Kragtige gebede. Arthur Odendaal
gelowiges in ooreenstemming met God en sy Woord leef en optree, en God se Woord spreek én uitleef, sal hierdie selfde Woord kragtig tot vervulling kom en verandering meebring. God se Woord sal nie leeg na Hom terugkeer nie (vgl. Jes 55:11). Die krag van sy hemelse Woord sal ons aardse bestaan radikaal verander.
Dit vernuwe jou gemoed
Deur die Woord te bid, sal jou gemoed vernuwe word. Jy sal op ’n nuwe, kragtiger manier dink. Die Here leer ons dat alles moontlik is vir mense wat glo. Só word jou denke verander vanaf “dis onmoontlik” na “alles is moontlik”. “En word nie aan hierdie wêreld gelykvormig nie, maar word verander deur die vernuwing van julle gemoed, sodat julle kan beproef wat die goeie en welgevallige en volmaakte wil van God is” (Rom 12:2; klem bygevoeg). “En dat julle vernuwe moet word in die gees van julle gemoed” (Ef 4:23; klem bygevoeg).
Dit vernuwe jou gedrag
Of ons dit wil erken of nie, ons tree volgens ons denke op. Soos ’n mens in sy hart dink, so tree hy op. En soos wat jou denke vernuwe word, sal jou gedrag ook vernuwe word. Jou gedrag sal mettertyd die waarhede van God se Woord weerspieël. God se hart en sy gedagtes word vervleg met joune, en sodoende begin jy om die Here se gedagtes en bedoelings sigbaar uit te leef.
Jou lewe verander
Paulus het vir die gemeente in Korinte geskryf dat hy gou na hulle sou kom: “[…] as die Here wil, en dan sal ek te wete kom, nie die woorde van dié wat opgeblase is nie, maar hulle krag; want die koninkryk van God bestaan nie in woorde nie, maar in krag” (1 Kor 4:19-20). Ons bediening bestaan nie uit opgeblase woorde nie, maar uit krag. Deur die Woord van God te bid, sal jou kragtelose lewe tot ’n kragdadige lewe verander word, ’n lewe wat van groei en vooruitgang getuig. Ja, dit is beslis wat dit is! Dit is waarna ons op soek is, ’n lewe wat verander sodat jy hemelse krag ontvang en bonatuurlike groei plaasvind. Hierdie soort lewe begin op die pad waar die eerste treë in geloof gegee word deur God se Woord hardop te bid. Dit is vryelik beskikbaar vir almal. En dit getuig dat alles moontlik is vir dié wat glo, vir dié wat God loof en eer!
As Christene soveel tyd bestee om te bid as wat hulle kla, sal hulle binnekort niks hê om oor te kla nie.
– Anoniem
Moenie bid wanneer jy lus voel nie. Maak ’n afspraak met die Here en hou daarby.
– Corrie ten Boom
Hoe om gebede te benader wat op die Woord gegrond is
Die doeltreffendste manier om gebede wat op die Skrif gegrond is jou eie te maak en die krag daarvan te ontdek, is deur ’n selektiewe en persoonlike benadering te volg. Verskillende behoeftes vereis verskillende benaderings. Doen navorsing oor die verskillende onderwerpe wat jy verkies en kies dié teksverse wat die beste op jou spesifieke situasie van toepassing is.
Die teksverse wat in hierdie boek saamgevat word, kan verpersoonlik word deur persoonlike voornaamwoorde by die verse in te sluit. Hier is ’n voorbeeld van hoe jy dit kan doen: “Here, help Johan en Martie om aan my en Gertruide (hul ouers) gehoorsaam te wees in die Here en om ons te eer sodat dit met hulle goed mag gaan en hulle lank mag lewe op hierdie aarde” (vgl. Ef 6:1-3). “Laat my en Gertruide se huwelik in alle opsigte Christus en sy gemeente uitbeeld, sodat ons mekaar sal liefhê” (vgl. Ef 5:25-32). “Here, help my om Marius en Freek, wat my vyandiggesind is, lief te hê. Gee dat ek hulle sal seën as hulle my vervloek en aan hulle goed sal doen ten spyte van hul haat vir my en dat ek vir hulle sal bid wanneer hulle my beledig en vervolg” (vgl. Matt 5:44). “Here, ek bid dat dit met Koos en Hannalie in alles sal goed gaan en dat hulle gesond sal wees” (vgl. 3 Joh 2). “Here, ondersteun my buurman op sy siekbed; verander sy hele slaapplek omdat hy krank is” (vgl. Ps 41:4). “Ek bid dat U vir Rustenburg se inwoners ’n nuwe hart en gees in hul binneste sal gee” (vgl. Eseg 36:26). “Mag Rustenburg se inwoners tot inkeer kom en hulle bekeer, sodat hul sondes uitgewis kan word en tye van verkwikking van u aangesig oor die stad mag kom” (vgl. Hand 3:19).
