Uit die Beek 2015. Attie van Wijk
daardie geval wil ek jou kom dien,” was haar antwoord.
Niemand kan hulleself vrykoop van die mag van sonde nie. Maar Jesus het ons met sy bloed vrygekoop sodat ons waarlik vry kan wees (vgl Joh 8:36).
Dawid was gedurig in ’n stryd, soos ons uit baie van sy psalms kan aflei. Maar te midde van elke dag se stryd het sy geloof hom gedra. Hy het geweet dat die Here hom vrygemaak het. Daarom wou hy hom aan die Here oorgee.
Vandag wil die Here jou herinner dat Hy jou waarlik vrygemaak het. Jy kan vandag gaan waar jy wil en doen wat jy wil. Maar as jy besef wat dit vir Hom gekos het, dan wil jy nie meer jou eie wil doen nie. Jy wil doen wat Hy wil hê. Jy gee jou aan Hom oor sodat Hy jou kan gebruik – ook om ander mense te seën en na Hom toe te lei.
GEBED: Ek gee my aan U oor, omdat U my vrygemaak het.
Lees vanaand in Psalm 31:10-19 hoe Dawid se depressie en moedeloosheid plek maak vir blydskap en vertroue.
Maandag 2 Maart 2105 • Lees eers 1 Samuel 3:10 – 4:1a
Betroubare boodskapper
Die hele Israel van noord tot suid het gemerk dat Samuel betroubaar was as profeet van die Here (3:20).
GESELSVRAAG:
Wat sou jy graag oor die toekoms wou weet?
“As ons sien dat ’n leier verkeerd optree, mag ons hom of haar nie langer navolg nie. Kinders van die Here moet anders wees.” Samuel het die voorreg gehad om in die regte kringe te beweeg. Die tempel was natuurlik nog nie in Jerusalem gebou nie. Die huis van die Here waarvan hier sprake is, is die tabernakel, wat in Silo gestaan het. Samuel kon sien wat Eli reg doen, maar ook wat hy verkeerd doen. Hy moes self besluit watter voorbeeld hy wou volg.
Die Here het Hom aan Samuel geopenbaar en gesê: “Ek gaan ’n ding in Israel doen wat elkeen wat daarvan hoor, se twee ore sal laat tuit” (vgl v 11). Hy het hom toe vertel hoe Eli en sy seuns gestraf sou word. Samuel het hierdie boodskap aan Eli oorgedra. Al hoe meer mense het hom begin raadpleeg. Hulle het bewus geword dat God deur Samuel praat. Hy het reguit gepraat, al maak dit seer.
Is dit nie die soort leiers wat ons in hierdie tyd nodig het nie? Ons het mense nodig wat na God luister en wat God se wil aan ander kan verduidelik. Wag ’n bietjie, ek en jy is ook mos leiers, al is dit net in ons eie huisgesin. Die feit dat jy vandag hierdie stukkie lees, wys dat jy ook na God se wil soek. Jy wil die regte leiding gee. Is jy gewillig om meer tyd saam met God deur te bring, sodat jy kan leer om sy stem te ken?
GEBED: Here, help my om elke dag u wil te hoor en te doen.
Lees vanaand in 1 Samuel 4:1b-11 hoe die planne van die Israeliete geboemerang het.
Dinsdag 3 Maart 2105 • Lees eers 1 Samuel 4:12-22
Was God afwesig?
Die eer is weggevat uit Israel (4:21).
GESELSVRAAG:
Oor wat in ons land is jy dankbaar?
“Waar was God dat Hy toegelaat het dat so ’n ramp ons skool tref?” het ouers gevra nadat kinders by die skool vermoor is. Die antwoord wat iemand daarop gegee het, was: “God word mos nie meer by die skole toegelaat nie. Sy Woord mag nie meer daar gelees word nie. Daar word nie meer gebid nie. Hy is ’n ware heer. As Hy nie welkom is nie, staan Hy opsy.” En dan sien ons wat gebeur as God nie meer in ons land is nie.
Die ark is uit die Allerheiligste gehaal om as gelukbringer in die oorlog te dien. God is nie daar om gebruik te word nie. Hy het dus toegelaat dat die simbool van sy teenwoordigheid in die hande van die vyand val. Die Filistyne het gejuig omdat hul afgod sterker was as die God van Israel – of so het hulle gedink. Hulle sou nog die swaar les leer dat God nie iemand is om mee te speel nie, soos ons verder aan sal lees.
