Uit die Beek 2017. Attie van Wijk
hoe die twee en ’n halwe stamme hul grond oorkant die Jordaan gekry het. Dit het hulle goed gepas omdat hulle kleinveeboere was en die omgewing baie geskik daarvoor was. Maar omdat die ander stamme hulle gehelp het om dié eiendom te bekom, moes hulle op hul beurt die stamme help om ook elkeen ’n woonplek te kry. Dit was ’n beleid van mekaar help, waarvan ons in ons eie geskiedenis ook mooi voorbeelde het.
Vandag is daar verskeie gebiede waar die boere moeite doen om opkomende boere in hul omgewing by te staan en raad te gee. Soms leen hulle selfs plaasgereedskap aan mekaar waar nodig. Die Sotho-spreekwoord sê mos: “’n Mens is ’n mens deur mense.” As daar ’n veldbrand is, spring almal in om te help. En ander boere help weer met voer waar nodig. Ons moet dus waar ons woon, ook kyk waar daar mense is wat hulp nodig het.
GEBED: Here, wys my waar U my hierdie week wil gebruik om ander mense in hul nood by te staan.
Lees vanaand in Deuteronomium 3:21-29 hoe die Here soms selfs vir geloofshelde nee sê.
SATERDAG 7 JANUARIE 2017 Lees eers Deuteronomium 4:1-10
ELKE KEER
Watter groot nasie se god is so by hom soos die Here ons God by ons is elke keer as ons tot Hom bid? (4:7).
GESELSVRAAG: Wanneer het ons die Here se hulp nodig?
“Ek glo dat alle godsdienste maar net verskillende paaie is om dieselfde berg te klim,” vertel ’n jong kelner my in Sri Lanka. Maar is daar dan geen waarheid nie? Almal kan mos nie reg wees nie? Hoe weet ons watter een van die vele godsdienste op aarde die waarheid beet het? Of het die ateïste die waarheid ontdek?
Moses het nie getwyfel nie. Hy het die Here, die God van Israel van aangesig tot aangesig ontmoet. Hy was bewus van sy eie swakheid, maar het die Here dekades lank met sy hele hart gevolg en die een wonderwerk na die ander sien gebeur. Hy het die krag van gebed leer ken. Vir die Here is niks onmoontlik nie. Hy kan selfs ’n grootpad deur die see maak as dit nodig is.
Ons almal is vanjaar op ’n onbekende pad. Maar ons is nie alleen nie. Ons het medegelowiges om ons te ondersteun en vir wie ons moet ondersteun. Maar boweal het ons die lewende drie-enige God. Hy het Hom deur baie eeue geopenbaar en het nog nie verander nie. Hy is steeds die Hoorder van gebed. Ons kan dus verwag dat ons ou vyand, Satan, alles sal doen om te keer dat ons bid. Solank ons op eie houtjie iets probeer doen, is hy veilig. Maar as ons bid, werk God, en as God werk, wie kan dit keer?
GEBED: Here, leer my hierdie jaar só bid dat dinge begin verander. Verlos my dus van my gemaksug.
Lees vanaand in Deuteronomium 4:11-24 waarom ons nie op iets of iemand anders as die Here moet vertrou nie.
SONDAG 8 JANUARIE 2017 Lees eers Psalm 119:17-24
MY RAADGEWERS
U verordeninge is my vreugde, hulle is my raadgewers (119:24).
GESELSVRAAG: Wat help jou om die regte keuses te maak?
“Het dit sin om elke Sondag die Tien Gebooie in die kerk te lees? Ons ken dit mos. Daarom skakel die meeste mense af as die wet gelees word,” het ons as katkisante onder mekaar geredeneer. Deesdae word die wet net by hoë uitsondering gelees, en kyk nou hoe wetteloos het ons land geword. Mense weet nie meer wat reg en wat verkeerd is nie.
Dawid het geweet dat die Here se wet daar is om ons raad te gee en ons te help om die regte keuses te maak. Hy het self ervaar watter bitter vrugte gepluk word wanneer jy een van die gebooie vergeet of ignoreer. Die Tien Gebooie is daar om ons en ons huis te beskerm, nie om dit vir ons swaar te maak nie. As jy enige van die gebooie oortree, is jý die een wat seerkry.
Is dit nie hoog tyd dat ons die Tien Gebooie in ons howe en skole terugbring nie? En wat van in die kerk? Die mode is om bloot die opsomming daarvan te lees, sonder geleentheid vir selfondersoek en sondebelydenis. Sonde is die een ding wat keer dat ons gebede verhoor word. Daarom is sondebelydenis so belangrik. “Wie sy sonde wegsteek, moet niks goeds te wagte wees nie; wie sy sonde bely en daarvan afsien, sal genade ontvang” (Spr 28:13).
