Uit die Beek 2016. Attie van Wijk
nasionale sport in Suid-Afrika is kla,” merk iemand op toe iemand weer gal afgaan oor hoe sleg dinge nou in ons land is. Ons vergeet geriefshalwe van die baie dinge wat wel verbeter het. Al die onluste en gewelddadige betogings wys ons dat nie net ons krities is nie. Eintlik is ons niks beter as die Israeliete in Moses se tyd nie.
Die fortuinsoekers wat saam met Israel getrek het, was die eerste om te kla (vgl. v. 4). Dit was hoogs aansteeklik. Dit was nie lank nie of die hele volk is opgesweep en vol kritiek teenoor die leiers en die Here. Die manna en die water wat die Here so wonderbaarlik voorsien het, was nie meer goed genoeg nie. Hoe meer jy het, hoe meer wil jy hê. Nou begin hulle kieskeurig word. Hulle vertrou nie meer die Here nie, maar vergeet hoe sleg dit met hulle in Egipte gegaan het! Die gevolg was dat hulle op die ou end glad nie die beloofde land kon ingaan nie.
“Die geheim van geluk is dankbaarheid,” lees ek. Ons moet dus waak teen afguns en jaloesie. Vergeet van die weelde waarin ander leef. Sulke weelde kan jou uit die hemel hou (vgl. Matt 19:24).
GEBED: Here, vergewe my my selfsug. U weet wat vir my die beste is. Ek vertrou U ten volle.
Lees vanaand in Numeri 11:10-20 hoe selfs Moses wou tou opgooi en hoe die Here die verantwoordelikheid verdeel.
DONDERDAG 21 JANUARIE 2016
Lees eers Numeri 11:21-30
Toegeruste leiers
Ek sou wou wens dat die hele volk van die Here profete was, en dat Hy sy Gees op almal mag lê (11:29).
GESELSVRAAG: Watter soort leiers het ons nodig?
“Hy sê vir elke groep wat hy toespreek presies wat hulle graag wil hoor, al weerspreek hy homself daardeur,” merk iemand op oor ’n bekende politieke leier. “Volg my, ek is reg agter julle,” is blykbaar sy wekroep. Hy soek gewildheid, maar is nie beginselvas nie. Hy het nie ’n antwoord op die praktiese probleme van ons land nie. Hy self stel ook nie juis ’n goeie voorbeeld nie.
Moses het besef dat hy alleen nie die volk in daardie moeilike en onseker tyd kon lei nie. Die Here het dus vir hom 70 manne uit die verskillende stamme uitgesoek om hom by te staan en die verantwoordelikheid te help deel. Hulle sou die parlement van daardie tyd wees. Hoe bewerkstellig ’n mens egter eenheid in so ’n uiteenlopende groep mense? Die Here se antwoord was om al 70 met die Heilige Gees te vervul. Ons lees dat hulle geprofeteer het. Dit is nie duidelik presies wat dit beteken nie. Sommige verklaarders meen dat hulle in vreemde tale gepraat het, soos by die Pinkstergebeure in Handelinge 2.
As die Heilige Gees elke parlementslid vervul, sou ons ’n groot mate van eenheid ervaar. Daarom moet ons bid dat die Here sy regte plek ook in ons parlement sal inneem.
GEBED: Here, vervul en verander elke parlementslid deur u Gees. U weet mos wat vir ons land die beste is.
Lees vanaand in Numeri 11:31-35 hoe die Here die volk met oorvloedige vleis geseën en gestraf het.
VRYDAG 22 JANUARIE 2016
Lees eers Numeri 12:1-9
Goeie kommunikasie
Met hóm praat Ek direk en persoonlik, nie in raaisels nie (12:8).
GESELSVRAAG: Hoe ontwikkel ’n mens ’n persoonlike verhouding met God?
“Die Here het vir my gesê dat ek dié brief vir daardie leier moet skryf, dominee,” vertel die deftige dame. “Sal u dit asseblief deurlees en kyk of dit reg is?” “Tannie, as die Here dit vir jou gesê het, mag ek mos niks daaraan verander nie,” was sy antwoord. Baie mense is lief om te sê: “Die Here het vir my gesê …” maar as jy hulle vra hoe Hy dit gedoen het, raak die antwoorde gou ’n bietjie vaag.
