By fonteine langs. Nina Smit
vir jou huwelik en gesin op die lang duur gaan inhou. Pas te alle tye selfdissipline toe, en onthou dat jou gevoelens nooit ’n aanduiding is van hoe jy moet optree nie. Neem God se Woord as jou riglyn: respekteer jou huweliksband en moenie rondflankeer nie – die Bybel verseker jou dat God self sal afreken met mense wat rondslaap of seksueel verkeerde dinge doen.
Hemelse Vader, ek bid dat U dit self vir my moontlik sal maak om absoluut getrou te wees aan die man met wie ek getroud is. Help my om alle versoekings wat oor ons huwelikspad kan kom met u hulp te weerstaan.
Amen
3 Februarie
Liefde onder mekaar
Lees Johannes 13:31-35
“Ek gee julle ’n nuwe gebod: julle moet mekaar liefhê. Soos Ek julle liefhet, moet julle mekaar ook liefhê. As julle mekaar liefhet, sal almal weet dat julle dissipels van My is” – Joh 13:34
Net nadat Hy Judas as sy verraaier aangewys het, het Jesus ’n laaste, baie belangrike boodskap vir sy dissipels: Hy vra dat hulle mekaar sal liefhê, met dieselfde soort liefde waarmee Hy hulle liefhet. Aan hul liefde vir mekaar, behoort ander mense te kan sien dat hulle sy dissipels is.
Die huwelik is die een plek waar dit die moeilikste is om jou liefde vir ’n ander persoon uit te leef. Met alle ander mense kry jy darem soms ’n blaaskans, maar in die huwelik het jy jou man élke dag by jou, behoort jy élke dag vir hom te wys dat jy hom liefhet en dat sy belange vir jou eerste kom. En dit is nie so maklik om lief te hê met die onvoorwaardelike liefde wat Jesus van sy kinders vra nie.
In Handelinge 11:26 lees ons dat die gelowiges in Antiogië vir die eerste keer Christene genoem is. Dit was heel waarskynlik omdat mense wat Jesus goed geken het van sy eienskappe in hierdie mense se lewens bemerk het. Hoe lyk dit met jou? Kan jy in alle eerlikheid getuig dat jou huweliksmaat elke dag God se liefde in jou optrede teenoor hom ervaar? Indien nie, probeer van nou af om jou man só lief te hê dat mense wat na julle huwelik kyk, Jesus se eienskappe daarin sal kan raaksien.
Here Jesus, ek kry dit maar net nie reg om my man lief te hê met dieselfde soort onselfsugtige, onvoorwaardelike liefde wat U van my vra nie. Ek bid dat U dit vir my moontlik sal maak.
Amen
4 Februarie
Bewondering en vertroue
Lees Spreuke 31:10-28
’n Knap vrou is baie werd […] Haar man steun op haar en pluk die vrugte van haar werk. Haar kinders prys haar, haar man bewonder haar – Spr 31:10-11, 28
Hierdie Bybelhoofstuk is geskryf in ’n tyd toe vroue byna nie gereken is nie en ook geen regte gehad het nie. Die Spreukevrou was haar tyd ver vooruit – sy was selfstandig, selfversorgend en intelligent. Daar was ook ’n besondere verhouding tussen die Spreukevrou en haar man. Ons lees hier dat hy haar bewonder en op haar staatgemaak het.
Daar is veral twee eienskappe wat ’n huwelik laat floreer: bewondering en vertroue. As jy vir jou man wys dat jy hom steeds bewonder en vertrou, sal die liefde tussen julle van jaar tot jaar toeneem. As jou man aan jou optrede kan sien dat jy hom nie werklik vertrou nie, gaan hy baie meer geneig wees om onbetroubaar op te tree. Laat hom toe om soms alleen saam met sy vriende uit te gaan sonder om hom elke oomblik op te pas. En vertel tog gedurig vir hom hoe spesiaal hy vir jou is! In sy boek His Needs, Her Needs skryf Willard F. Harley ’n man se vyf belangrikste behoeftes wat hy in sy vrou soek, is seksuele bevrediging, ’n speelmaat, aantreklikheid, huislike versorging en bewondering. Jou man soek dus doelbewus na jou liefde en bewondering – gee dit vir hom en sorg sommer ook dat jul kinders dit sien. Dit gaan vir seker die wêreld se goed vir jul huwelik doen.
