Uit die Beek 2015. Attie van Wijk
Wanneer het jy gevoel God antwoord jou nie?
“As God vir ons is, wie kan teen ons wees?” staan op ’n bord wat ons van ’n Indiese kollega gekry het. Hy het dikwels met baie teëstand te doen, dus was dit interessant om sy positiewe gesindheid te sien. Dit is maklik om depressief te raak as dinge verkeerd loop of as ons met teëstand te doen kry, soos Dawid hier getuig. Hy voel soos iemand wat sterwend is, want hy hoor niks van die Here nie.
Vir baie mense is dit ’n probleem as hulle nie dadelik duidelike leiding kry nie. Moet ek van werk verander? Moet ek na ’n ander dorp of land toe trek? Moet ek ’n ander motor koop? Moet ek verder gaan studeer? Is hy of sy die regte lewensmaat vir my? Hoekom is ons kinders so opstandig en ons kommunikasie so sleg? Jy bid al so lank vir die bekering van een van jou kinders, maar dit lyk asof hy of sy al hoe verder afdwaal.
Die probleem is dat ons so besig is met allerlei dinge dat ons nie tyd kry om werklik stil te word en na God se stem te luister nie. Ons tyd word gevul met tydelike dinge, terwyl ons eintlik ons tyd moes bestee het om die Here beter te leer ken. Vandag is die rusdag wat bedoel is om ons tyd te gee om die Here te leer ken. Gebruik ons al die geleenthede wat Hy ons gee? Dikwels is dit nie die Here wat doof is vir ons nie, maar ons wat doof is vir sy stem. Ons sal sy stem net ken as ons tyd saam met Hom deurbring.
GEBED: Here, laat hierdie dag tog tel vir die ewigheid.
Lees vanaand in Psalm 28:6-9 hoe Dawid die Here loof omdat sy gebede verhoor is. Hoe doen ons dit?
Maandag 9 Februarie 2015 • Lees eers Levitikus 25:47-55
Nuwe Eienaar?
Hulle is my dienaars omdat Ek hulle uit Egipte laat trek het. Ek is die Here julle God (25:55).
GESELSVRAAG:
Waaraan raak mense verslaaf?
“Ons mense werk soos slawe,” word soms gesê tydens ’n protesoptog. Maar dit is nie waar nie. Ons weet nie wat slawerny is nie. Slawe het geen regte gehad nie. Hulle kon nie protesteer nie – dit kon hulle hul lewe kos. Hulle het geen salaris verdien nie. Hul eienaar kon vir hulle kos gee as hy wou. Of nie. Hy het volle beheer oor sy eiendom gehad.
Die Israeliete was slawe in Egipte. Hulle moes hard werk en het geen regte gehad nie. Toe het die Here hul hulpgeroep gehoor en hulle deur Moses na vryheid gelei. Hulle sou nie meer die slawe van mense wees nie. Hulle het nou aan die Here behoort. Dit kon gebeur dat ’n Israeliet in ’n geldelike verknorsing beland en hom aan iemand anders as slaaf moes verkoop. Maar dit was net tydelik. Hy self of ’n familielid moes hom vrykoop (vgl v 48-49). En selfs al gebeur dit nie, is hy en sy afhanklikes in die hersteljaar vrygelaat, al was hy die slaaf van ’n nie-Jood (vgl v 54).
Die Here skenk ware vryheid (vgl Joh 8:36). Hy wil nie hê dat een van sy kinders weer ’n slaaf van iemand of iets moet wees nie. Daarom moet ons waak teen gewoontes of middels wat ons van ons vryheid kan beroof.
GEBED: Dankie, Here Jesus, dat U ons waarlik vrymaak. Help ons om elke dag daarvolgens te lewe.
Lees vanaand in Levitikus 26:1-13 watter beloftes die Here gee aan mense wat aan sy gebooie gehoorsaam bly.
Dinsdag 10 Februarie 2015 • Lees eers Levitikus 26:14-22
As julle nie wil luister nie
… as julle my voorskrifte en bepalings verwerp en met minagting behandel, sodat julle nie my bevele nakom nie en my verbond verbreek … (26:15).
GESELSVRAAG:
Hoekom is dit goed om ongehoorsaamheid te straf?
“Dis onregverdig!” is die meeste tieners se reaksie as hul ouers dissipline probeer handhaaf. Hulle verstaan nog nie dat dissipline tot selfdissipline lei, wat hulle sal help om die uitdagings van die volwasse lewe die hoof te bied nie. Hul ouers weet watter gevare en uitdagings daar buite wag. Hulle wil hul kinders dus daarvoor voorberei en daarteen beskerm.
