Uit die Beek 2016. Attie van Wijk
nie eens aan Hom nie. Vormgodsdiens tel nie vir Hom nie. Hy soek egte aanbidding. Ons moet ’n ware ontmoeting met Hom hê.
Wat verwag jy van vandag se erediens? Seker dat ons gaan sing en dat die dominee sal bid en ’n stigtelike woord sal spreek. Dan sal ons uitgaan en met mekaar oor die weer en die sport gesels. Ons het ons plig gedoen. Sê nou ons kon vandag ’n ware ontmoeting met God hê. Elke keer as mense in die Bybel so ’n ontmoeting het, is hul eerste gewaarwording ’n groot sondebesef. God is so totaal heilig. Hulle val op hul knieë of selfs plat op die grond in aanbidding. Dán verander hul lewe radikaal. Verlang jy vandag na ’n ware ontmoeting met God? Is jy gewillig daarvoor?
GEBED: Here, ek bid vandag vir elkeen wat klaarmaak om kerk toe te gaan, dat ons van u magtige teenwoordigheid bewus sal wees.
Lees vanaand in Psalm 81:12-17 hoe God verlang dat sy volk Hom moet vertrou en volg.
MAANDAG 22 FEBRUARIE 2016
Lees eers Numeri 26:52-65
God hou sy beloftes
Nie een van húlle het toe oorgebly nie, behalwe Kaleb seun van Jefunne, en Josua seun van Nun (26:65).
GESELSVRAAG: Noem ’n belofte van God met ’n voorwaarde.
“As jy mooi luister, hard leer en jou huiswerk getrou doen, sal jy maklik in die eksamen slaag. As jy dit nie doen nie, sal jy jou jaar moet herhaal.” Dit is ongelukkig nie meer waar nie. Kinders word sommer deurgesit sonder die nodige prestasie. Die gevolg is kinders in matriek wat nie behoorlik kan lees nie. Wat help dit tog?
Dit was nou die tweede keer dat die volk Israel by die grens van die beloofde land gekom het. Die eerste keer het hulle in opstand gekom. Hulle het die Here nie vertrou nie. Op Moses se gebed is hulle vergewe, maar geeneen van hulle sou in die beloofde land gaan woon nie, behalwe Kaleb en Josua (vgl. Num 14:20-24). Dit was presies wat 38 jaar later gebeur het. Toe die volk weer getel word, was daar nie een oor wat uit Egipte getrek het nie, behalwe Kaleb en Josua.
Ons moet onthou dat God se getrouheid in twee rigtings werk. Hy hou sy beloftes, ook die beloftes van straf as ons ongehoorsaam is. Ons kan dus nie doen wat ons wil en verwag dat Hy soos Kersvader alles oor die hoof sal sien nie. Kyk mooi: Aan God se beloftes is gewoonlik ’n voorwaarde gekoppel. Jesus red, as ons glo (vgl. Joh 3:16, 18). Die egtheid van ons geloof word aan ons gehoorsaamheid gemeet.
GEBED: Here, help my om u Woord reg te lees en te verstaan watter opdragte aan elke belofte gekoppel is. Hou my getrou.
Lees vanaand in Numeri 27:1-11 hoe dogters dieselfde erfreg as seuns gekry het.
DINSDAG 23 FEBRUARIE 2016
Lees eers Numeri 27:12-23
Opvolger
Dan moet U … iemand oor hierdie volk aanstel wat vir hulle ’n leier en aanvoerder kan wees (27:16-17).
GESELSVRAAG: Hoe kies ons ons leiers?
“Dit is opmerklik dat feitlik elke leier in die Bybel wat goed begin het, in hul later jare ernstige foute gemaak het,” skryf iemand op die internet. Hy verwys dan na Noag, Moses, Saul, Dawid en Salomo. Ons kan maklik aan nog voorbeelde dink. Hulle almal het goed begin, maar hulle het onder ’n wolk geëindig. Hulle was nie volmaak nie. Sommige mense voel dat dit ’n bewys is dat die Bybel waar is – die helde se swakhede word nie toegesmeer nie. As jy dus vandag op ’n hoogtepunt is, moet jy baie versigtig wees – jy kan maklik die toets op ’n kritieke oomblik dop.
Moses – die sagmoedigste mens op aarde – het sy toets gedop deur sy humeur te verloor (vgl. Num 20:1-13). Nou sou hy die land net van ver af sien voordat hy sterf. Hy vra toe vir ’n opvolger wat geskik sou wees. Josua was ’n beproefde en Geesvervulde leier (vgl. v. 18). God wys hom dus aan.