Here, ek is so geneig om my man te kritiseer pleks van hom te bewonder en te vertrou. Baie dankie dat U vir my ’n man gegee het wat my vertroue en bewondering verdien. Help my om dit van nou af vryelik vir hom te gee.
Amen
5 Februarie
Eerbied en liefde
Lees Efesiërs 5:21-30
Wees uit eerbied vir Christus aan mekaar onderdanig. Vrouens, wees aan julle mans onderdanig, net soos julle aan die Here onderdanig is. Mans, julle moet julle vrouens liefhê soos Christus die kerk liefgehad […] het – Ef 5:21-22, 25
Paulus se oproep tot onderdanigheid laat menige selfstandige, moderne vrou met ’n tikkie verontwaardiging. Ons is immers net so goed (of beter) as enige man! Maar die onderdanigheid waarvan hier gepraat word, het niks met baasskap en oorheersing te make nie. Onderdanigheid in die huwelik behoort geskoei te wees op die voorbeeld van die verhouding tussen Christus en sy kerk.
Paulus se motivering vir hierdie oproep aan die gemeente in Efese is dan ook “eerbied vir Christus”. Wanneer ons onderdanig aan mekaar is omdat ons vir Christus eerbied het, raak hierdie oproep tot onderdanigheid ’n vanselfsprekende voorreg vir twee Christen-huweliksmaats. Net wanneer God aan die stuur van jou huwelik staan, het daardie huwelik die regte fondament. Dit is God wat aan die man die leiersrol in die huwelik toeken, en dit is ook Hy wat van die vrou verwag dat sy vrywillig hierdie leiersrol van haar man sal erken. As jy swaar sluk daaraan, weet dat jou man nog ’n veel moeiliker opdrag gekry het: Hý moet jou liefhê met dieselfde liefde waarmee Christus sy kerk liefhet – ’n onselfsugtige, opofferende liefde wat nie eers vir die dood terugdeins nie. Eerbied en liefde is slegs ’n paspoort tot huweliksgeluk as dit gemunt is na die model van Jesus se liefde vir sy kerk, dus God se liefde vir ons.
Here, maak dit vir my moontlik om uit eerbied en liefde vir U aan my man onderdanig te wees en sy leiersrol in ons huwelik te eerbiedig.
Amen
6 Februarie
Sekerheid in die huwelik
Lees Efesiërs 5:31-33
Daar staan in die Skrif: “Daarom sal ’n man sy vader en moeder verlaat en saam met sy vrou lewe, en hulle twee sal een wees.” Hierin lê daar ’n diep geheimenis opgesluit […] Elkeen moet sy vrou so liefhê soos hy homself liefhet, en ’n vrou moet aan haar man eerbied betoon – Ef 5:31-33
God het dit self so bepaal dat ’n man sy ouerhuis sal verlaat en saam met die vrou van sy keuse sal lewe, en dat hulle twee volkome één sal wees. Een plus een bly hier dus één. Geen wonder dat Paulus dit as ’n geheimenis bestempel nie! Dit is inderdaad ’n wonder wanneer twee afsonderlike persone met verskillende persoonlikhede só lief vir mekaar is dat hulle bereid is om die ander een eerste te stel sodat hulle mettertyd in alle opsigte met mekaar sal deel, in mekaar sal opgaan en volkome toegewyd en getrou aan mekaar sal wees.
Eenheid in die huwelik beteken egter nie dat jy nou jou eie persoonlikheid moet prysgee en ’n kloon van jou man word nie. Dit beteken net dat jou man vir jou belangriker as jyself sal wees, dat jy hom sal ondersteun en help om sy volle potensiaal te verwesenlik.
Besluit sommer nou om in jou eie huwelik na hierdie eenheid te strewe. Jy sal dit net kan regkry as jy werklik kans sien om jou man se belange bó jou eie te stel. En met God se hulp sal dit mettertyd vir jou moontlik raak.
Here, dis nie altyd vir my so maklik om my man in alle opsigte eerste te stel nie – U weet dat ek maar ’n sondaar bly! Help my asseblief om onselfsugtig in my huwelik op te tree sodat ek en my man werklik één sal wees.
Amen
7 Februarie
Laat God eerste kom
Lees