Oorkom jou vrees. Benescke Janse van Rensburg
die vuurwapen op my pa rig, het my pa aangehou bid dat God hom moet beskerm. Die aanvaller het ’n paar keer die sneller van die pistool probeer trek, maar niks wou gebeur nie. Toe hy dit besef, het hy in vrees omgedraai en weggehardloop. My ouers het die boeregemeenskap en die polisie ontbied. Die aanvaller is later deur die polisie in die landerye naby die huis aangekeer nadat hy op die polisie geskiet het – met dieselfde pistool wat hy vroeër op my pa gerig het! Ek dank God dat Hy daardie dag by my ouers op die plaas was en ek twyfel nie vir ’n oomblik dat wonderwerke vandag nog gebeur nie!”
Paula vertel: “’n Paar jaar gelede was daar ’n ander vrou in my man se lewe. Dit was vir my geweldig traumaties en in ’n stadium het ek onder die druk geswig, ineengestort en in ’n kliniek beland. Alhoewel ons nie deur ’n egskeiding is nie, het my man nie meer sy trouring gedra nie. Dit het in ’n houertjie in ons huis gelê. Ek wou dit laat smelt het, maar iets het my gekeer. Dit is immers vir my die mooiste ding as ’n man sy trouring met trots dra.
“Ná jare se gebede waarin ek vir God gevra het om my man aan te raak en met hom te maak soos Hy wil en nie net soos ek wil nie, het my man besluit om ’n mannekamp by te woon. Ek sal nooit die Sondag vergeet toe ek van die kerk af teruggekom en hom vir die eerste keer na die kamp sien nie. Daar was trane in sy oë toe hy my omhels en vra waar sy trouring is. Hy wou dit weer dra.
“Na ’n baie lang tyd het God my gebede beantwoord. My man het sy hart vir God gegee en waarlik vir Hom begin leef. My kinders het ’n nuwe pappa en ek is van vooraf verlief en lief vir my man. Moet dus nooit ophou bid vir jou huweliksmaat nie. By God is alles moontlik!”
Louise vertel: “Verlede jaar op 9 Junie wou ek selfmoord pleeg. Ek was op pad vanaf Witbank na Bedfordview. My huwelik was nie gesond nie en ek was net moeg vir alles en almal. Ek het vier kinders: ’n dogter van 17, ’n seun van 12 en ’n identiese tweeling van 2. Op die pad het ek geweet dat dit nou of nooit is. Ek het my veiligheidsgordel losgemaak en vinniger begin ry. Die laaste keer toe ek op die snelheidsmeter gekyk het, het ek teen 210 km per uur gery. Ek wou agter teen ’n groot vragmotor vasry om te verhoed dat ’n ander motoris se lewe ook geneem word.
“Dit was nie lank voordat ek die eerste vragmotor langs die pad gesien staan het nie. Ek het versnel en reguit op die vragmotor afgepyl. Net voordat ek die vragmotor getref het, het my tweeling se gesigte voor my verskyn. Ek het uitgeswaai en die vragmotor letterlik met millimeters gemis.
“’n Paar kilometer later het nog ’n vragmotor langs die pad gestaan. Weer het ek versnel. Dié keer het ek, net voordat ek die vragmotor getref het, groot pienk woorde op die agterkant van die vragmotor gelees: ‘Driving for Jesus.’ Ek het uitgeswaai en weer die vragmotor net-net gemis. Ek het langs die pad tot stilstand gekom en besef dat God my deur sy genade gekeer het om my eie lewe te neem.
“Vandag sidder ek om te dink dat my kinders sonder my sou moes grootword. Ek dank God dat Hy my nooit verlaat of in die steek gelaat het nie. In Hom is daar altyd hoop, al voel jy ook hoe moedeloos!”
Barbara, Paula en Louise is reg. God doen steeds wonderwerke. Luister weer na Jesus se woorde in Markus 11:24: “Alles wat julle in die gebed vra, glo dat julle dit al ontvang het, en dit sal vir julle so wees.” Johannes 16:23 sê: “Dít verseker Ek julle: Wat julle die Vader ook al in my Naam sal bid, sal Hy vir julle gee.” En Deuteronomium 33:27 sê: “Die ewige God is ’n skuilplek, sy arms is altyd onder jou.”
Daar is krag in die Naam van Jesus Christus. Kom ons begin bid – sonder twyfel in ons harte. En kom ons wag opgewonde op die deurbraak wat Hy vir ons beplan. Onthou, Hy sluimer en slaap nooit nie!
Gebed
Vader God, baie dankie dat ek in elke situasie na U kan kom met die wete dat U my beskerm. Lei my en my geliefdes vandag om bewus te wees van u teenwoordigheid rondom ons. Ek vra dit in die Naam van Jesus Christus. Amen.
