Uit die Beek 2016. Attie van Wijk
op ’n Leviet lê as simbool dat hy die Leviet die opdrag gee om in sy plek die Here te dien. Daar is ’n sterk ooreenkoms met die voorbereiding van die sondeofferdiere. Die Leviete was dus Israel se offergawes aan God (vgl. v. 11).
Ons kan vandag dink dat ons ook leraars en sendelinge afsonder en uitstuur om die werk van die Here namens ons te doen. Dit skuif egter nie die verantwoordelikheid van ons af om ook God se gestuurde – sy sendeling – te wees by die skool, by die werk, op die plaas en op die pad nie. Geniet jou roeping vandag. Gee jouself (vgl. Rom 12:1-2).
GEBED: Here, ek wy myself en my gesin vandag aan u diens.
Lees vanaand in Numeri 8:12-22 hoe die Leviete die Here namens die volk gedien het.
SATERDAG 16 JANUARIE 2016
Lees eers Numeri 8:23-26
Aftrede
As ’n Leviet egter vyftig jaar oud is, moet hy sy amp neerlê en mag hy nie verder dien nie (8:25).
GESELSVRAAG: Wanneer is dit ’n goeie tyd om af te tree?
“Ek lees van net een persoon in die Bybel wat wou aftree. Dit was die ryk dwaas,” noem iemand toe ons oor aftrede gesels. Hy was egter nie heeltemal korrek nie. Ons lees hier dat die Leviete op 50 moes aftree. Hulle moes vrygestel word van die diens sodat hulle vir hul kinders en kleinkinders kon sorg. Onthou, in hierdie tyd moes die Leviete onder meer die tempelgereedskap kilometers ver dra en die swaar werk doen van die tabernakel op- en afslaan. Dit was dus uit sorgsaamheid dat hierdie reël ingestel is. Dit het ook net vir die Leviete gegeld.
Moses het self eers met sy eintlike werk begin toe hy 80 jaar oud was en was in diens tot 120. Hy was ’n besondere mens – dink net hoe sterk hy moes wees om op daardie gevorderde ouderdom twee groot klipplate teen die berg op en af te dra sodat die Tien Gebooie daarop gegraveer kon word. Sy 40 jaar in die buitelug as skaapwagter het hom seker daarvoor voorberei!
“’n Christen tree nooit af nie. Hy tree net uit sy gewone werk sodat hy voltyds beskikbaar kan wees vir wat die Here deur hom wil doen,” vertel ’n afgetrede boer. Hy en sy vrou werk nou voltyds in die sending in Mosambiek.
GEBED: Here, ons wil U ons hele lewe lank ten volle dien. Help ons om dit te doen.
Lees vanaand in Numeri 9:1-14 hoe gesorg is dat alle mense die vreugde van die Paasfees kon ervaar.
SONDAG 17 JANUARIE 2016
Lees eers Psalm 78:18-22
Ongeloof
... omdat hulle nie op God vertrou het en op sy hulp staat gemaak het nie (78:22).
GESELSVRAAG: Waarom gaan die meeste mense nie kerk toe nie?
“Die grootste gros kerklidmate leef net soos ateïste. Hulle gaan nie meer kerk toe nie; hulle lees nie meer die Bybel nie. Hulle maak nie tyd vir gebed nie. Hulle hou nooit huisgodsdiens nie. Hulle lewenswyse verskil niks van ongelowiges s’n nie.” Stem jy saam met hierdie vriend se opmerking? As dit waar is, is dit ’n groot aanklag teen ons kerke. Maak ons dan geen verskil meer in ons land nie? Waar lê die fout?
Die Israeliete was God se volk. Hy het hulle uit slawerny verlos. Hy was besig om hulle na die beloofde land te lei. Hy het vir hulle gesorg. Tog het hulle gedurig gekla. Hulle was ontevrede met alles wat die Here gedoen het, soos hierdie psalm ons herinner. Hul ongeloof het God kwaad gemaak, lees ons hier. Dit het negatiewe gevolge gehad (vgl. Num 11:1).
Wat sê jou gebruik van die dag van die Here van jou geloof? Wie is die belangrikste in jou lewe? Die Here, of jy self? Is vandag vir jou ’n dag van aanbidding, gebed, Bybelstudie en diens, of van plesier en selfsugtige vermaak? Hierdie dag is ’n kosbare skat as ons dit reg gebruik. Die Here wil ons versterk en voorberei vir die week wat voorlê. Kom ons maak dit sy dag.
