Op vlerke van geloof. Solly Ozrovech
swakkeling. Ek sal my waardigheid moet prysgee. Die persoon aan wie ek dit sê, sal net lekkerkry. Weens hierdie subtiele influisteringe van Satan, kom ons nooit by die bevrydende belydenis uit nie. Só word ons lewe verarm en skep ons nuwe teelaarde vir bitterheid en misverstand.
Sonder skuldbelydenis kan geen vertroebelde verhouding reggemaak word nie. Nie ons verhouding met God nie en ook nie dié met ons medemens nie. Ons kan dit nie bekostig om te trots of te hoogmoedig te wees om skuld te aanvaar nie. Vra God om deur sy Gees aan jou die moed te skenk om te sê jy is jammer. Die resultate sal jou verras en verbly.
GEBED
Here Jesus, help my om te vergewe soos U my vergewe en om die gebroke verhoudinge in my lewe te herstel deur skuldbelydenis. U kán alle dinge nuut maak en ek wag gelowig op U.
23 Februarie
Die glorie van medelye
LEES Efesiërs 4:25–32
Wees goedgesind en hartlik teenoor mekaar, en vergewe mekaar soos God julle ook in Christus vergewe het. – Efesiërs 4:32
Miskien was daar ’n tyd toe die behoeftes van minderbevoorregtes jou diep getref het en jy iets gedoen het om hul nood te lenig. Nou word jy egter nie meer geraak nie. Jou gewete het afgestomp vanweë die alledaagsheid van armoede. As dit waar is van jou, het jy toegelaat dat ’n belangrike deel van jou geestelike lewe afgetakel word.
Deur onbetrokke by die nood van jou medemens deur die lewe te beweeg, maak jy dit vir die Heilige Gees moeilik om deur jou te werk. Dit is deur sensitiewe en gehoorsame mense dat God sy werk op aarde doen.
’n Gevoelige gewete is nie maklik om mee saam te leef nie, want jy vereenselwig jou met die pyn en nood van ander. Dit maak egter van jou ’n meer begrypende persoon. Jou gewete sal skoon wees en is ook die kanaal waarlangs God sy genade in jou lewe laat instroom. Jy sal in harmonie met Christus en jou medemens wees en jy sal besef hoe genadig en deernisvol God teenoor jou optree in jou nood. Dan openbaar jy die gesindheid van Jesus Christus, word jy vervul met medelye teenoor ander en is jy goedgesind en hartlik teenoor almal wat saam met jou die stryd van die lewe stry.
GEBED
Here, hou my sensitief en maak my vol begrip. Gee aan my ’n gesindheid van medelye deur die kragtige werk van u Gees.
24 Februarie
Die ryke seën van afsondering
LEES Matteus 14:22–32
Nadat Hy die mense weggestuur het, het Hy alleen na die berg toe gegaan om te bid. Toe dit aand word, was Hy daar alleen. – Matteus 14:23
Die mens gedy in geselskap en doen in ’n groep wat hy andersins nooit sou gedoen het nie. Baie mense vrees afsondering. Hulle kan nie hul eie geselskap verdra nie en is bang vir hul eie gedagtes.
Dit is heerlik en voordelig om goeie geselskap te geniet, maar ’n mens se ware karakter kom na vore wanneer jy alleen is. Dan word die rykdom of armoede van jou gees geopenbaar.
Ons moet die genadegawe ontwikkel om met ons eie geselskap tevrede te wees. Ons moet ons gedagtes kan beheer sodat hulle konstruktief is en in onafgebroke gemeenskap met ons Meester kan verkeer. Dan het ons die geheim ontdek van die produktiewe en suksesvolle hantering van ons eensaamheid.
As jy tyd maak om alleen met God te verkeer, sal sy krag na jou deurvloei, jou oordeel sal suiwerder wees, jy sal gebalanseerd optree en met wysheid besluite kan neem.
Om in die stilte met God alleen te wees maak jou direk tot seën vir ander, soos Christus telkens gedemonstreer het.
GEBED
Liefdevolle Meester, dankie vir versterkende oomblikke saam met U. Laat my nooit my eensaamheid bekla nie, maar dit gebruik as ’n geleentheid tot gemeenskap met U en diens aan ander.
