Uit die Beek 2016. Attie van Wijk
die Here ons help om die geleentheid in elke krisis raak te sien, om nie te skrik vir teenstand nie, maar om juis in sulke omstandighede uit te reik na mense wat Hom nog nie ken nie.
GEBED: Here, die krisisse van dié week voel vir my te groot om te dra. Hou my styf vas en dra my daardeur, tot u eer.
Lees vanaand in Psalm 79:6-13 hoe Asaf verwag dat die Here se kinders uiteindelik van sy getrouheid sal getuig.
MAANDAG 8 FEBRUARIE 2016
Lees eers Numeri 20:1-13
Gehoorsaamheid!
Omdat julle My nie erken het en My, die Heilige, nie voor die Israeliete gehoorsaam was nie, sal julle hierdie volk nie inlei in die land wat Ek aan hulle gee nie (20:12).
GESELSVRAAG: Wanneer was dit swaar om die Here te gehoorsaam?
“My probleem is nie met die dele van die Bybel wat ek nie verstaan nie; my probleem is die dele wat ek wel baie goed verstaan,” het die Amerikaanse skrywer Mark Twain geskryf. Ons verlang dikwels dat die Here duidelik met ons sal praat, maar vergeet dat Hy dan stiptelike gehoorsaamheid van ons verwag. Sy Tien Gebooie is nie maar net die Tien Wenke nie; Hy verwag gehoorsaamheid.
Te midde van die soveelste krisis gaan Moses en Aäron op hul knieë om die Here te vra wat om nou te doen. Die volk het dringend water nodig – en sommer baie ook. Die Here sê hulle moet met ’n sekere rots praat, en Hy sal dan die water bonatuurlik voorsien. Die sagmoedige Moses was egter op daardie oomblik so kwaad dat hy die rots twee maal met sy kierie slaan. Dit is verstaanbaar, maar dit het veroorsaak dat hy nie self die beloofde land kon binnegaan nie.
Dink ’n bietjie terug aan die afgelope week. Wat het jy gedoen – of nie gedoen nie – hoewel jy geweet het wat die regte ding was om te doen? Dit kan moontlik tot gevolg hê dat jy ’n wonderlike avontuur saam met die Here misgeloop het.
GEBED: Here, U ken my deur en deur. Vergewe my my ongehoorsaamheid en help my om hierdie week saam met U te geniet.
Lees vanaand in Numeri 20:14-21 hoe die afstammelinge van Esau geweier het om die afstammelinge van Jakob te help.
DINSDAG 9 FEBRUARIE 2016
Lees eers Numeri 20:22-29
Opvolging
Die tyd het gekom dat Aäron moet sterf (20:24).
GESELSVRAAG: Wil jy vooraf weet wanneer jy gaan sterf? Verduidelik.
“Jy moet ’n plan maak met daardie hoop ou ysters onder die stoep en die hoop planke en balke in die motorhuis. Wat gaan ek eendag daarmee doen as jy iets moet oorkom?” vra Wena. Ek probeer verduidelik dat dit die kinders se probleem is. Met al vyf kinders wat nou oorsee werk, is die kanse maar gering dat hulle sal kan help. Ai, dis moeilik om vir jou eie afsterwe te beplan! Veral as jy nog so goed voel.
Aäron het die nuus gekry dat hy aan die einde van sy pad gekom het. Hy moes saam met Moses teen Horberg uitklim. Daar moes Moses Aäron se klere vir dié se seun Eleasar aantrek. Daarna sou Aäron sterf. (Van die koue?) So het dit gebeur dat die hoëpriesterskap aan Eleasar oorgegee is. Die werk sou voortduur totdat Jesus op die toneel verskyn. Die brief aan die Hebreërs verduidelik dat Jesus se hoëpriesterskap nie oordraagbaar is nie: “Omdat Jesus vir ewig bly, beklee Hý ’n priesterskap wat nie op ’n ander oorgedra word nie” (Heb 7:23-24). Jesus leef vir altyd om vir ons in te tree.
Ons ander moet maar self vir ons oorgang voorberei. Elkeen moet seker maak dat sy testament in orde is en dat die naasbestaandes weet waar of by wie dit is. Anders sal hulle groot probleme ondervind. Selfs ’n eenvoudige testament het baie wetlike implikasies.
GEBED: Here, dankie dat my laaste oorgang veilig in u hande is.