Levitikus sluit af met die Here se vaderlike vermanings wat die volk aanmoedig om gehoorsaam te bly. Sy opdragte gaan gepaard met beloftes, asook waarskuwings oor die verskriklike gevolge van ongehoorsaamheid. Kyk net wat gebeur as ons nie wil luister nie: angs, siektes, misoeste, misdaad, geweld, droogte en roofdiere. Sonde lei onvermydelik tot straf.
Die volk Israel (en ons) kon kies watter pad hulle wou loop: saam met die Here, of weg van Hom af. Wat ons ook al kies, het gevolge. Ons woorde en voorbeeld lei ook ons kinders en kleinkinders op een van daardie twee paaie. Daar kom dus ’n dag dat ons ’n keuse moet maak. Gaan ons Jesus volg, of ons eie kop? Ons besluit sal ons toekoms bepaal. Wat kies jy?
GEBED: Here, ek en my kinders wil U so graag dien. Help ons om u leiding te gehoorsaam.
Lees vanaand in Levitikus 26:23-38 watter ander rampe sal volg as die volk hulle nie bekeer nie. Watter hiervan sien ons reeds?
Woensdag 11 Februarie 2105 • Lees eers Levitikus 26:39-46
Omdraai is moontlik!
Ek sal my beloftes oor die land weer van krag maak (26:42).
GESELSVRAAG:
Wat moet in ons land verander?
“Ons seun het sy rug vir ons gedraai en wil niks meer met ons te doen hê nie. Hy beantwoord nie ons oproepe of briewe nie,” kla ’n vriendin. Sy en haar man is baie hartseer omdat hul seun die pad wat hulle hom probeer aanwys het, verlaat het en blykbaar net vir plesier en rykdom lewe.
Só voel die Here ook wanneer sy volk hul rug op Hom keer en vir die wêreld, rykdom en plesier probeer lewe. Hy gee soveel om dat Hy beproewings oor ons pad sal stuur totdat ons besef dat ons op die verkeerde pad is en na Hom toe terugkeer. En dan belowe Hy om al sy beloftes aan sy volk weer waar te maak. Hy sal hulle seën en terugbring uit die ballingskap. Die voorwaarde is terugkeer en skuldbelydenis (vgl v 43).
Dit is maklik om oor ons land te kla en te vertel van alles wat verkeerd is. Is dit die ongelowiges se skuld? Of is dit dalk die gelowiges s’n? Hoe vergelyk jou kerkbywoning nou met dié van 10 jaar gelede? Hoe betrokke was jy tóé by die kerk? Hoe getrou het jy jou kant gebring by verskillende projekte? Dit kan wees dat Christene al net soos ongelowiges lewe, met die gevolg dat min ongelowiges die begeerte het om te verander. Dalk is dit tyd dat ons onsself op ons knieë toets en na die Here toe terugkom.
GEBED: Here, ek sien baie dinge wat verkeerd is. Wys my wat by my verkeerd is sodat ek dit in u Naam kan regstel.
Lees vanaand in Levitikus 27:1-13 hoe spesiale geloftes aan die Here hanteer moet word.
Donderdag 12 Februarie 2105 • Lees eers Levitikus 27:14-25
Die Here s’n
As iemand ’n deel van sy grond aan die Here wy … (27:16).
GESELSVRAAG:
Waarvoor sou iemand grond aan die Here wou wy?
“Ek wil ’n deel van my plaas, daar bo by die dam onder die bome, beskikbaar stel vir jeugkampe,” het oom Henry besluit. Die jongmense het met groot vreugde van sy gasvryheid gebruik gemaak en elke jaar met die Paasnaweek daar gaan kamp. Dan het hulle tydelike hutte van pale en spoorwegseile opgeslaan, met primitiewe bankies en ’n preekstoel. Gedurende daardie naweke het honderde jongmense tot oorgawe aan Christus gekom. Baie van hulle en hul nageslag is vandag nog in heeltydse sendingdiens. Wat ’n vrugbare belegging.
Die laaste hoofstuk van Levitikus sit die praktiese reëlings uiteen vir iets of iemand wat ten volle aan die Here gewy word. Mense en onrein diere kan losgekoop word, maar rein diere nie. Vaste eiendom kan ook losgekoop word. Indien nie, word dit dan in die Jubeljaar die eiendom van die Leviete. Die waarde van die eiendom is bereken volgens die oeste wat dit kan lewer.
Ons moet onthou dat alles eintlik aan die Here behoort. Ons huis en ander eiendom behoort dus ook aan die Here. Ons moet dit tot sy beskikking stel hoe dit ook al nodig is. Soms vir ’n wyksbyeenkoms of kleingroep, ander kere vir ’n straatbraai, of dalk ’n plek waar die bure se kinders kan studeer tot hul ouers