Uit die Beek 2016. Attie van Wijk
Huttefees
Die agste dag moet julle ook as ’n feesdag deurbring; dan mag julle geen gewone werk doen nie (29:35).
GESELSVRAAG: Hoe het jou voorouers in Suid-Afrika aangekom?
“Onthou, die reis na jou vakansieplek is deel van jou vakansie. Geniet dus elke tree van die pad en moenie jaag nie,” vermaan die verkeersmanne ons elke jaar wanneer die skole sluit. Dr Andrew Murray vertel dat sy reis van die Kaap na Bloemfontein per ossewa drie maande geduur het. Een van sy susters het geskryf dat die reis van Graaff-Reinet na die Kaap ses weke in beslag geneem het. Elke dag was ’n avontuur. Elke aand is daar uitgekamp, en Sondae het hulle nie gereis nie.
Die Huttefees is ook bedoel om die Israeliete te herinner aan die lang jare op pad na die beloofde land. Al het hulle later hul eie klip- en steenhuise gehad, het hulle een keer per jaar in hutte van palmblare gaan bly en soos trekkers gelewe om hulle te herinner aan die uittog uit Egipte.
Die agtste dag van die fees is selfs in Jesus se tyd as die hoogtepunt van die fees beskou. Dit is interessant dat Jesus dit gebruik het om na die werk van die Heilige Gees te verwys (vgl. Joh 7:37-39). Die vervulling deur die Heilige Gees is die grootste vreugde wat ’n mens kan ervaar, want Hy bekragtig jou om ’n verskil in die wêreld te maak. Die Gees wat in ons woon, trek elke dag saam met ons en wil ons gebruik waar ons ook al gaan.
GEBED: O Heilige Gees, neem beheer oor van my lewe sodat ek ’n kragtige instrument in u hand kan wees, oral waar ek vandag gaan.
Lees vanaand in Numeri 30:1-8 hoe belangrik dit is dat gelowiges hul beloftes en geloftes moet hou.
SATERDAG 27 FEBRUARIE 2016
Lees eers Numeri 30:9-16
Beloftes, beloftes
Elke gelofte of eed waarmee sy haarself wil kasty, kan deur haar man van krag gemaak of nietig verklaar word (30:13).
GESELSVRAAG: Wanneer maak mense beloftes aan die Here?
“Ek vra nou dat elkeen van julle wat belowe om elke dag minstens ’n halfuur vir Afrika te bid, sal opstaan,” het die spreker by ’n Sendingweek op Stellenbosch aan die einde van sy boodskap gevra. Amper 2 000 studente het soos een man opgestaan. “Ek het nie opgestaan nie, want ek het geweet ek sal dit nie hou nie,” het ons een professor die volgende dag in die klas bely. Ek weet nie van een student wat dit reggekry het om dit vol te hou nie!
Hierdie hoofstuk gaan oor die belangrikheid om die geloftes te hou wat jy aan die Here gedoen het. Mans, weduwees en geskeide vroue dra self die verantwoordelikheid vir elke gelofte wat hulle aflê. Ongetroude dogters in die huis en getroude vroue moet sulke geloftes aan hul pa of man voorlê. As hy nie dadelik beswaar maak nie, bly dit van krag. As hy weier, is sy nie gebonde nie.
Elke aangeklaagde in die hof word gemaan om die volle waarheid te praat en beaam dit dan: “So help my God.” Tog gaan feitlik almal voort om leuens te vertel. Wat is die nut van so ’n gelofte? Katkisante belowe om aan die Here en sy kerk getrou te bly maar daag die volgende Sondag dan nie by die erediens op nie. Hierdie hoofstuk wil ons help verstaan dat elke gelofte vir God belangrik is.
GEBED: Here, vergewe my dat ek so maklik u Naam in die skande steek deur onnadenkende ede. Help my om getrou te bly.
Lees vanaand in Numeri 31:1-12 hoe die Midianiete en Bileam hul verdiende loon gekry het.
SONDAG 28 FEBRUARIE 2016
Lees eers Psalm 82:1-8
God oordeel die regbank
Hoe lank gaan julle nog onregverdige beslissings vel, nog partydig wees vir die goddelose? (82:2).
GESELSVRAAG: Vertel van jou ervaring van die regstelsel.