Ons verlang almal na ’n leier soos Josua na wie ons kan opsien en vir wie ons met trots kan volg. Ons het sulke leiers met integriteit nodig in die regering, in die sakewêreld, in die opvoeding, in die mediese dienste en in die kerk. Nietemin is elkeen van ons ook ’n leier, al is dit net van ons eie kinders. Kom ons wees self so iemand.
GEBED: Here, maak my ook iemand wat U gehoorsaam volg en wat die regte leiding aan ander kan gee.
Lees vanaand in Numeri 28:1-10 hoe die daaglikse offers die teken moes wees dat God met die volk is.
WOENSDAG 24 FEBRUARIE 2016
Lees eers Numeri 28:11-25
Gewyde volksfees
Ook op die sewende dag moet daar vir julle ’n gewyde byeenkoms wees, dan mag julle geen gewone werk doen nie (28:25).
GESELSVRAAG: Watter vakansiedae word aan die Here gewy?
“Die woord holiday kom eintlik van die woorde holy day af. Aanvanklik was net die geestelike feeste openbare vakansiedae,” vertel ’n professor. Min van ons dink deesdae aan ’n gewyde dag as ons een van ons openbare vakansiedae geniet – selfs die Paasnaweek en Kersfees het in groot mate hul oorspronklike betekenis verloor.
Vir Israel was daar twee dinge wat die volk moes herinner dat God met hulle was. Die een was die daaglikse offers aan die Here en die ander die gereelde feesdae. Die Sabbat was die weeklikse rusdag wat aan die Here gewy moes word, maar daar was ook vyf groot feeste: die Paasfees, wat gevolg is deur die Fees van Ongesuurde Brode; die Oesfees, oftewel die Pinksterfees; die Fees van die Trompette of Ramshorings; die Groot Versoendag; en die Huttefees (vgl. Lev 23).
Ons hoef natuurlik nie meer al hierdie feeste te hou nie. Hulle was maar net ’n skaduwee wat na die koms van Christus gewys het (vgl. Kol 2:16-17). Vir Christene is die Paasfees daar om ons te herinner aan die kruisdood van Christus en die Pinksterfees om ons te herinner aan die uitstorting van die Heilige Gees. Kersfees is nooit in Bybelse tye as godsdienstige fees gevier nie.
GEBED: Here, elke dag saam met U is ’n fees. Wys my hoe ek u hart kan bly maak deur die feeste wat ons vier.
Lees vanaand in Numeri 28:26-31 hoe die Fees van die Weke (die Oesfees) op die Paasfees gevolg het.
DONDERDAG 25 FEBRUARIE 2016
Lees eers Numeri 29:1-11
Nuwejaarsviering
Dit is ’n dag vol feesvreugde vir julle (29:1).
GESELSVRAAG: Hoe vier ons ons Nuwejaarsdag?
“Oupa, kan ons vannag na die middernagdiens toe gaan en daarna ook na die strand?” vra ons kleinkinders. Hulle weet al dat daar elke jaar ’n groot vuurwerkvertoning op die strand is om die nuwe jaar te verwelkom. Ongelukkig is daar elke jaar mense wat nie eens vir die nuwe jaar wag om hul klappers en vuurpyle af te skiet nie. Dít is vir die honde ’n nag van verskrikking.
Die Israeliete se Nuwejaarsvierings was op die eerste dag van hul sewende maand, Tishri. Die vierings is ingelui deur die blaas van ramshorings (sommige vertalings praat van trompette). Dit is met groot vreugde gevier. Dit was ’n dag van toewyding en danksegging deur offers vir die Here te bring. Die sewende maand was vol feeste. Die Groot Versoendag en die Huttefees is ook in daardie maand gevier. Die Joodse datums verskil van ons s’n omdat hulle volgens maanmaande werk wat dus elke jaar verskil. (Die Joodse Nuwejaar is vanjaar van 2 tot 4 Oktober. Hulle noem dit Rosh Hashanah.)
Hoe kan ons óns Nuwejaarsvierings verander om God sy regte plek te gee? Ongelukkig het die ou drankduiwel dié dag gekaap. Jy kan gerus met jou Joodse vriend gesels om te hoor hoe hulle dit vier, of dit op die internet soek.
GEBED: Here, leer ons om elke feesdag ook u dag te maak en om U te verheerlik.
Lees vanaand in Numeri 29:12-25 hoe die Huttefees in daardie tyd gevier is. Hoe vier ons ons bevryding van sondebande?
VRYDAG 26 FEBRUARIE 2016
Lees