Kragtige gebede. Arthur Odendaal
Kragtige gebede
Hoe om die Woord te bid
Arthur Odendaal
Lux Verbi
Sewe dae sonder gebed maak ‘n mens swak.
- Allen E. Bartlett
Inleiding
Ná bykans dertig jaar in die heeltydse bediening word ek steeds gedurigdeur bewus gemaak van die hunkering van kinders van God om die “regte” gebede te bid. Baie mense het nie die vrymoedigheid om in die openbaar te bid nie, nie voor hul eie gesinne nie en ook nie in kleiner groepies of by kerkbyeenkomste nie. Die grootste rede hiervoor is ’n gebrek aan kennis (vgl. Hos 4:6). Mense weet nie wat en hoe om te bid nie.
Dis my begeerte om jou toe te rus. Kragtige gebede is ’n goeie vertrekpunt om jou persoonlike gebedslewe te verander en om jou meer vrymoedigheid te gee om alleen en saam met ander te bid. Ek het ’n menigte Skrifte ondersoek en verwerk om hierdie handleiding in jou hand te plaas. Hierdeur het ek opnuut besef watter geweldige krag losgelaat word wanneer die Woord van God, wat deur die Heilige Gees geïnspireer is, uit die mond van ’n gewone mens begin vloei. Die inspirasie wat binne-in jou ontstaan, is onbeskryflik. Op hierdie manier bring jy die gedagtes van God voort en spreek jy gees en lewe (vgl. Joh 6:63).
Deur die Skrif te bid, word gesonde geestelike groei gewaarborg. Soos wat jy die geïnspireerde Woord daagliks hardop bid en dit aanhoor, sal jy begin verstaan hoe jy behoort op te tree of behoort te glo. Die Bybel leer ons dat geloof uit die gehoor kom en die gehoor uit die Woord van God (vgl. Rom 10:17). Terwyl jy die Skrif hardop bid, sal jou geloof begin groei. Verder sal jou kennis van die Woord grootliks toeneem. Oor die jare heen was mense verstom oor my vermoë om die Skrifte te kan aanhaal. Ek het beslis geen fotografiese geheue (soos sommige bespiegel) nie. Nee. Die kuns lê in die herhaling van en aanhoudende blootstelling aan die Woord. Dis blote inoefening totdat jou siel daarvan deurdronge is. Jy sal dus oplet dat die Skrifte in hierdie boek vir gebedsdoeleindes aangepas is, maar die inhoud en die betekenis daarvan bly onveranderd. Elke gebed word van ’n teksverwysing vergesel. Elke Skrif wat ek herhaalde kere bid, word stelselmatig in my siel ingeëts. Omdat omtrent elke woord van hierdie gebede met die Skrif deurspek is, het my gebede trefkrag. Ek bid in die Gees, soos die Bybel beveel (vgl. Jud 1:20). Ek kom dus met groot vrymoedigheid na die troon van genade (vgl. Heb 4:16). Op hierdie manier behaag my geloof die Here en kan ek verwag om beloon te word (vgl. Heb 11:6).
Elke woord van Kragtige gebede kom voort uit jare lange, persoonlike ondervinding in die bediening. Dit verseker dat hierdie boek nie net ’n boek is wat ’n mens lees en wegbêre nie, maar eerder ’n handleiding wat jy by jou kan dra totdat gedurige gebed ’n lewenswyse by jou word. Ons behoort daagliks te bid. Bid die Skrif. Eindelik sal hierdie gebede so ingeoefen wees dat jy sonder hierdie boek jou gebede tot God sal kan rig. Jy sal onbeskaamd vir jou en ander se gesondheid, vir jou huwelik en vir jou kinders kan bid. Jy sal vurig kan bid vir mense wat teruggeval het, vir jou gemeente, in jou gemeente en in die openbaar.
Jy sal ’n onstuitbare bidder word.
Hierdie handleiding gee vir jou duidelike riglyne waarvolgens jy die Woord van God kan bid. Die gebede kan vir jou unieke, persoonlike situasie toegepas en aangepas word. Die voordele hiervan is eindeloos. Waarna soek ons eindelik? Ons is op soek na ’n veranderde lewe wat hemelse krag opwek en bonatuurlike vooruitgang en groei bewerkstellig. Mag dit so vir jou en jou geliefdes wees, soos wat jy sonder ophou bid (vgl. 1 Tess 5:17).
Arthur Odendaal
2013
Wat is gebed?