Lees vanaand in Numeri 21:1-3 hoe die Here ’n oortuigende oorwinning aan Israel gegee het.
WOENSDAG 10 FEBRUARIE 2016
Lees eers Numeri 21:4-9
Aswoensdag
Simbool van verlossing
Maak ’n beeld van ’n giftige slang en sit dit op ’n paal. Elkeen wat gepik is en daarna opkyk, sal lewe (21:8).
GESELSVRAAG: Aan wie laat die slang op die paal jou dink?
“Baie kerke vier vandag Aswoensdag. Dit is die begin van die 40 dae vastyd voor Goeie Vrydag. Eintlik is dit 46 dae voor Goeie Vrydag, want die Sondae tel nie vir die vastyd (Lent) nie,” verduidelik die skooljuffrou aan die leerders. Dit is tradisioneel ’n dag van sondebelydenis, selfondersoek en selfverloëning. Die priesters merk elke gelowige met ’n kruis van as op die voorkop.
Dit pas dus mooi by vandag se Skriflesing. Die volk het al weer gekla oor die kos. Die Here het hierdie keer nie ander kos voorsien nie, maar giftige slange tussen die mense ingestuur. Toe hulle hul sonde voor die Here en Moses bely, het die Here vir Moses gesê wat hy kon doen om die probleem op te los (vgl. v. 7-8). Hy het ’n koperslang gemaak en elkeen wat daarna kyk, het gesond geword. Moses se koperslang is later as ’n afgod vereer en moes vernietig word (vgl. 2 Kon 18:4).
Die eintlike boodskap van die slang is eers eeue later deur Jesus aan Nikodemus verduidelik: “Moses het die slang in die woestyn hoog op ’n paal gesit; so moet die Seun van die mens verhoog word, sodat elkeen wat in Hom glo, die ewige lewe kan hê” (Joh 3:14-15).
GEBED: Here Jesus, dankie dat U gewillig was om ter wille van my sondes aan ’n kruis gespyker te word. Vergewe my al my sondes.
Lees vanaand in Numeri 21:10-20 hoe die Israeliete al nader na die beloofde land getrek het.
DONDERDAG 11 FEBRUARIE 2016
Lees eers Numeri 21:21-26
Die beloftes word vervul
Die Israeliete het al die stede van die Amoriete verower en daarin gaan woon, ook in Gesbon en al sy buitedorpe (21:25).
GESELSVRAAG: Watter uitdaging lê hierdie maand vir jou voor?
“Wanneer die nag op sy donkerste is, is dit net voor die dag begin breek,” herinner ’n vriend my. Ons ken almal tye dat ons op die punt was om tou op te gooi. Tog gee wenners nie bes nie. Byt vas – die uitkoms is op pad. Dit was ook die ervaring van die Israeliete aan die einde van die 40 jaar wat hulle in die woestyn moes rondswerf.
Nadat die Edomiete vir Israel deurgang geweier het, was daar net een pad na die beloofde land: deur die grondgebied van die Amoriete. Die Amoriete het reeds ’n reeks oorwinnings op hul kerfstok gehad en het Israel vol bravade sonder meer aangeval. Die gevolg was dat die Here die oorwinning aan die Israeliete gegee het. Hulle kon dus die dorpe en landgebied van die Amoriete beset. Dit het later die erfdeel van sommige stamme geword (vgl. Num 32:1-5).
Wanneer ’n mens God se wil ten volle wil gehoorsaam, kan jy baie teenstand verwag. Dit voel later asof dit nie die moeite werd is nie. God gebruik elke uitdaging om ons te versterk en te vorm. Juis wanneer dit lyk asof daar geen uitkoms meer is nie, dan gebeur die wonder. God ken elkeen van sy kinders en weet hoe swak ons is. Daarom sorg Hy dat ons nie bo ons kragte versoek en beproef word nie (vgl. 1 Kor 10:13).
GEBED: Here, U ken al my swakhede. Dra my deur hierdie week se uitdagings en gee U die oorwinnings wat nodig is.
Lees vanaand in Numeri 21:27-35 hoe die Here die volgende oorwinning aan die Israeliete gegee het.
VRYDAG 12 FEBRUARIE 2016
Lees eers Numeri 22:1-12
Verkeerde maats
Moenie met hulle saamgaan nie (22:12).
GESELSVRAAG: Watter soort mense lei ’n mens verkeerd?
“Watter voordeel hou dit vir my in?” is die