Bybelboodskappe. Jan Hulme
Johannes 3:16 lui só: “Want so lief het God die wêreld gehad dat Hy sy eniggebore Seun gegee het, sodat elkeen wat in Hom glo nie verlore mag gaan nie, maar die ewige lewe kan hê.” Dan kan ’n mens mos sien Hoe lief jou hemelse Vader jou, sy kind, het.
Hoe het God dit laat geskied?
Maria wat nog nooit gemeenskap met ’n man gehad het nie, is deur die werking van die Heilige Gees laat swanger word (Matt 1:21). So het dit gekom dat Jesus uit die koninkryk van God as ’n mens na die aarde verplaas is.
Jesus het dus grootgeword tussen die mense, baie wonderwerke gedoen soos om water in wyn te verander, siekes en blindes te genees, dooies, soos Lasarus, op te wek, duiwels uit mense te dryf, mense sy volgelinge gemaak en hul sondes vergewe, en nog baie meer.
Wat doen Jesus?
Ons lees in Lukas 4:43 hoe Hy die mense die waarheid geleer het en vertel het wat in God se koninkryk aangaan. Hy herstel die koninkryk van God hier op die aarde wat met die sondeval van die mens skeefgeloop. Sedertdien word ons almal in sonde gebore, maar Jesus se menswording was ons redding. Hy ontmasker die duiwel en sy volgelinge, soos valse profete en leraars, valse owerstes, ongelowiges wat Jesus nie wou ken as die gestuurde wat hulle kon verlos nie.
Hy moes as een persoon en as Middelaar vir die hele wêreld aan die kruis sterwe. As dit nie gebeur het nie, sou die hele mensdom in Satan se kloue beland het en sonder enige hoop op die hiernamaals in sonde gesterf het.
Jesus is die derde dag deur God opgewek uit die dood, Hy het ter helle neergedaal en Satan gestroop van al sy magte en sy heerskappy oor die aarde afgevat. Jesus het beheer geneem en die aarde wat aan die mens gegee was om daaroor te regeer, herstel en dit aan die mens teruggegee (Jes 8:23). Satan is onttroon en oorwin.
Waaroor gaan Kersfees vir gelowiges?
Ons as gelowiges vier daarom elke Kersfees die verjaardag van Jesus, wat opgevaar het na die hemel en wat aan die regterhand van God die Vader sit. Dit gaan vir ons as gelowiges oor baie meer as die gee van mooi geskenke of ’n oordadige Kersmaal.
Ons herdenk met blydskap sy geboorte as ons Verlosser en Saligmaker.
Ons maak ons met groot verwagting gereed vir sy wederkoms.
Ons bevestig ons geloof in Hom.
Ons grootste Kersgeskenk is volgens Matteus 16:19 die sleutels wat ons van Jesus ontvang het vir toegang tot sy koninkryk, deur sy Woord.
’n Persoonlike vraag aan jou
Ek vra jou vandag of jy gered is? Het jy die Jesus wie se geboorte ons met Kersfees vier, al aangeneem as jou persoonlike Verlosser? Is jy gereinig deur sy bloed? Is jy nie dié Kersgeskenk aan jouself verskuldig nie?
Mag hierdie Kersfees vir julle elkeen ’n besonderse Christusfees wees!
Amen.
|
|
Boodskap 4 Twee soorte mense |
Skrifgedeelte
Lukas 12: 8–12; 16–34
8“Ek sê vir julle: Elkeen wat hom voor die mense openlik vir My uitspreek, vir hom sal die Seun van die mens Hom ook openlik uitspreek voor die engele van God. 9Maar hy wat My voor die mense verloën, sal voor die engele van God verloën word.
10“Elkeen wat teen die Seun van die mens iets sê, kan vergewe word; maar hy wat teen die Heilige Gees laster, kan nie vergewe word nie.
11“Wanneer hulle julle voor sinagoges en owerhede en gesagvoerders bring, moet julle julle nie bekommer oor hoe of waarmee julle julle gaan verdedig of wat julle gaan sê nie, 12want die Heilige Gees sal julle op daardie oomblik leer wat gesê moet word.”
16Toe vertel Hy hulle ’n gelykenis: “’n Ryk man se grond het goed gedra. 17Hy het toe by homself gedink: wat moet ek doen? Ek het nie plek waar ek my oes kan opgaar nie. 18Toe besluit hy: Dít sal ek doen. Ek sal my skure afbreek en groter bou. Daarin sal ek al my graan en my ander goed opgaar. 19Dan sal ek vir myself sê: ‘Mens, jy het baie goed wat weggesit is vir baie jare. Hou op met werk: eet, drink en leef lekker.’ 20Maar God het vir hom gesê: ‘Jou dwaas. Vannag nog sal jou lewe van jou opgeëis word, en wie kry dan alles wat jy bymekaargemaak het?’ 21So gaan dit met hom wat vir homself skatte vergader en nie ryk is by God nie.”
