was, sou my broer nie gesterwe het nie” – Joh 11:32
Maria kon nie verstaan dat Jesus nie gereageer het toe haar broer so siek geword en gesterf het nie. Sy wou weet waar Jesus was … Maar Jesus gebruik die ramp van sy vriend se dood om sy almag te illustreer – Hy wek Lasarus uit die dood op.
Mense wat die tsoenami-ramp van 27 Desember 2004 beleef het, het almal dieselfde vraag gevra: Waar was God toe hierdie verskriklike ramp gebeur het?
God is steeds goed vir sy kinders ten spyte van rampe en ellende wat oor ons pad kom. Hy gebruik hierdie dinge om ons weer ’n slag oor Hom te laat besin. Die tsoenami van 27 Desember het baie mense tot inkeer gebring, en ’n dieper, inniger verhouding met God vir ander moontlik gemaak. Hierdie verskriklike ramp het mense soveel meer rede gegee om te glo dat, ten spyte van onverhelpbare en onvoorspelbare kwaad in die wêreld, God steeds hoop, troos en nuwe moontlikhede bring.
Ons wonder ook soms waar God is wanneer dit werklik baie sleg met ons gaan. Hy is steeds by jou, ten spyte van jou omstandighede. Jy kan selfs jou negatiewe omstandighede as aansporing gebruik om jou verhouding met God te vernuwe en sy troos en hoop op ’n nuwe manier te ervaar.
Hemelse Vader, hoe groot is U dat U rampe en ellende kan gebruik om nietige mensekinders van u hoop en troos te leer en vir hulle nuwe moontlikhede oop te sluit!
Amen
8 Maart
Tel op jou kruis!
Lees Markus 8:34-37
Jesus het toe die menigte mense saam met sy dissipels nader geroep en vir hulle gesê: “As iemand agter My aan wil kom, moet hy homself verloën, sy kruis opneem en My volg, want wie sy lewe vir homself wil behou, sal dit verloor; maar wie sy lewe vir My en die evangelie verloor, sal dit behou” – Mark 8:34-35
Daar is niemand wat die kruis van swaarkry in hierdie wêreld kan vryspring nie. Een of ander tyd kom daar so ’n kruis oor elkeen van ons se lewenspad. En, so sê Jesus, indien ons Hom wil volg, sal ons maar mooitjies hierdie kruis moet optel en aanhou om Hom te volg. Hierdie teks beteken nie dat ons fisiek sal sterf wanneer ons Jesus volg nie, maar wel dat ons gewillig sal wees om aan ons sélf, aan ons sondige natuur, te sterf en gewillig sal wees om alle ander dinge prys te gee sodat ons Jesus voluit kan gehoorsaam.
Swaarkry hou byna altyd die voordeel van geestelike verryking in. In die Kerkbode van 25 Februarie 2005 skryf ’n berader onder die tsoenami-slagoffers: “Te midde van al die gebeure op die eiland, leer ek dat ek eers in die krisisse van die lewe werklik vir God van naderby leer ken. Nou word sulke tye vir my die geleentheid om die Here op sy woord te neem, om te waag in die geloof.”
Wanneer jy van aangesig tot aangesig met jóú persoonlike kruis kom, vra dat die Here jou die sin en betekenis daarvan in jou eie lewe sal wys en volg Hom!
Here Jesus, ek wil my kruis optel en U volg vir die res van my lewe. Leer my asseblief die sin en betekenis van my eie stuk swaarkry.
Amen
9 Maart
God is aan jou kant!
Lees Romeine 8:31-33
Wat is nou ons gevolgtrekking oor al hierdie dinge? Dít: God is vir ons, wie kan dan teen ons wees? Hy het sy eie Seun nie gespaar nie, maar Hom oorgelewer om ons almal te red. Sal Hy ons dan nie al die ander dinge saam met Hom uit genade skenk nie? – Rom 8:31-32.
Wanneer alles teen jou is, jou omstandighede, jou fisieke toestand, ander mense … staan één ding vir die Christen steeds soos ’n paal bo water: Jy het vir God aan jou kant. En as Hy, die almagtige Skeppergod, aan jou kant is, kan niks regtig teen jou wees nie. Die feit dat God vír jou is, maak van jou méér as ’n oorwinnaar, skryf Paulus in Romeine 8:37.