Die nuus oor die ramp het die hele stad in oproer gehad. Dit het later ook by Eli uitgekom. Dat sy seuns dood was, het hy verwag sedert hy die Here se boodskap by herhaling gehoor het. Maar die groot ramp was dat die ark geroof was. Die heiligdom was leeg. Waar sou hulle weer ’n ark kry? Ontsteld het hy agteroor geval en sy nek gebreek. En Pinehas se vrou skenk die lewe aan Ikabod en sterf self. Maar God was steeds in beheer.
GEBED: Dankie dat U ons nooit sal verlaat nie, Here.
Lees vanaand in 1 Samuel 5:1-7 hoe die Filistyne leer dat God sterker is as enige afgod.
Woensdag 4 Maart 2105 • Lees eers 1 Samuel 5:8-12
Paniek
Hulle het die ark van die God van Israel na ons toe gebring om ons en ons mense dood te maak (5:10).
GESELSVRAAG:
Wanneer raak mense paniekerig?
“In tye van krisis sal die onkundiges nie paniekbevange raak nie, want hulle weet nie wat aangaan nie. Later raak hulle paniekbevange omdat hulle nie weet wat aangaan nie,” het Jarod Kintz geskryf.
Dit klink nogal baie na wat die Filistyne hiér ervaar het. Eers was hulle bly dat hulle die ark buitgemaak het, maar toe hulle sien wat gebeur, het hulle paniekbevange geraak. Oral waar die ark gekom het, het dit die dood gebring. Baie gou wou niemand die ark in hul dorp hê nie (vgl v 7). Eers wou hulle die ark bloot wegkry van hul afgod Dagon, want dit het skade aan die beeld veroorsaak. Maar toe ontdek hulle dat die ramp versprei na elke plek waar die ark kom. Blykbaar het muise ook iets te doen gehad met die verspreiding van die pes, want ’n mens lees later dat hulle goue muise saam met die ark teruggestuur het.
Dit is jammer dat die Filistyne nie tot bekering en oorgawe gekom het toe hulle die krag van Israel se God begin ervaar het nie. Elke keer as mense hulle rug vir God draai, is dit tot hul eie nadeel. In feitlik elke land sien ons dat misdaad en ekonomiese rampe oorneem, en dit is opmerklik dat dit saamgaan met die verwerping van die God van die Bybel. Sonder God beteken sonder hoop. Sonder God is daar rede om paniekerig te raak.
GEBED: Here, ek vlug na U toe. Dit is net U wat ons kan red.
Lees vanaand in 1 Samuel 6:1-12 hoe die Filistyne finaal oortuig is dat God agter die rampe was wat hulle getref het.
Donderdag 5 Maart 2105 • Lees eers 1 Samuel 6:13-7:1
Respek vir God
Wie kan bestaan in die teenwoordigheid van die Here, hierdie heilige God? (6:20).
GESELSVRAAG:
Hoe verskil die Here van die ander gode?
“Van nuuskierigheid is die kat dood,” sou ’n letterlike vertaling van die spreekwoord lui. Ek weet nie van die kat nie, maar dit was wel waar van 70 manne van Bet-Semes, wat die ark mooi bekyk en waarskynlik selfs die deksel afgehaal het om te kyk wat daarin is. (Sommige mense wonder vandag of die inhoud van die ark nie dalk radioaktief was nie.) Hulle moes die groot les leer dat God niemand se speelmaat is nie. Ons moet Hom alleen met die grootste respek benader.
Die Filistyne het waarskynlik gereken hulle kan die ark hou en ’n losprys van die Israeliete eis om dit terug te kry. Maar nou was dit hulle wat die losprys betaal het om tog net van die ark ontslae te raak. Toe hulle sien wat in Bet-Semes gebeur, was hulle oortuig dat hulle die regte besluit geneem het om die ark terug te stuur. Al die bewyse was daar dat God in beheer was en dat Hy sterker was as Dagon of enige ander god.
Ons kry dikwels seer as ons hoor met hoe min respek mense van God praat. Dit lyk asof ongelowiges God uitdaag om iets aan hulle te doen. Hulle het geen agting of vrees vir die Almagtige nie. Maar dit kan ook wees dat selfs gelowiges soms vergeet wie God is. Hy is wel ons Vader, maar nie ons bediende nie. Ons eer Hom deur Hom te gehoorsaam.
GEBED: Vader, ons buig voor U neer. Vergewe al ons sondes.
Lees vanaand in 1 Samuel 7:2-8 hoe daar ’n herlewing in Samuel se tyd gekom het.
Vrydag 6 Maart 2015 • Lees eers 1 Samuel 7:9-17
Waarheen is God met jou op pad?
Hy het die plek Eben-Haeser genoem, “want,” het hy gesê, “tot nou toe het die