Besprekingsvrae
1 Het jy onlangs ’n wonderwerk van God beleef? Wat het gebeur en hoe het dit jou geloof versterk?
2 Lees Markus 11:24. Hoe versterk hierdie teksvers jou geloof wanneer jy bid?
3 Lees Johannes 16:23. Watter krag lê daarin om in die Naam van Jesus Christus te bid?
4 Lees Deuteronomium 33:27. Watter berusting bring hierdie teksvers jou?
5 Waarom glo jy kan jy voortaan vreesloos leef, met die wete dat God in beheer is?
6
Oorkom jou vrees met die wete dat God in beheer is
1 Korintiërs 13:12
Nou kyk ons nog in ’n dowwe spieël en sien ’n raaiselagtige beeld, maar eendag sal ons alles sien soos dit werklik is. Nou ken ek net gedeeltelik, maar eendag sal ek ten volle ken soos God my ten volle ken.
Psalm 46:11–12
Bedaar en erken dat Ek God is, hoog bo die nasies, hoog bo die aarde. Die Here, die Almagtige, is by ons, die God van Jakob is vir ons ’n beskutting.
Na aanleiding van ’n dagstukkie (hoofstuk 18) waarin ek geskryf het dat God se gedagtes nie ons gedagtes is nie en dat Hy altyd die groter prentjie sien wanneer ons net ’n gedeelte sien, deel ek graag hierdie e-pos wat Johan Oosthuizen uit Kasakstan gestuur het.
Hy skryf: “My stiefpa, vir wie ek baie lief was, het ’n tyd gelede ernstig siek geword en is in die hospitaal opgeneem. In dieselfde tyd het ’n buitelandse prediker spesiale dienste by ons kerk gelei. Een aand na afloop van die kerkdiens het die prediker ’n uitnodiging gerig aan alle siekes in die gehoor (of diegene wat namens ’n siek geliefde wou instaan) om na vore te gaan sodat hy vir ons kon bid. Ek het dadelik namens my stiefpa vorentoe gegaan.
“Die prediker het vir almal voor my in die ry gebid. Toe hy by my kom, het hy egter nie vir my gebid nie, maar na die persoon langs my beweeg. Ek is teleurgesteld huis toe. Toe ek by die huis kom, het ek ’n oproep van my ma gekry met die hartseer nuus dat my stiefpa aan ’n hartaanval gesterf het.
“Ek is die volgende aand terug kerk toe. Na afloop van die diens het ek die prediker gevra hoekom hy nie die vorige aand vir my gebid het nie. Hy het geantwoord dat God aan hom gewys het dat my stiefpa ernstig siek was. As hy vir hom sou bid, sou my stiefpa leef, maar dan sou hy later ’n veel erger dood sterf. In die nadoodse ondersoek het ons uitgevind dat my stiefpa kanker gehad het. Dit is nie tydens sy lewe gediagnoseer nie. God het hom dus daarvan gespaar.
“Ek het opnuut besef dat God almagtig is. Wanneer Hy soms nie ons gebede beantwoord nie, is Hy heel moontlik eintlik besig om ons te beskerm!”
Johan is reg. God sien die hele legkaart waar ons net ’n deel daarvan sien, en daarom vrae vra en wonder of God van ons vergeet het. In 1 Korintiërs 13:12 lees ons: “Nou kyk ons nog in ’n dowwe spieël en sien ’n raaiselagtige beeld, maar eendag sal ons alles sien soos dit werklik is. Nou ken ek net gedeeltelik, maar eendag sal ek ten volle ken soos God my ten volle ken.”
Koning Hiskia se lewe is ’n voorbeeld hiervan. Hy was ’n gelowige en godvresende man wat in die bloeityd van Juda geregeer het. Hy het egter ernstig siek geword. Op sy sterfbed het hy God gesmeek dat God nie sy lewe sal beëindig nie. God verhoor toe sy gebed en verleng sy lewe met vyftien jaar (2 Konings 18).
In hierdie ekstra vyftien jaar het Hiskia egter toegelaat dat trots ’n houvas op sy lewe kry toe hy by die Babiloniërs met sy weelde en besittings begin spog het en vergeet het dat dit ’n genadegawe uit God se hand is. Hiskia se seun Manasse is ook in hierdie tyd gebore. Hy het afgode gedien en het ’n ernstige straf oor die volk gebring. Sou Hiskia beter af gewees het as sy lewe nie verleng is nie? Heel moontlik.
Waarvoor smeek jy God vandag? Soms moet ons ons aan die woorde in Psalm 46:11–12 herinner: “Bedaar en erken dat Ek God is, hoog bo die nasies, hoog bo die aarde. Die Here, die Almagtige, is by ons, die God van Jakob is vir ons ’n beskutting.”
Wanneer slegte dinge oor ons pad kom, is ons geneig om God te bevraagteken. Is dit nie eerder tyd dat ons Hom daarvoor moet dank nie?