Uit die Beek 2016. Attie van Wijk
nie. Hulle was so dankbaar dat hulle al die goud wat hulle gebuit het, aan die Here gewy het. Dit het amper 200 kg geweeg! Hulle het dit met vreugde gebring, want God het ’n blymoedige gewer lief (vgl. 2 Kor 9:7). Ook die soldate het hul buit gedeel met dié wat agtergebly het, en albei groepe het ’n deel aan die Leviete gegee. Dankbare gelowiges gee graag aan die Here se werk. Is jy een van hulle?
GEBED: Here, vergewe asseblief my selfsug. Maak my opreg dankbaar en wys my hoe ek u werk kan ondersteun.
Lees vanaand in Numeri 32:1-19 hoekom die veeboere gevra het om hul erfdeel aan die oostekant van die Jordaan te kry.
WOENSDAG 2 MAART 2016
Lees eers Numeri 32:20-27
Verantwoordelik vir mekaar
Bou gerus die stede vir julle gesinne en die krale vir julle kleinvee, maar doen wat julle gesê het (32:24).
GESELSVRAAG: Wat sal die eenheid in ons dorp bevorder?
“’n Mens is ’n mens deur mense,” is ’n bekende spreuk in Afrika. Dit beteken dat ons almal mekaar nodig het. “As ’n boom se tak afgesaag word, sal dit sterf.” “Medemenslikheid is belangrik vir ’n gesonde nasie.” “Kinders word deur die hele dorp grootgemaak.” Dit is heel anders as die moderne stadslewe waar jy dikwels nie weet wie in die woonstel of huis langs jou woon nie. Die moderne mens bestee meer tyd aan tegnologie as aan regte mense. Is dit gesond vir ’n gemeenskap?
Moses was baie ontsteld toe twee stamme vra om oorkant die Jordaan te erf. Hy was bang dat die geskiedenis hom sou herhaal: Die Israeliete wou weer by die grens omdraai. Hulle belowe toe om eers hul deel te doen en daarna na hul families terug te gaan. Hulle sal die ander help om ook grond te kry. Dit het Moses gerusgestel.
“As julle mekaar liefhet, sal almal weet dat julle dissipels van My is,” het Jesus sy volgelinge geleer (Joh 13:35). Die teken van ware volgelinge is die liefde wat hulle vir mekaar het. Sy liefde werk in ons om mekaar lief te hê. Ons het mekaar nodig. Ons beskerm mekaar se belange (vgl. Fil 2:4).
GEBED: Here, wys my watter van u kinders vandag my hulp en bemoediging nodig het.
Lees vanaand in Numeri 32:28-42 hoe die twee en ’n halwe stamme hul families beveilig het sodat hulle kon gaan veg.
DONDERDAG 3 MAART 2016
Lees eers Numeri 33:1-10
Mylpale
Op bevel van die Here het Moses soos hulle getrek het die name van die kampplekke aangeteken (33:2).
GESELSVRAAG: Waar het jy al oral gewoon of gekuier?
“Ek het my dagboek in die hande gekry wat ek in graad vier geskryf het,” vertel ’n skoondogter een vakansie. “Dit is interessant om te sien wat my drome toe was en wat intussen in my lewe gebeur het.” In ons tyd sou sy op Facebook se Timeline kon kyk wat sy alles geskryf het en selfs na die foto’s van die plekke en mense wat vir haar belangrik was. Onthou, alles wat jy op Facebook skryf, is blywend! Wees dus versigtig wat jy daar sê.
Moses het noukeurig boekgehou van al die plekke waar hulle kamp gestaan het. Gelukkig het sy kinderjare in die paleis gesorg dat hy kon lees en skryf. Het hy dit dalk oorspronklik in hiërogliewe geskryf? Elkeen van die name het ’n storie vertel, hoewel almal nie hier genoem word nie. Daarvoor sou die hele boek Eksodus nodig wees. Elke naam het hom daaraan herinner dat die Here in elke behoefte voorsien en hulle beskerm het.
Wat sou jy alles kon vertel as jy dit maar net kon onthou? Daar is kosbare stories in elke senior opgesluit, as iemand bloot die moeite sou doen om dit neer te skryf. Ons kleinkinders luister oopmond na al die avonture wat hul oupa en ouma in hul kinderjare beleef het. Tog speel die Here ’n groot rol in elke vertelling.
