Uit die Beek 2017. Attie van Wijk
“Dikwels is voorspoed vir ’n mens ’n groter toets as teenspoed,” sê iemand anderdag. Solank dit sleg gaan, hou dit ons op ons knieë, maar as dit voorspoedig gaan, is ons te besig om geld te maak. Ons het nie meer tyd vir God nie. Die plesier van die wêreld en die sorge van die lewe maak dat ons afvallig word (vgl. Mark 4:19).
Moses praat steeds met die volk oor waarvoor hulle op hul hoede moet wees wanneer hulle die beloofde land bereik. Eers het hy die gevare uitgewys wanneer dit sleg gaan. Nou praat hy oor die gevare wanneer dit goed gaan. Dit kan jou einde beteken as jy nie jou voorspoed reg bestuur nie.
“Ja, ek het baie geld. Ek het baie geld omdat ek dit nie weggee nie,” sê ’n gierigaard toe hy gevra is om vir ’n goeie saak by te dra. Hy het vergeet dat alles wat hy het, bloot deur God aan hom geleen word. Hy moet dit vir God bestuur. Die koms van God se koninkryk is ook sy verantwoordelikheid. ’n Ongelowige kan dit nie verstaan nie. Maar vandag se Skrifdeel wil ons daaraan herinner dat gelowiges dinge anders sien. Alles is onder God se beheer, al verstaan ons dikwels nie waarom sekere dinge gebeur nie. Miskien sal ons hierdie week getoets word om te bewys dat ons God se boodskap verstaan.
GEBED: Here, alles wat ek het, behoort aan U. Ek wil dit hierdie week vir U bestuur. Lei my elke dag.
Lees vanaand in Deuteronomium 9:1-6 dat ons voorspoed nie oor ons gaan nie, maar uit God se genade alleen is.
DINSDAG 17 JANUARIE 2017 Lees eers Deuteronomium 9:7-14
VAS OF FEES
Ek het veertig dae en veertig nagte lank daar gebly en niks geëet of gedrink nie (9:9).
GESELSVRAAG: Hoe voel jy oor jou geestelike lewe?
“Ek is besig met ’n 40-dae-vas,” verduidelik my broer waarom hy nie saam met ons wou eet nie. Hy het van vrugtesap geleef. Hy het na die Here se duidelike leiding oor sy toekoms gesoek. “Ek doen ’n Daniëlvas,” vertel ’n maatskaplike werker. Sy het net een maal per dag geëet, en dan net groente, maar baie gebid.
Moses het gevas terwyl die volk feesgevier het (vgl. v. 9). Hy het 40 dae in God se teenwoordigheid deurgebring terwyl die volk Hom die rug toegekeer het. Moses was God se wet aan ’t ontvang terwyl die volk dit aan ’t oortree was. Hulle het dit reeds gehoor, dus was hulle nie onkundig daaroor nie (vgl. v. 10). God wou die volk dus vernietig, maar Moses het vir hulle voorspraak gemaak (vgl. v. 14). Die volk het gou weggedraai van die Here se weë af (vgl. v. 16).
Wanneer jong mense as belydende lidmate bevestig word, lê hulle ’n gelofte af dat hulle aan die Here getrou sal bly, Hom in alles wil gehoorsaam en lewende lidmate van die gemeente sal wees. Maar die volgende Sondag is hulle meestal nie daar nie. Baie mense getuig dat hulle eers jare later werklik tot oorgawe aan die Here gekom het. Ons kan dus nie die Israeliete kritiseer nie. Ons was self op daardie pad.
GEBED: Here, ek bely my eie ongehoorsaamheid. Vergewe my om Christus wil, en bewaar ons kinders dat hulle nie ook afvallig word nie.
Lees vanaand in Deuteronomium 9:15-21 hoe ernstig Moses vir sy volk voorbidding gedoen het. Hoe doen jy dit?
WOENSDAG 18 JANUARIE 2017 Lees eers Deuteronomium 9:22-29
ROEKELOSE ONKUNDE
Julle het nie op Hom vertrou nie en Hom nie gehoorsaam nie (9:23).
GESELSVRAAG: Watter opdrag van God is moeilik om te gehoorsaam?
“Toe, boetie, spring van die dak af. Ek sal jou vang,” het die pa sy seuntjie aangemoedig. Toe die seuntjie spring, staan die pa opsy en die outjie kry baie seer. “Laat dit nou jou eerste les wees: Jy kan niemand vertrou nie, nie eens jou pa nie,” verduidelik sy pa. Dit lyk asof die Israeliete ook so ’n pa gehad het.