GEBED: Dankie dat U aan ons elke week ’n rusdag gee om ons te verkwik, Here. Help my om hierdie dag reg te gebruik.
Lees vanaand in Psalm 78:23-31 hoe mense steeds ontevrede bly, al voorsien die Here ook alles wat hulle nodig het.
MAANDAG 18 JANUARIE 2016
Lees eers Numeri 9:15-23
Bly of ry?
Op die bevel van die Here het hulle kamp opgeslaan en op sy bevel het hulle weggetrek (9:23).
GESELSVRAAG: Wanneer laas het jy lekker verdwaal?
“Die Israeliete het 40 veertig jaar lank in die woestyn rondgedwaal, in plaas van die 11 dae wat die reis normaalweg sou duur. Die rede was dat hul leier, Moses, ’n man was. En mans vra nie pad nie,” skerts ’n vrou nou die dag in ’n SMS aan die Afrikaanse radiosender. Dit was natuurlik nie die hele verhaal nie. Deesdae is dit maklik om jou GPS te vertel waarheen jy wil gaan en dan eenvoudig haar aanwysings te volg. Sy vertel jou selfs hoe laat jy daar sal aankom, soos jy nou vorder. Bowendien bly sy geduldig as jy verkeerd afdraai of ’n ompad kies.
Moses was nie regtig die leier van die Israeliete nie. Die Here was. Die wolk van sy teenwoordigheid het op die tabernakel gerus wanneer hulle moes bly en beweeg wanneer hulle moes verder gaan. Die volk het dus elke oggend eers na die wolk gekyk om te sien of hulle moet inpak en oppak. Soms het hulle net ’n nag op ’n plek geslaap en ander kere jare lank gebly. Die wolk het hulle gelei.
’n Mens wens soms dat die Here ons vandag nog so duidelik wou lei oor wat om te maak. Watter beroep moet ek kies? Waar moet ek gaan bly? Met wie moet ek trou? Moet ek hierdie werksaanbod aanvaar? Moet ek oorsee gaan werk?
GEBED: Here, lei my vandag in elke besluit wat ek moet neem. Ek verlang na u duidelike leiding.
Lees vanaand in Numeri 10:1-10 hoe die trompette vir die volk gesein het wat om te doen.
DINSDAG 19 JANUARIE 2016
Lees eers Numeri 10:11-24
Ordelik
Hulle het begin trek op bevel van die Here deur Moses (10:13).
GESELSVRAAG: Waarom is organisasie en orde belangrik?
“Kyk, as hierdie skip eers op spoed is, neem dit kilometers voor hy kan stop of omdraai. Sorg dus dat jy nie oorboord val nie,” waarsku die offisier die nuwe manskappe van ’n vliegdekskip. Dit vat baie krag om so ’n massa aan die beweeg te kry en net soveel energie om dit te stop of van rigting te laat verander.
Ons het vandag gelees hoekom die Israeliete in stamme georden is en op spesifieke plekke om die tabernakel moes kamp opslaan. Om so ’n groot trek van miljoene mense aan die beweeg te kry, is nie maklik nie. Dit kon ’n chaos afgee as dit nie ordelik geskied nie. Let op hoe ordelik hulle vertrek het, sodat die tabernakel reeds op die nuwe staanplek opgeslaan kon wees teen die tyd dat die Kehatiete met die gereedskap daar opgedaag het (vgl. v. 21).
“Elke ding het ’n plek en elke ding op sy plek,” leer ons mos ons kinders. Waar daar nie orde is nie, lyk ’n vertrek gou na ’n varkhok of rommelhoop. Kinders kan nie altyd verstaan waarom Mamma dan so op netheid aandring nie, totdat hulle hulle eie kinders moet leer. Kinders wat sonder dissipline grootword, besorg hul familie, skool en die samelewing in hul later jare hoofbrekens. “Buig ’n boompie terwyl hy nog jonk is,” sê die spreekwoord.
GEBED: Here, leer my om my lewe ook te orden, tot u eer. En help ons as ouers om ons kinders en kleinkinders so te leer.
Lees vanaand in Numeri 10:25-36 hoe Moses van ’n kundige gids gebruik gemaak het.
WOENSDAG 20 JANUARIE 2016
Lees eers Numeri 11:1-9
Die goeie ou dae
Ons onthou nog die vis wat ons in Egipte verniet kon eet, ook die komkommers, waatlemoene, prei, uie en knoffel (11:5).
GESELSVRAAG: