Uit die Beek 2013. Attie van Wijk
Ons moenie ongeduldig wees nie.
“Niks gebeur per toeval nie,” sê ’n vriend wat swaar tye beleef het. Uiteindelik sal alles ten goede meewerk vir dié wat God liefhet (Rom 8:28). Miskien wag daar vir jou ook teleurstellings vandag of later in hierdie week. Onthou, jou hemelse Vader is nog ten volle in beheer. Al voel dit vir jou asof jou wêreld vergaan, kan jy op Hom vertrou. Selfs die teleurstellings is deel van sy plan. Hou net aan Hom vas, en vertel Hom dat jy Hom ten volle vertrou. Op die regte tyd sal die uitkoms kom.
GEBED: “Here, dankie dat hierdie teleurstellings ook verbygaan.”
Lees vanaand in Genesis 41:1–16 hoe die Here vir Josef op die regte oomblik uit die tronk laat haal het.
SATERDAG 23 FEBRUARIE 2013
Lees eers Genesis 41:17–32
God heers
“Wat God wil doen, het Hy aan U meegedeel” (Gen 41:25).
GESELSVRAAG: Wat het die Here oor die toekoms bekend gemaak?
“Hoe kan ons vir die toekoms beplan?” is die vraag waarmee elke sakeman en politikus worstel. As ’n boer maar kon weet wat die weer in die volgende seisoen gaan doen ... Waar is die toekomskundiges? Wat van Siener van Rensburg of Nostradamus? Sal ’n fortuinverteller dalk kan help? Wat gaan die ekonomie maak? Hoe gaan internasionale onrus of rampe ons raak? Gaan hierdie vliegtuig val of hierdie motor in ’n ongeluk betrokke raak? Hoe kan ons gereed maak vir die toekoms?
Die farao het ’n plek in God se groot plan gehad. God wou sy verbondsvolk red. Uiteindelik het dit alles ook met die koms van die Christus te doen. Josef se slawerny en gevangenskap was alles onder God se beheer (Gen 50:20). Nou begin Hy op die hoogste vlak gereed maak dat nie alleen Jakob en sy gesin nie, maar ook duisende ander lewens gespaar kon word. Hy openbaar die toekoms aan die farao – sommer dubbeld – en sorg dat Josef die boodskap kan uitlê.
“Ons weet nie wat die toekoms hou nie, maar ons weet Wie die toekoms hou.” Hierdie week – selfs in die volgende uur – gaan daar dinge gebeur wat vir baie mense dinge onveranderlik gaan verander. Daarom moet ons werk aan ’n lewende verhouding met die Een wat alles weet.
GEBED: “Die toekoms is in u hande, Hemelvader. Help ons om gereed te wees vir wat ook al kom.”
Lees vanaand in Genesis 41:33–44 hoe ’n gevangene tot die hoogste pos verhef is. Kan jy aan ’n onlangse voorbeeld dink?
SONDAG 24 FEBRUARIE 2013
Lees eers Psalm 88:11–19
Doen dit nou
“Word daar in die graf vertel van u troue liefde?” (Ps 88:12).
GESELSVRAAG: Hoe kan ons hierdie week van God se liefde vertel?
“Die evangelie is net goeie nuus as dit betyds gehoor word.” Elke dag sterf daar duisende mense. Sommige het al van Jesus gehoor, maar baie het nog nooit van Hom gehoor nie. Sommige het die boodskap geglo, en ander het dit verwerp. Dit bepaal waar ons die ewigheid gaan deurbring. Ons sal nie hierdie boodskap aan dooie mense kan oordra nie. Ons moet dit nou doen. Elke geslag kan net hierdie geslag bereik. Moenie uitstel nie.
In vandag se psalm kla die bidder oor sy siekte. Sy argument is dat God geen lof van hom kan kry as hy doodgaan nie. Hy wil dus in die lewe bly sodat hy God kan loof. Hy wil ander van God se troue liefde vertel. Dooies kan nie daarop reageer nie (v 11, 13).
“Ja, ek gee nie nou my dankoffer nie, maar die kerk is in my testament. As ek sterf, sal die kerk baie kry,” vertel ’n boer. “Ag, nee man, moet tog nie soos ’n vark wees nie. Hy het ook net nut as hy dood is!” was sy ouderling se antwoord. Die Here wil ons elke dag gebruik, nie eers as ons dood is nie. Daarom gaan ons vandag kerk toe om Hom te loof en te prys. Ons word toegerus om hierdie week in sy diens te staan. Daar is duisende mense hier om ons wat die boodskap van God se liefde nodig het. Skryf sommer nou drie name neer, en dink hoe jy die boodskap met hulle gaan deel. Bid elke dag vir hulle tot daardie gebed verhoor word.