Moses verduidelik met vele voorbeelde dat die volk nie verdien het om bevry te word en die beloofde land te ontvang nie. Hulle het die straf van God verdien, want hulle was gedurig in opstand teen die Hom (vgl. v. 24). Elke keer wat die Here ’n opdrag gegee het, was hulle onwillig. Hulle het God nie geken nie. Hulle het steeds nie besef dat Hy nie in hul diens was nie, maar andersom. Moses het verstaan, en daarom moes hy ernstig voorbidding vir hulle doen (vgl. v. 25-29).
Ons word uit genade gered deur die geloof (vgl. Ef 2:8). Maar ons word met ’n doel gered. God wil ons gebruik om ander mense te help (vgl. Ef 2:10). Dit is eers wanneer ons besef met Wie ons te doen het, dat ons uit liefde wil doen wat Hy wil hê. Kyk vandag mooi wat die Here vir jou wil wys. Wat wil Hy deur jou doen? Wees gewillig om Hom vir ’n wonderwerk te vertrou.
GEBED: Here God, ek ken U nog so sleg. Vergewe my my ongehoorsaamheid en maak my gewillig om te doen wat U sê.
Lees vanaand in Deuteronomium 10:1-9 hoe ’n goeie leier sy volgelinge in gebed dra.
DONDERDAG 19 JANUARIE 2017 Lees eers Deuteronomium 10:10-22
GOD VERWAG GEHOORSAAMHEID
En nou, Israel, die Here jou God vra net dat jy Hom moet eer, sy wil moet gehoorsaam, Hom moet liefhê en dien met hart en siel (10:12).
GESELSVRAAG: Hoe kan ons die Here beter leer ken?
“Omdat ek die ma is, dis hoekom,” staan op een van ’n Amerikaanse vriendin se T-hempies gedruk. Ons almal onthou hoe ’n kleuter ’n oneindige bron van “hoekoms” kan wees. “Sommer is nie ’n rede nie,” het ons een kleindogter haar ouma probeer reghelp. Ons wil so graag weet hoekom ons iets moet doen.
Moses gee ses redes waarom ons God moet gehoorsaam. In die gedeelte wat ons vandag gelees het, kry ons die eerste een: Ons moet Hom gehoorsaam omdat Hy uniek is en ons liefhet, al verdien ons dit nie. Hy verwag dat ons sy liefde met liefde moet beantwoord. Ons moet Hom liefhê en ons moet ons naaste liefhê. Dink maar aan wat God vir jou gedoen het, dan sal jy Hom liefhê. Let op wat Moses hier van God vertel.
Lees weer vandag se teksvers. Is jy al op hierdie vlak? Indien nie, wat moet verander? Let ook op wat die sigbare tekens van die ware liefde vir God is (vgl. v. 17-19). God is met elkeen van ons besig. Ons kan dus verwag dat ons vandag, of in die nabye toekoms, getoets sal word om te sien of ons gehoor het wat Hy sê. As jy die toets dop, is dit met ’n doel. Laat God jou verander.
GEBED: Sonder u genade kan ek niks doen nie, Here. Verander my om ál meer soos U te wees.
Lees vanaand Deuteronomium 11:1-12 en dink aan watter magtige dade van God jy al self raakgesien het. Dis die tweede rede.
VRYDAG 20 JANUARIE 2017 Lees eers Deuteronomium 11:13-21
SEËN VIR JOU GESIN
Leer dit vir jou kinders deur met hulle daaroor te praat as jy in jou huis is en as jy op pad is, as jy gaan slaap en as jy opstaan (11:19).
GESELSVRAAG: Hoe kan ons mekaar aan die Here se Woord herinner?
“Hoe kan ek my kinders toerus om die versoekings te weerstaan wat vir hulle in die buitewêreld wag?” is die vraag waarmee baie ouers deesdae worstel. Ons kinders kry selfs op laerskool te doen met drank, dwelms en voorhuwelikse seks. Ons het op daardie ouderdom nog met poppe en karretjies gespeel. Sommige ouers verkies tuisskoling sodat die kinders se geloof sterk gevestig kan word voordat hulle met die buitewêreld se versoekings te doen kry. Ander verkies openbare skole sodat die ouers hul kinders deur al die versoekings kan begelei.
Moses leer die volk dat hul kinders van kleins af moet leer om die Here te dien, anders lyk hul toekoms donker. Daar was nog nie staatskole nie. Alles moes in die huisgesin geskied. Kinders het geleer deur te sien en te hoor wat hul ouers doen. Daarom was godsdiens deel van die alledaagse lewe, nie net vir een dag in die week nie.
’n Ruk gelede was ’n Amerikaanse gesin van ses by ons op besoek. Hulle was op ’n jaar lange reis deur die wêreld, en die kinders het tuisskoling gekry so ver hulle gaan. Hul gehoorsaamheid en goeie maniere was opvallend. Hulle het nooit baklei nie. Is Moses dalk reg?
GEBED: Hemelvader, U het kosbare kinders aan ons toevertrou. Help ons om hulle van kleins af op u pad te begelei.