25 Februarie
God die onveranderlike
LEES 1 Korintiërs 13:1–13
En nou: geloof, hoop en liefde bly, hierdie drie. En die grootste hiervan is die liefde! – 1 Korintiërs 13:13
Verandering is deel van ons lewe hier op aarde. Van ons vroegste kinderjare tot in die gryse ouderdom beleef ons nimmereindigende verandering wat ons lewe omver kan gooi.
God is egter onveranderlik. Hy kom ons in ons nood tegemoet met die vertroosting: “Ek sal jou nooit verlaat nie, jou nooit in die steek laat nie” (Heb 13:5). “Jesus Christus is gister en vandag dieselfde en tot in ewigheid” (Heb 13:8) en ons waarborg dat daar kosbare dinge is wat blywend is.
• Geloof is blywend. Geloof in God sal alles ten goede laat meewerk. Geloof in Christus wat by ons is al die dae. Geloof in die Heilige Gees wat ons Trooster is. Geloof in God se Woord met sy vertroosting en beloftes.
• Hoop is blywend. Hoop op ’n ewige lewe by God. Hoop dat môre ’n beter dag sal wees omdat God daarin is.
• Liefde is blywend. God se liefde vir ons en ons liefde vir mekaar bly. Ons put krag uit hierdie liefde.
Geloof, Hoop en Liefde bly ons leidsterre deur die veranderinge en kondig vir ons ’n nuwe dagbreek aan.
GEBED
God van Geloof, Hoop en Liefde, dankie dat U, die Onveranderlike, die Leidster van my lewe is. Sterk my geloof; verinnig my hoop en suiwer my liefde deur die werk van u Seun.
26 Februarie
Wees dankbaar
LEES Efesiërs 5:6–20
Dank God die Vader altyd oor alles in die Naam van ons Here Jesus Christus. – Efesiërs 5:20
Dankbaarheid is ’n Christelike deug wat aan ons lewe ’n besonderse kwaliteit verleen. Elke kind van God het ’n oorvloed van redes om dankbaar te wees.
Die geheim van dankbaar wees is om dankbaar te lewe.
In dankbaarheid teenoor God vir die gawe van die lewe moet jy die lewe positief en oorwinnend benut.
In dankbaarheid vir jou geleenthede moet jy hulle gebruik as uitdagings tot sukses in God se diens.
In dankbaarheid vir jou geluk moet jy daarna streef om ander gelukkig te maak.
Vir die skoonheid van God se skepping moet jy in dankbaarheid probeer om die wêreld rondom jou te verryk.
Vir gesondheid en krag moet jy jou dankbaarheid toon deur jou liggaam op te pas en dit in diens van God en jou medemens te gebruik.
Voeg dan by jou gebede van dankbaarheid altyd ’n lewe van dankbaarheid.
GEBED
Skepper-God, maak my hele lewe ’n toegewyde daad van dankbaarheid vir al u liefde en genade wat ek ontvang. Help my om altyd ’n lewe van dankbaarheid te lei.
27 Februarie
Droefheid deur geloof getemper
LEES Openbaring 21:1–8
Hy sal al die trane van hulle oë afdroog. Die dood sal daar nie meer wees nie. Ook leed, smart en pyn sal daar nie meer wees nie. Die dinge van vroeër het verbygegaan. Toe sê Hy wat op die troon sit: “Kyk, Ek maak alles nuut.” – Openbaring 21:4–5
Daar is min mense wat nie by tye intense droefheid ken nie. Jy is magteloos om dit te verhoed. En die oomblik dat dit jou tref, verwar dit jou so dat jy eers heelwat later kan bepaal in watter mate dit jou lewe geraak het.
Droefheid kan lei tot selfbejammering wat jou herstel vertraag. Dit kan jou uitkyk op die lewe vertroebel sodat jy bitter word omdat dit juis met jou gebeur. Die pad uit die moeras is die pad na God toe. Deur ’n onwrikbare geloof in sy liefde en goedheid kom daar bevryding. Dan ontdek jy nuwe dimensies van die lewe. ’n Beter kennis van God, wat jy andersins miskien sou misgeloop het, word jou ryke deel. Jy ontwikkel ’n nuwe verhouding met Hom, “want droefheid volgens die wil van God bring bekering wat tot redding lei, en daaroor was niemand nog ooit jammer nie” (2 Kor 7:10).
God gee