Moses se ouboet en ousus het aanstoot geneem aan die gesag waarmee hul kleinboet gepraat het, al was hy nou reeds diep in die 80. Hulle wou ook as leiers erken word. Die Here roep hulle dus na die tent van ontmoeting (dit het buite die laer gestaan – dit was nog nie die tabernakel nie). Daar gee die Here toe vir Moses ’n pragtige getuigskrif. Hy is die betroubaarste. Hy is die sagmoedigste. Hy het ’n persoonlike verhouding met God.
Sal die Here ook aan my en jou hierdie getuigskrif kan gee? Het ons werklik ’n persoonlike, lewende verhouding met God, of is dit net vormgodsdiens? Dit maak nie saak wat die mense dink nie. Wat saak maak, is wat God dink. Hy weet nie net wat ons dink, sê en doen nie. Hy ken ook ons motiewe agter elke daad. Dié is dikwels selfsugtig.
GEBED: Here, ek verlang na ’n persoonlike verhouding met U. Wys my wat ek moet doen sodat U my kan verander.
Lees vanaand in Numeri 12:10-16 hoe Miriam en Aaron finaal oortuig is dat Moses anders as hulle was.
SATERDAG 23 JANUARIE 2016
Lees eers Numeri 13:1-16
Inligting
Stuur manne om Kanaän, wat Ek aan die Israeliete sal gee, te verken (13:2).
GESELSVRAAG: Waaroor het jy meer inligting nodig?
“Wat jy nie meet nie, kan jy nie weet nie,” is ’n beginsel wat by elke maatskappy ingedril word. Met behulp van rekenaars word fyn dopgehou hoe elke afdeling van die werk vorder. Slim mense praat selfs van die “inligtingsrevolusie”. Net soos die industriële revolusie die wêreld verander het, het rekenaars dit nou weer gedoen. Baie beroepe van vandag het ’n paar jaar gelede nie eens bestaan nie. Rekenaars speel oral ’n belangrike rol – tot in die enjins van nuwe motors.
Moses moes navorsing doen om te weet presies wat vir hulle in die beloofde land voorlê. Daarom was die 12 verkenners baie nodig om vas te stel wat die uitdagings is wat op hulle wag. Eers wanneer hulle die feite voor hulle het, kan hulle behoorlik beplan hoe om die uitdagings die hoof te bied. Die verkenners was dus nie onkundige mense nie. Hulle was leiers. Hulle het geweet waarvoor om op die uitkyk te wees.
Sommige van ons lewe nog in die “BC”-tyd (Before Computers). Met behulp van die nuwe tegnologie en die internet het ’n nuwe wêreld egter vir die meeste van ons oopgegaan. Ons kan gou enige inligting op die internet naslaan. Ons kan kursusse oor die internet volg. Wat wil jy weet?
GEBED: Here, help my om my geleenthede reg te benut.
Lees vanaand in Numeri 13:17-25 wat die verkenners se opdragte was en wat hulle gesien het.
SONDAG 24 JANUARIE 2016
Lees eers Psalm 78:32-39
Onegte toewyding
Maar hulle was vals teenoor Hom, hulle was nie opreg in wat hulle gesê het nie (78:36).
GESELSVRAAG: Hoe wil ons die Here vandag dien?
“Ek kan nie julle wit mense verstaan nie,” merk ’n swart man in Namibië op, “julle hoor elke Sondag in jul kerk dat julle jul naaste moet liefhê. Tog sien ons dit glad nie in jul lewe nie.” Oeps! Kan dit waar wees? Hoekom verander die evangelie dan nie die manier waarop ons as gelowiges optree nie? Dan is daar mos iewers groot fout.
Asaf se psalm verwys na die gebeurtenisse waarvan ons hierdie week in Numeri gelees het. Elke keer as die een of ander ramp hulle getref het, het hulle hulle bekeer. Tog was dit nie opreg nie. Nie lank nie of hulle het maar weer die ou paaie bewandel. Ek dink as ons ons in die Here se plek sou stel, sou ons lankal tou opgegooi het. Daar is geen salf te smeer aan hierdie soort mense nie.
Is ons nie maar presies dieselfde nie? Dink daaraan hoe ons almal die Here elke dag ook teleurstel. Ons dop gereeld die toets nadat ons ’n nuwe les by die Here geleer het. Ons moet onthou dat ons getoets gaan word nadat die Here met ons gepraat het, soos vandag daar by die kerk. Ons geloof moet in die praktyk blyk. Kom ons gaan dus in die verwagting dat iets in ons gaan verander.
GEBED: Here, vergewe my dat ek U so dikwels teleurstel. Laat u Gees my lei om hierdie week se toetse te slaag.
Lees