GEBED: “Here, gee my die kans om iemand vandag van U te vertel.”
Lees vanaand in Psalm 89:1–11 hoe verbondskinders die Here moet leer ken en sy boodskap moet aangee.
MAANDAG 25 FEBRUARIE 2013
Lees eers Genesis 41:45–57
Uitkoms
“En toe die hongersnood straf word in die ander lande, het die mense van die hele wêreld Egipte toe gekom om koring te koop by Josef” (Gen 41:57).
GESELSVRAAG: Wat het ons wat ander mense nie het nie?
“Die gevolg van die regering se dom besluite was dat daar glad nie meer kos in die winkels beskikbaar was nie,” vertel iemand uit Zimbabwe. “Boonop was ons geld niks werd nie. Ons het buitelandse geld nodig gehad om kos oorkant die grens te gaan koop.” Dit was ’n tyd van hongersnood en swaarkry vir almal wat nie geld uit die buiteland kon kry nie. Sommige mense is van honger dood.
Soortgelyke toestande het in die grootste deel van die Midde-Ooste geheers. Die droogte het aangehou en daar was nie oeste nie. Mense het gehoor dat daar wel kos in Egipte beskikbaar was en het van heinde en ver gekom om kos te koop. Josef se wyse voorbereidings het gesorg dat daar genoeg kos in die skure was om nie alleen die Egiptenare nie, maar ook die besoekers uit ander lande te help.
Ons het dieselfde ervaring gehad toe mense uit baie ander lande van Afrika na Suid-Afrika gestroom het om kos en geld te soek. Hier het dit beter gegaan as in ander Afrika-lande. Almal wou kom geld maak, en was gewillig om vir min te werk, net om te oorleef. Het hulle ook die evangelie in ons land gekry?
GEBED: “Gee dat elkeen wat ons land besoek, U sal leer ken, Here.”
Lees vanaand in Genesis 42:1–11 hoe die broers onwetend kos gaan soek by die broer wat hulle as slaaf verkoop het.
DINSDAG 26 FEBRUARIE 2013
Lees eers Genesis 42:12–22
Boemerang
“Dit het ons nou van alles wat ons destyds ons broer aangedoen het” (Gen 42:21).
GESELSVRAAG: Vertel van iets in jou lewe wat geboemerang het.
“Ek het my ou boemerang probeer weggooi, maar hy het elke keer weer teruggekom.”
“Wat noem ’n mens ’n boemerang wat nie terugkom nie? ’n Stok.” Hierdie grappies herinner ons dat alles wat ons doen, gevolge het. Uiteindelik kom ons optrede weer na ons toe terug. Wat jy saai, dit sal jy ook oes (Gal 6:7). Dit het Josef se broers ook nou begin ondervind.
Hulle was jaloers op Josef en wou hom sommer doodmaak. Uiteindelik het hulle hom as slaaf verkoop, en hy het lange jare as slaaf en gevangene in Egipte deurgebring. Nou was hy die eerste minister van Egipte en sy broers moes by hom om hulp kom smeek. Hy het natuurlik soos ’n Egiptenaar gelyk en geklink en deur ’n tolk met hulle gepraat. Hulle het nie besef dat hy alles verstaan wat hulle sê nie (Gen 42:23).
Alles wat ons doen, het gevolge. “Die sondes van my jeug het nou weer na my toe teruggekom. Ek het straf gerook en nou is my longe daarmee heen,” vertel ’n swaer wat besig was om aan emfiseem te sterf. Die manier waarop apartheid toegepas is, het vandag nog baie bitter gevoelens agtergelaat. Jongmense en kinders ly nou weens die optrede van hul voorsate, al is hulle self heeltemal onskuldig.
GEBED: “Help my om elke dag reg te lewe, Here, om U te eer.”
Lees vanaand in Genesis 42:23–28 hoe al hoe meer dinge vir die broers verkeerd gegaan het.
WOENSDAG 27 FEBRUARIE 2013
Lees eers Genesis 42:29–38
Tel jou seëninge
“Hy is al wat vir my oor is” (Gen 42:38).
GESELSVRAAG: Watter seëninge neem ons as vanselfsprekend aan?
“Ons een dogter het ons heeltemal verwerp. Sy sê ons het die ander kinders bo haar voorgetrek. In werklikheid het ek meer aandag