GEBED: Here, dankie vir u Wet wat ons vandag wil lei.
Lees vanaand in Psalm 119:25-32 hoe ons die betroubare pad kan vind en volg.
MAANDAG 9 JANUARIE 2017 Lees eers Deuteronomium 4:25-31
WELKOM TERUG!
Wanneer julle in nood verkeer deurdat hierdie dinge in die toekoms oor julle kom, moet julle terugkom na die Here julle God, en sy woord gehoorsaam (4:30).
GESELSVRAAG: Wanneer is voorspoed gevaarlik?
“Afgodery is om in die plek van die enige ware God wat Hom in sy Woord geopenbaar het, of naas Hom, iets anders te versin of te hê waarop die mens sy vertroue stel,” verduidelik die Heidelbergse Kategismus in Antwoord 95.
Moses het sy volk baie goed geken. Wanneer dit moeilik gaan, weet hulle om hulp by God te gaan soek. Maar hy besef ook dat wanneer hulle eendag in die beloofde land aankom en dit met hulle voorspoedig en vreedsaam gaan, hulle maklik verlei kan word om ander gode te begin dien om in die mode te bly. Dan sal die Here uit liefde sorg dat dit met hulle sleg gaan totdat hulle weer na Hom terugkom. En sy deur sal vir hulle oopstaan.
Ons is meermale dankbaar dat ons nie beelde aanbid soos die mense van wie ons in die Bybel lees nie. Maar die kerkhervormers herinner ons dat ons van enigiets ’n afgod kan maak. Dit kan jou werk wees, of jou familie, of drank en dwelms, of rykdom of status. Ons moet dus op ons hoede wees. God moet nommer een in ons lewe bly. So nie, kan ons teenspoed verwag. Daar is net een God. Dis dwaas om op iets of iemand anders te vertrou.
GEBED: Here, dankie dat U ons herinner dat daar net een veilige plek is, en dit is by U.
Lees vanaand in Deuteronomium 4:32-40 hoe uniek die God is wat ons dien.
DINSDAG 10 JANUARIE 2017 Lees eers Deuteronomium 4:41-5:5
BELANGRIKE VOORSKRIFTE
Julle moet dit leer, dit gehoorsaam en daarvolgens lewe (5:1).
GESELSVRAAG: Watter goeie gewoontes het jy by jou ouers geleer?
“Moses is seker die enigste mens wat al Tien Gebooie op een slag gebreek het,” skerts ’n vriend. Hy verwys na hoe Moses die twee kliptafels met die wet daarop uit woede flenters gegooi het toe hy van die berg Sinai afgeklim het, net om te vind dat die volk reeds besig was om die teenoorgestelde te doen (vgl. Eks 32:19).
Moses herinner die volk daaraan dat die verbond nie net met hul oorlede voorouers gesluit is nie, maar dat dit ook vir hulle geld (vgl. 5:3). Dit moet deur die eeue die gids wees om hulle te lei hoe om as God se volk te leef. Dit sou die onderskeidingsteken tussen hulle en die ander volke wees. Toe Moses die tweede keer met twee swaar kliptafels die berg uitgeklim het, het hy hulle met sy terugkoms in die ark in die tabernakel gaan bêre sodat hulle altyd beskikbaar sou wees om die volk te leer.
Ons is soms so bewus van God se genade dat ons die Tien Gebooie as die Tien Voorstelle of Wenke beskou. Ons neem dit nie meer ernstig op nie. Die Here sê ons móét daarvolgens leef. Dit is die teken van ons dankbaarheid omdat Jesus ons skuld op Hom geneem het. Ons etiek moet daarvolgens wees. God, wat ons gemaak het, gee hierdie gebooie aan ons sodat ons veilig en gelukkig kan leef.
GEBED: Here, baie dankie dat U ons nie in die duister gelaat het oor hoe ons moet leef nie. Help ons om gehoorsaam te wees.
Lees vanaand in Deuteronomium 5:6-15 hoe ons voor God moet leef as ons vir Hom lief is.
WOENSDAG 11 JANUARIE 2017 Lees eers Deuteronomium 5:16-22
EER JOU OUERS
Eer jou vader en jou moeder, soos die Here jou God jou beveel het, dan sal jy ’n lang lewe hê en sal dit goed gaan met jou in die land wat die Here jou God vir jou gee (5:16).
GESELSVRAAG: Hoe eer ’n mens jou ouers?
“Verskeie mense gebruik sulke vloekwoorde, maar ons doen dit nie, want ons behoort