Die môre vroeg, toe dit nog nag was, het Hy opgestaan en buitentoe gegaan na ’n eensame plek en daar gebid – Markus 1:35.
Op verskeie plekke in die Bybel lees ons oor gebed. Daar is nie net talle voorbeelde van bidders en hul gebede in die Bybel nie, ons lees ook wat die gevolge van hierdie gebede was. Om die waarheid te sê, die Bybel het soveel te sê oor gebed dat ’n besinning oor wat gebed is, ’n goeie wegspringplek vir enige boek oor gebed is.
Gebed is kommunikasie
Die eenvoudigste definisie van gebed is dat dit ’n gesprek met God is. Gebed is om met God te praat. Gebed is om met die hemelse Vader te gesels. Dit is om met Hom gemeenskap te hê en ons harte teenoor Hom oop te maak. Hierdie kommunikasie kan geskied deur ’n gesprek met woorde wat ons hardop uitspreek, of ons kan dit klankloos in ons gedagtes tot God rig. ’n Gebed kan ook in ’n joernaal neergeskryf word of op ’n rekenaar getik word. Ons kan dit sing of dit saggies prewel. Ons kan sit, staan of lê terwyl ons dit doen, solank ons in gedagte hou dat dit die Here is met wie ons praat. Deur gebed sê ons vir God dat ons in Hom glo, Hom vertrou en Hom liefhet. Deur gebed verklaar ons ons liefde aan God deur woorde van geloof.
Die teendeel is ook waar. As dit wat ons sê, dink of skryf nie aan God gerig is nie, is dit nie gebed nie.
Gebed is ’n magtige wapen
Gebed is die magtigste wapen wat ons getroue en magtige God vir ons gegee het. Laat ons daarom hierdie magtige en kragtige wapen inspan en laat ons bid, glo en ontvang in die Naam van Jesus, ons Here en Redder.
Wat moet ek dan doen?
Bid met die Skrif in jou mond. Bid tot God die Vader in die Naam van Jesus, die Seun van God. Bid sonder ophou. Bid met die ondersteuning van die Heilige Gees. Bid en God sal jou hoor en jou antwoord. Bid en ervaar die genesing en wonders waarvoor jy vra. Bid en jy sal die oorvloed van sy genade ontvang.
Om ’n Christen te wees sonder gebed is net so onmoontlik as om te lewe sonder om asem te haal.
– Martin Luther
’n Kerk sonder gebedsbyeenkomste is soos ’n skip sonder ’n roer.
– Ronald Christian Denhard
Waarom moet ons bid?
Ons bid omdat ons God liefhet
Opregte liefde dring ons om te kommunikeer. Net soos ’n man en vrou begeer om tyd saam deur te bring en te kommunikeer, net so wil die gelowige met God kommunikeer en tyd in gemeenskap met Hom deurbring. Die liefdesverhouding is afhanklik van wedersydse kommunikasie. Gebed is wanneer ons ons harte tot God rig en met woorde teenoor die Here uiting gee aan ons gedagtes.
Ons bid omdat ons afhanklik van Hom is
God is ons Bron. Hy is ons lewe. Ons is geheel en al van Hom afhanklik. Deur gebed verkry ons vertroosting, krag en voorsiening in al ons behoeftes, of dit nou liggaamlike of geestelike behoeftes is. Gebed is net so noodsaaklik vir ons geestelike lewe as wat lug vir ons natuurlike lewe is.
Ons bid om versoekings te weerstaan
In Matteus 26:41 sê Jesus aan sy dissipels: “Waak en bid, sodat julle nie in versoeking kom nie.” ’n Lewe sonder gebed is ’n lewe wat gekenmerk word deur baie versoekings en die gevolge daarvan – sonde. As daar ’n gebrek aan gebed in ’n mens se lewe is, is daardie mens swak en word dit moeilik om die vyand te weerstaan. Dit maak dit moontlik vir ons geestelike vyand, Satan, om die oorhand in ons lewe te kry.
Ons bid omdat dit noodsaaklik is om God by dade van verlossing en redding te betrek
God het die aarde aan Adam en sy nageslag gegee. Ons moet God uitnooi om hier by ons betrokke te wees. Indien ons versuim om dit te doen, sal Satan voortgaan om die sinne van die goddelose mense te verblind, want vir hulle is hy die god van hierdie wêreld (vgl. 2 Kor 4:4). Hy sal voortgaan om hom in te meng in mense se sake en dan sal God se oordeel uiteindelik