Die styl van jou gebed sal bepaal word deur hoe doelgerig en persoonlik jy is. Jy sal die verse makliker deur assosiasie onthou. Dit sal jou in staat stel om meer energiek en vreugdevol te kan bid. Soos jy sien hoe jou gebede beantwoord word, sal jou geloof toeneem. Dit is wat die beker van vreugde van ’n bidder van die Woord laat oorloop!
Dit help om ’n joernaal te hou van die mense en sake waarvoor jy bid, sodat jy later rekord kan hou van die resultate van jou gebede. Dit kan dien as ’n getuienis van die goedheid en die grootheid van God.
Wanneer jy bid, moet jy verwag dat jy gou die antwoord daarop sal sien. Volhard in die gebed en in jou verwagting. Moenie sommer tou opgooi nie. Dank die Here gedurigdeur vir dit wat jy verwag om binnekort te sien. Hierdie soort deursettingsvermoë en kinderlike geloof maak die Here baie bly.
Ons moet net soveel tyd bestee om God te bedank vir sy gawes as wat ons doen wanneer ons daarvoor vra.
– Vencent de Paul
Is gebed jou stuurwiel of jou spaarwiel?
– Corrie ten Boom
Redes waarom mense nie bid nie
Voordat ons voortgaan met voorbeelde van tematiese gebede, sal dit goed wees om stil te staan by die verskillende redes waarom mense nie bid nie, en om hierdie verskillende redes te ondersoek.
Ek het geen begeerte om te bid nie
Sommige mense sal sê dat hulle geen begeerte het om te bid nie, maar dikwels kom dit eerder aan op geen tyd nie, eerder as geen begeerte nie. Hierdie mense kan beskryf word as selfonderhoudend, talentvol en goeie bestuurders van hul tyd. Die enigste tyd wat in so ’n besige mens se besige skedule aan die Here afgestaan word in gebed, is Sondag tydens die erediens. Tog roep hulle die Here aan wanneer daar ’n krisis is en wanneer hulle Hom dringend nodig het. Hierdie mense moet onthou dat al hul bekwaamhede en talente beperk word sonder ’n gesonde en sterk verhouding met die Here Jesus.
Ek het nie genoeg tyd om te bid nie
Tyd word deur die Here aan ons gegee, en ook elke asemteug wat ons neem. Dit is alles in God se hande. As ’n mens tyd inruim om met die hemelse Vader te praat, sal Hy jou tyd vermeerder. Hy sal jou toerus om jou prioriteite te orden en vir jou meer tyd teruggee as wat jy dink moontlik is. As jy te besig is om te bid, is jy te besig om te leef!
Dit is moeilik om vroeg op te staan
Min mense hou daarvan om vroegoggend te bid. Die meeste van ons beskou dit as uiters moeilik. Ons almal weet hoe swak die vlees kan wees, maar die Gees binne jou smag daarna om tyd met die Vader deur te bring. Dit is nie maklik nie, maar met toewyding en opoffering is dit beslis die moeite werd.
Ek weet nie hoe om te bid nie
Moet jou nie te veel kwel oor hoe om te bid nie. Gebed is niks meer of minder as ’n lieflike gesprek met jou hemelse Vader nie. Wanneer jy die Woord bid, sal dit jou al die nodige leiding gee wat jy nodig het om te leer hoe om te bid.