God stuur sy Seun om die gebroke wêreld waarin ons lewe te kom herstel. Jesus se bloed aan die kruis wis ons sondeskuld eens en vir altyd uit. As God dit so goed met jou bedoel dat Hy nie skroom om sy eie Seun prys te gee om jou te red nie, sal Hy ook vir jou alle ander dinge gee wat jy nodig het. God is nie passief en onbetrokke by jou lewe nie. Hy het jou lief en beloof om vir jou te sorg, om jou te help, om vir jou wysheid en leiding te gee wanneer jy dit nodig het. Neem Hom gerus op sy woord. Ook in die ergste situasies wat jou kan tref, kan jy op Hom vertrou om jou te onderneem.
Oordink weer hierdie dinge, en kom dan tot dieselfde gevolgtrekking as Paulus, dat God vir jou die onvervreembare en positiewe vertrekpunt van jou ganse lewe is (vgl Die Bybellennium, p 1475).
Hemelse Vader, dit slaan my asem weg dat U vír my is! Ek weet dat hierdie belofte beteken dat U alles vir my ten goede sal laat meewerk.
Amen
10 Maart
Jesus pleit vir jou
Lees Romeine 8:31-34
Wie kan die uitverkorenes van God aankla? God self spreek hulle vry. Wie kan ons veroordeel? Christus Jesus het gesterf, maar meer as dit: Hy is uit die dood opgewek, Hy sit aan die regterhand van God, Hy pleit vir ons – Rom 8:33-34
Die Heilige Gees bid vír jou volgens die wil van God en neem jou gebede regstreeks na God se genadetroon. Maar langs God se genadetroon is daar nóg Iemand wat vir jou pleit: Jesus! Omdat Hy self ’n mens soos jy was, weet Hy presies wat jy elke dag deurmaak, hoe moeilik dinge hier op aarde vir God se kinders kan wees. Hy het medelye met jou probleme omdat Hy self daardie probleme ondervind het toe Hy op aarde was. Soos die hoëpriester dit vir die volk in die Ou-Testamentiese bedeling gedoen het, bewerk Jesus vir jou versoening vir jou sonde, pleit Hy dat God jou sonde sal vergewe.
“Die Hoëpriester wat ons het, is nie Een wat geen medelye met ons swakhede kan hê nie; Hy was immers in elke opsig net soos ons aan versoeking onderwerp, maar Hy het nie gesondig nie. Kom ons gaan dan met vrymoedigheid na die genadetroon sodat ons barmhartigheid en genade ontvang en so op die regte tyd gered kan word,” sê die Hebreërskrywer (Heb 4:15-16).
Jesus, jou Middelaar, pleit nie net vir jou sonde nie, maar maak dit vir jou moontlik om reguit na God se genadetroon te gaan. Hy het daardie voorreg vir jou reeds aan die kruis verdien. Moenie langer wag om van sy uitnodiging gebruik te maak nie!
Here Jesus, dankie dat U nie net vir my by God intree nie, maar dat U dit ook vir my moontlik maak om regstreeks, sonder enige tussenganger, met God te praat.
Amen
11 Maart
Méér as oorwinnaars!
Lees Romeine 8:35-39
Maar in al hierdie dinge is ons meer as oorwinnaars deur Hom wat vir ons liefhet. Hiervan is ek oortuig: geen dood of lewe of engele of magte of teenswoordige of toekomstige dinge of kragte of hoogte of diepte of enigiets anders in die skepping kan ons van die liefde van God skei nie, die liefde wat daar is in Christus Jesus ons Here – Rom 8:37-39
Alhoewel God belowe om jou in krisissituasies te help, sal jou moeilikhede nie eensklaps soos mis voor die son verdwyn nie – dit is nóg nie hemel op aarde nie! Jesus het self gesê: “In die wêreld sal julle dit moeilik hê.” Ons kan dus swaarkry te wagte wees. Gelukkig voeg Jesus ’n belofte by sy swaarkry uitspraak: “Maar hou moed: Ek het die wêreld klaar oorwin” (Joh 16:33).
Jesus het die sonde oorwin, jy kan ook. Tydens al jou probleme en krisisse, meer nog, te midde