“Hoekom word die Tien Gebooie nie meer in die skole geleer nie? Dit lyk selfs asof dit ook uit die kerk verdwyn het. Is dit nie die hoofoorsaak van die huidige misdaadvlaag nie?” vra ’n lidmaat. Dit is nie ’n nuwe gevoel nie. In vandag se psalm word Asaf geïnspireer om God se woord aan die regters oor te dra. In die meeste vertalings word die hemelwesens as “gode” beskryf. Die regters dink hulle is self bo die reg verhewe.
Magistrate en regters moet besef dat hulle eendag voor die groot regterstoel sal moet verskyn. Hulle sal moet rekenskap gee van wat hulle gedoen het, of dit nou goed of sleg was. Mense wat die regte pad geken het maar tog verkeerd gedoen het, sal met dubbele slae geslaan word (vgl. Luk 12:47-48, 1953/1933-vertaling).
Vandag kan ons in die kerk gaan sit en ons verlekker in die sondes van ander. Ons vergeet egter dat ons ons daardeur as regter oor ander aanstel. Ons veroordeel mense so maklik sonder om die ware feite te ken. As ons maar geweet het, sou ons dalk heel anders gevoel het. Die Here weet alles – Hy sal die regte oordeel vel. Daarom moet ons onthou dat die Here nie wil hê dat ons mense sommer moet veroordeel nie (vgl. Luk 6:37).
GEBED: Here, vergewe my dat ek uit onkunde mense so maklik veroordeel. Help my om vir ander tot seën te wees.
Lees vanaand in Psalm 83:1-9 hoe gelowiges soms ervaar dat die hele wêreld teen hulle is.
MAANDAG 29 FEBRUARIE 2016
Lees eers Numeri 31:13-24
Leer julle dan nie?
… deur toedoen van Bileam was juis húlle die oorsaak dat die Israeliete by Peor ontrou was aan die Here … (31:16).
GESELSVRAAG: Wanneer is ’n versoeking gevaarlik?
“Alkoholisme is ongeneeslik. Jy sal nooit weer alkoholiese drank in enige hoeveelheid kan gebruik nie,” het die dokter by die rehabilitasiekliniek aan Piet verduidelik. Daarna was hy ’n jaar lank droog totdat sy drinkebroers as ’n grap vodka by koeldrank gegooi en aan hom gaan gee het waar hy nagdiens by die handsentrale gedoen het. Die gevolg was dat hy onmiddellik teruggeval en sy pos verlaat het. Die dorp het daardie nag nie telefoondiens gehad nie. Dit was baie lank voordat hy weer bevry was van drank.
Mense besef nie altyd watter krag versoekings oor ons het nie. Die Israeliete het die Midianiete gaan straf vir die verleiding wat tot die dood van duisende Israeliete gelei het. Tog was die mooi vroue darem te verleidelik om sommer net so agter te laat. Hulle het nie daaraan gedink dat hierdie heidense vroue hulle maar weer sou verlei om afgode te dien nie. Dit was die rede waarom Moses se opdrag so streng was (vgl. Num 25:17).
Ons vergeet maklik hoe sterk versoekings en sonde kan wees. Daarom is dit dom om te gaan na plekke van versoeking. Ons vertel vir ons kinders om sulke plekke te vermy, maar doen dit self nie. Die kinders sien dit en volg eerder ons voorbeeld.
GEBED: Here, verhoed dat iets wat ek sê of doen iemand anders verlei om in sonde te val.
Lees vanaand in Numeri 31:25-41 hoe die buit onder almal verdeel is sodat niemand jaloers hoef te wees nie.
Maart
DINSDAG 1 MAART 2016
Lees eers Numeri 31:42-54
Offer van dankbaarheid
Ons het die soldate wat onder ons bevel was, getel, en daar word nie een vermis nie (31:49).
GESELSVRAAG: Hoekom kry baie gemeentes geldelik swaar?
“Die geheim van ’n gelukkige lewe is om dankbaar te wees vir wat jy het, nie ongelukkig oor wat jy nie het nie,” lees ek iewers. Tog kla ons so maklik. “Kan nie kla nie,” antwoord iemand as ek hom vra hoe dit gaan. Dit is asof hy teleurgesteld is dat hy niks het om oor te kla nie. Eish!
Die Israeliete het die beloofde land suksesvol ingeneem. Die Midianiete wat hulle wou vervloek, het nou hul straf gekry. Alles wat hulle van Bileam wou hê om op die Israeliete te laat neerreën, het op hulleself afgekom. Hul afgodsdiens en onsedelike lewenswyse het nou op hulle teruggeslaan. Die hele volk is uitgewis.