Кибелiстер. Талламалығ чыынды. Том Сибдей
Пиглер…
Кӧрерім килче,
Хайди ісчелер олар
Хыныс суун!
Пiлчем
Искем:
Чабал сағыс порчоға даа ӧлім.
Пілчем:
Аллығ сағыс —
Хан Тигірҷе тоозылбас Чӧрім!
Пыро чох тадар
Илбек немец:
«Худай-кізі – минмін!»
Пыро чох тадар:
«Минде дее – парох,
Худайни полза – полғайох!»
***
Илбек немец теенінде философ Ф.Ницшедеңер чоох парча.
Прометей
(сонет)
Чӱреемде кӧйген ызых одын
Пирбеспін пірдеезіне – чох!
Полған на кибелісті хобырып,
Тадарлап ӱреннерін сох!
Соғылған сӧбін – мунзурухха!
Алғым чазаа сыхчадып, – таста,
Тискеркі Іскеркінің чилі
Чӧргіс парыбызар ырах, арса.
Че полған на тілбестег – тығылыс,
Кирек чоғыл хыйға тілліглерге!
Холымнаң тӧреен кибеліс
Прометейни осхас ӧзеліс…
Че посха ла (мағаа ла!) – тіпчем,
«Сибдей Том» сорып ӧскірчем…
Ӧс
Худай чазын амды иртібӧгістім,
Хыро чолы сухсаанға тостым,
Кип-азахты чарным хапты…
Сизифтің пастир кирек тоғызын:
Тоғылах тас Сахчахха сығарып,
Тигір тӧзінең иніс ойладарға,
Худай чолын пасханын сағартып:
Чӧрген ӱчӱн піл ам саназарға!
“Кӧлет саларға…”
Кӧлет саларға.
Нимедір ол?
Кӱлет сабарға!..
“Наа сӧс?..”
Наа сӧс?
Мына:
Кірбе тыныма…
Паза:
Хынарға ам даа ундубаам…
Кӱлӱк хыстарына
Тасха чуртазымның сухсаанын
Тӱрче полза ундубызам,
Илбек Чазыға ырлааным
Тыт ағаснаң тосхырам:
Ағас нымзағы – палтыларға,
Тосхымнығ тадар чонға;
Пӱдіріп чӱзер айларға,
Туралар ӧзер тайғаа.
Тӧгелерні хадыл саап,
Сыңырааңар, палтыҷахтар!
Илбек Чазаа пала таап,
Хысхырааңар, хызыҷахтар!
Минiң тайағым
Посох мой, моя свобода…
О. Мандельштам
Пос хылынызы, минің тайағым
(Осиптең Ӧдіс алғаны?), —
Піл полбас алғызым Чир-чайаанға:
Илбек Чазы хулғалап халғаны…
Минің чолым, чох, Римзер нимес,
Чир ибіріп – Чазы кӱргенінзер!
Анда даа, хынза, изім тоспас
Хан Тигірнің мағаа ӧзенінде.
Кӧксім істі, сыытнаң ыңнанып,
Тӱӱрли кӧксеснең халар,
Алай ба, пічиимге яңланып,
Ах чаҷын сухсаан тосхырар.
Азах кӧдірген тозын, таpaп,
Тубан чіли, Чирімде хайылар,
Тайағым, пулуңда хайхап:
Пос хылынызы, арғызым, хайыдыр?..
“Киҷеегі