GEBED: Here, ek wil U eer vir alles wat U vir my gedoen het.
Lees vanaand in Numeri 33:11-37 oor die roete wat die Israeliete deur die woestyn gevolg het. Die Here was steeds by hulle.
VRYDAG 4 MAART 2016
Lees eers Numeri 33:38-49
Grafstene langs die pad
Op bevel van die Here het die priester Aäron teen Horberg uitgeklim en daar … gesterf (33:38).
GESELSVRAAG: Wie van julle naaste familie lewe nog?
“Jy lyk vir my so baie na my derde man,” merk ’n weduwee teenoor ’n bejaarde omie op toe sy hom ontmoet. “Sjoe, hoeveel keer was jy dan getroud?” vra hy. “Twee maal,” antwoord sy. Die dood is deel van elkeen se lewe, al probeer ons om nie daaraan te dink nie. “Moenie die lewe so ernstig opneem nie – jy gaan dit in elk geval nie oorleef nie,” lees ek iewers. Min van ons het nie al ’n geliefde aan die dood afgestaan nie.
Hier in Moses se lys is net een sterfgeval aangeteken: Aäron s’n. In werklikheid het honderde duisende Israeliete daar in die woestyn gesterf. By elke staanplek is ’n versameling grafte agtergelaat. Die reisplan het ook hartseer ingesluit, nie net vreugde nie. Tog het die Here hulle daardeur gedra.
Ons almal is op pad na ons beloofde land – die ewigheid. Iewers langs die pad sal daar ook ’n graf met ons naam daarop wees. Dit is gelukkig nie die einde nie – dit is maar net die begin van ’n wonderlike nuwe lewe. Ons kan uitsien na ’n ewigheid saam met ons geliefdes – en veral met ons Here (vgl. Fil 1:23-25). Sien jou daar.
GEBED: Here, dankie dat U by my sal wees as ek die dag ook moet oorstap na die ewigheid.
Lees vanaand in Numeri 33:50-56 oor die Here se ernstige opdrag aan die Israeliete en die rede wat Hy daarvoor gee.
SATERDAG 5 MAART 2016
Lees eers Numeri 34:1-12
Grense
Dit is die grense van julle hele land (34:12).
GESELSVRAAG: Wat is die grense van jou invloed?
“Die geheim van goeie buurmanskap is duidelike en sterk heinings,” lees ek iewers. Ek het weer daaraan gedink toe ek sien dat daar in die VSA en Kanada baie dele is waar daar geen sigbare grense tussen die bure is nie. In Turkye het al die vee wagters nodig, want daar is nie drade tussen die plase nie. In die Karoo sien ’n mens soms die oorblyfsels van klipmure wat die grense van die plase moes aandui.
Die Here gee in vandag se Skriflesing die grense wat die land van die Israeliete sou hê. Dit het nie dadelik gebeur nie. Selfs nie in Josua se tyd nie. Sommige gedeeltes hiervan is eers deur Dawid ingeneem. Vandag glo baie Jode dat hierdie grense na duisende jare weer vir die staat Israel herstel moet word.
Die koninkryk van God het egter nie grense nie. In elke land op aarde is daar mense wat die goeie nuus van Jesus gehoor en Hom as hul Here en Meester aangeneem het. “Christus is die Here!” het al dikwels gelowiges se lewe gekos. Nogtans is die opdrag om elke volk en taal en nasie na Hom te lei, vandag steeds van krag. Ons kan ’n verskil maak – nie net in ons eie dorp nie, maar selfs tot die uithoeke van die wêreld.
GEBED: Here, wys my hoe ek u koninkryk kan bevorder, ook deur sendelinge en u kinders in ander lande te ondersteun.
Lees vanaand in Numeri 34:13-29 wie die land tussen die stamme moes verdeel en hoe hulle dit moes doen.
SONDAG 6 MAART 2016
Lees eers Psalm 83:10-19
Net een Here
… laat hulle besef dat alleen U die Naam “Here” het, U, die Allerhoogste oor die hele aarde (83:19).
GESELSVRAAG: Watter aanslae ervaar die kerk in ons tyd?
“Wanneer gaan die kerk sy Kodak-oomblik beleef?” skryf iemand. Kodak het amper 90% van die filmmark oorheers. ’n Kodak-oomblik was die