A Gosch wia schwärt. Wilhelm König
ion>
Wilhelm König
A Gosch wia schwärt
Saga
A Gosch wia schwärtCopyright © 1976, 2019 Wilhelm König und SAGA Egmont
1. Ebook-Auflage, 2019
Format: EPUB 2.0
Dieses Buch ist urheberrechtlich geschützt. Kopieren für gewerbliche und öffentliche Zwecke ist nur mit Zustimmung von SAGA Egmont gestattet.
SAGA Egmont www.saga-books.com und Lindhardt og Ringhof www.lrforlag.dk
– a part of Egmont www.egmont.com
gschwäddst mit fitz kusz
i woeß et
waa dees ischt
miad bee-e et
hongr hao-e koen
i ko saua
wia noh abbar
wenne wett no
keede beschtemmt
ao fliaga
abr i will et
i will garet
so hao naus
s dääbmr schao langa
wennes do honda noh
a weile aushalta keed
abr s siit et drnooch aus
i wiir miad
i friß schao ällas
waamr vor d gosch kommt
ond am liabschda geenge
gar nemme ussm haus
i woeß et
waa dees ischt
s oobst em kern vrfaualt
dussa vrreggad beem
em faß
goot dr mooscht omme
abr uff oemool
isch dees et komma
sisch midr zeit so komma
ond ets isch halt do ond so vill
dasses bald nemme
schlugga ko
Waa kommsch
Waa kommsch?
Wa witt?
Ets goosch ond holesch
waadr fäält
no kommsch ond nammsch
waade brauchsch
A Wält
Sisch a guata Wält
sisch a baesa Wält
abr sisch mei Wält
Isch koe guata Wält
isch a baesa Wält
ko-ase jo bessr macha
Wenne abr schaffa soll
muaße freile ao
abbas dsassat hao
Schwäbisch lärna
Oen noolao
oen uff saen Bladds noohogga lao
oen hogga lao oen noolao and
Schalthebl der Macht
bis dranoo oen lao
Beir Bolizei oen noolao
oen ozaega bei sälle
mos et wissa daffat
waama boosgat hot
Nohlao mitm Breis
No lao wennse gar niks
drfiar zaala wellat
wennse blooß mitr Hood
drenrommdalga wellat
Oen dro lao wennr sae Sach
räacht macht ond gmacht hot
oen no lao wennr bessr ischt
odr blooß domm rausschwäddst
a Bild an dr Wood
a alta Dabeet dro lao
a Regiirong an Schultes
s Weib am Häard
Oen wäggdua
an guata Epfl an Zäamarkschae
vom groaßa Haufa namma
Oone oen nia gao
oone oena oone oes
oone Schirm oone Daschamässr
oone Personalausweis
oone druffdsguggat
wäar sischt waa sischt
Et annen nookomma
et no komma wenn
ällas dschboot ischt
Nooheeba s Broot
an Briggl Floesch oen
no heeba wennr zuaschnabbt
dassr nemme beißa ko
En dannr Schbrooch
Ettafall schtoot
en dannr Schbrooch
ao et mae ond et wenigr uffm Schbiil
als en jedr andra Schbrooch
ettafall bees
äwwl blooß i
Sisch et wäaga damm
sisch wäagade Leit
wäaga sällam
keebmas gao lao.
Gluschda
I haerde i Siide
i schmeggde
dees muaßdr langa solangde
noh et zaala ko
Aescht wenne
mei Gäld kriag
firs Senga vorde Leit
am nägschda Aeschda
uffdr nägschd Leich
beir nägschd Haozich
No reegde oo
ond no haerde ao
no siide
no schmeggde
Abr et
Omasonscht
Äarnt - Oefach
So koma d Epfl ao raadua
ma säagat da Boom
oefach omm ond liist
d Epfl vom Booda auf
D Kiischa frissma
schao uffdr Loedr
blooß wenns ausgeit
vrkaofma a baar Grädda
Abr et weilma abbas
vrdäana wett drmit
halt damma nochr