22Verder het Jesus vir sy dissipels gesê: “Daarom sê Ek vir julle: Moet julle nie bekommer oor julle lewe, oor wat julle moet eet nie, of oor julle liggaam, oor wat julle moet aantrek nie. 23Die lewe is tog belangriker as kos en die liggaam as klere. 24Kyk na die kraaie: hulle saai nie en oes nie; hulle het geen spens of skuur nie, maar God sorg vir hulle. Julle is tog baie meer werd as voëls. 25Trouens, wie van julle kan deur hom te bekommer sy lewe met een uur verleng? 26As julle nie eens so ’n klein dingetjie kan regkry nie, waarom bekommer julle julle oor die ander dinge?
27 “Kyk hoe groei die lelies: hulle swoeg nie en hulle maak nie klere nie, maar Ek sê vir julle: Selfs Salomo in al sy prag was nie geklee soos een van hulle nie. 28As God die gras van die veld, wat vandag nog daar is en môre in die vuur gegooi word, só mooi maak, hoeveel te meer sal Hy julle versorg, julle kleingelowiges! 29Julle moet julle ook nie gedurig afvra wat julle gaan eet of drink nie, en julle moenie besorg wees nie. 30Dit is alles dinge waaroor die ongelowiges in die wêreld begaan is, maar julle het ’n Vader wat weet dat julle dit nodig het. 31Beywer julle vir sy koninkryk, dan sal Hy julle ook hierdie dinge gee.
32“Moenie bang wees nie, klein kuddetjie, want dit was die wil van julle Vader om die koninkryk aan julle te gee.
33“Verkoop julle besittings en gee bydraes vir die armes. Skaf vir julle ’n beurs aan wat nie leeg raak nie, ’n onuitputlike rykdom in die hemel, waar geen dief dit kan bykom en geen mot dit kan verniel nie. 34Waar julle skat is, daar sal julle hart ook wees.
Preekskema
Hoekom het Jesus aarde toe gekom?
1 Hy het aarde toe gekom om skeiding tussen gelowiges en ongelowiges te bring (Luk 12:51). Hy het gewaarsku dat daar selfs verdeeldheid in huisgesinne sal wees. Een broer of suster of ouer gaan aangeneem word by die wederkoms van die Here, die ander een gaan verwerp word. Soos Matteus 24:41 dit stel: Een vrou by die meul gaan aangeneem word, die ander een gaan agterbly.
2 Hy het gekom sodat hulle wat Hom aangeneem het, anders sal begin dink en dinge anders doen.
3 Hy het gekom om gelowiges deur sy bloed te reinig sodat hulle nie meer die bagasie van sondes hoef te dra nie. Wanneer hulle vergewe en vrygemaak is van skuldgevoelens, het hulle ook nie meer die begeerte om te sondig nie en verbreek hulle hul bande met die wêreldse dinge. Nou maak hulle vir hulle skatte in die hemel bymekaar, want waar ’n mens se skat is, sal jou hart ook wees (Luk 12:33–34). Wêreldse besittings kan jy tog nie met jou heengaan saamneem nie, nie hemel toe nie; en die verlorenes ook nie hel toe nie (Luk 12:16–21, 33).
Ons is getuies vir Jesus (Luk 12:8–12)
1 As ons ons openlik en sigbaar voor die mense uitspreek vir Jesus, sal Hy Hom openlik vir óns uitspreek voor die engele van God. Ons kan mos vir Hom getuig by ons bure, maats, vriende, werksmense, in wyke en in selgroepe, by mense wat ons ontmoet en veral kan ons deur die voorbeeld wat ons stel, ongelowiges probeer oortuig om Jesus aan te neem as hulle Verlosser.
2 Volgens Romeine 10:17 kom geloof deur die prediking wat ons hoor en deur ander vorme van die verkondiging van Christus. Is jy ’n getuie vir Jesus, en praat jy woorde van die lewe? Ons kan almal God se boodskap van genade en redding verkondig “sodat almal daaruit kan leer en almal bemoedig kan word” (vgl 1 Kor 14:31). Hierin lei God se Gees ons deur sy Woord.
3 Volgens Lukas 12:9 sal dié wat Christus voor die mense verloën, voor die engele van God verloën word. Ons moet dink voor ons praat – as ons leuens en vuil grappe vertel, of mense veroordeel, breek ons God se beeld af, wat ons veronderstel is om in ons lewe te vertoon. As ons skinder van iemand, kan ons daartoe bydra