Uit die Beek 2013. Attie van Wijk
lewenstyl. As ons net ons seëninge begin tel, sal ons besef hoe bevoorreg ons in werklikheid is.
Jakob het vasgeklou aan sy “oorlede” seun, Josef. Dit het gemaak dat hy Josef se kleinboet voorgetrek het, soos hy met Josef gedoen het. Die ander tien seuns en hul gesinne het glad nie getel nie. Sy geliefde Rebekka het gesterf tydens Benjamin se geboorte. Nou herinner die kind hom elke dag aan haar. Die ander kinders kan maar verlore gaan, soos Simeon in die Egiptiese tronk. Hy tel nie.
Kyk mooi na die dinge wat jou ongelukkig maak. Is dit uit afguns gebore? Die Here sê ons moet tevrede wees met wat ons het, want Hy sal ons nooit verlaat of in die steek laat nie (Heb 13:5). Tevredenheid is die geheim tot geluk. Waaroor kan jy die Here dank by die werk, of by die huis, of in die skool, of in die kerk? Ons tel waarskynlik onder die 10% rykste mense op aarde. Daar is miljoene wat enigiets sou gee om in ons skoene te staan. Moet jou dus nie kwel oor wat jy nie het nie. Dank die Here vir wat jy het!
GEBED: “Dankie vir al die duisende seëninge wat U so onverdiend oor ons uitstort, Here.”
Lees vanaand in Genesis 43:1–14 hoe Jakob die Here leer vertrou het vir die veiligheid van sy seuns.
DONDERDAG 28 FEBRUARIE 2013
Lees eers Genesis 43:15–23
Stresvolle tye
“Wees gerus! Moenie bekommerd wees nie” (Gen 43:23).
GESELSVRAAG: Waaroor is jy tans bekommerd?
“Toets jou geheue. Waaroor het jy jou presies ’n jaar gelede lê en bekommer?” vra Joseph Cossman. Vandag is die môre waaroor jy gister bekommerd was. “’n Bekommernis wat te klein is om oor te bid, is te klein om vir jou ’n las te word,” het Corrie ten Boom geskryf. Iemand anders het aangeraai: “Moenie jou oor jou hart bekommer voor hy opgehou klop het nie.” “Moenie bang wees vir môre nie – God is reeds daar,” het iemand anders gesê.
Maar Josef se broers het genoeg gehad om hulle oor te bekommer. By die huis was die familie besig om van honger dood te gaan. Hulle was nou in ’n vreemde land, met ’n baie aggressiewe regeerder aan wie hulle moes rekenskap gee. Hul een broer was reeds in die tronk en hul geld was weer terug in hul sakke. En nou word hulle na die vreemde heerser se huis geneem. Hulle het die ergste verwag.
“Elke aand gee ek al my bekommernisse aan God oor. Hy gaan in elk geval die hele nag wakker wees,” skryf Mary Crowley. Dale Carnegie het aangeraai: “As jy in die nag nie kan slaap nie, staan dan op en doen iets. Dis die bekommernisse wat jou onderkry, nie die slapeloosheid nie.”
“Werp al julle bekommernisse op Hom, want Hy sorg vir julle,” skryf Petrus in 1 Petrus 5:7. “Werp” beteken om dit daar te los, en nie weer terug te neem nie.
GEBED: “Hemelvader, ek gee vandag my bekommernisse aan U oor.”
Lees vanaand in Genesis 43:24–34 hoe sy broers se besoek vir Josef emosioneel geraak het.
Maart
VRYDAG 1 MAART 2013
Lees eers Genesis 44:1–14
Tyd van toetsing
“En my beker, my silwerbeker, moet julle bo in die sak van die jongste sit saam met die geld vir sy graan” (Gen 44:2).
GESELSVRAAG: Wat is die swaarste toets wat jy al moes deurstaan?
“’n Juweel kan nie gepoleer word sonder wrywing nie, en ’n mens ook nie sonder beproewings nie,” lui ’n ou Sjinese spreekwoord. John Newton het geskryf: “Beproewings is die medisyne wat ons bedagsame en wyse Geneesheer voorskryf omdat ons hulle nodig het. Hy besluit hoe dikwels ons dit nodig het, en watter sterkte. Ons kan Hom vertrou en Hom dank vir sy voorskrif.”
Josef wou homself aan sy broers bekend maak, maar hy wou eers vasstel of hulle al verander het. Sou hulle hul kleinboet ook in die steek laat soos vir hom, of gee hulle darem nou al vir mekaar om? Daarom lees ons van hierdie ongewone opdragte aan sy bediendes. Ek wonder wat die bediendes daarvan gedink het! Maar dit het die gevolg gehad dat hulle almal weer sak en pak teruggekom het, en hy kon sien hoe hulle verander het.
Beproewings is nooit lekker nie, maar ons kan seker wees dat hulle uiteindelik tot ons beswil is. Die Here wat ons gemaak het, weet hoeveel druk ons kan verduur. Hy is lief vir sy kinders en waak oor ons. Hy wil ons heilig maak en vorm as sierade vir die ewigheid. Daarvoor is teëspoed soms nodig. Maar Hy stel ons in staat om dit te hanteer (2 Kor 10:13).
GEBED: “Here, ek vertrou U in elke beproewing. Dra my deur elkeen en help my om sterker anderkant uit te kom.”
Lees vanaand in Genesis 44:15–34 Juda se roerende pleidooi sodat Benjamin weer huis toe kan gaan.
SATERDAG 2 MAART 2013
Lees eers Genesis 45:1–13
Die groter plan
“ ... God het my voor julle uit gestuur om lewens te red” (Gen 45:5).
GESELSVRAAG: Wat was jou grootste verrassing?
“Ek het na Suid-Afrika gekom om werk te soek sodat my familie by die huis nie van honger hoef dood te gaan nie,” vertel ’n Zimbabwiër. So vind ons goed gekwalifiseerde mense wat gewillig is om motors vir ’n karige inkomste by die inkopiesentrum op te pas, want dit is nog baie beter as in hul tuisland. Josef het besef dat sy beproewings uiteindelik tot almal se beswil was. God was in beheer.
Die elf broers het hierdie vreeswekkende verskynsel net as Safenat- Paneag geken (Gen 41:45). Hy het soos ’n Egiptenaar gelyk en geklink. Hulle het nie in hul ergste nagmerries gedroom dat hy die gehate boetie was wat hulle 21 jaar vantevore eers wou doodmaak en toe as slaaf verkoop het nie. Geen wonder hulle was doodverskrik nie (Gen 45:3). Maar die slegte nuus het vir hulle goeie nuus geword. Hy wou hulle nie straf nie – hy wou hul lewens red en hulle help! Alles wat gebeur het, was deel van God se plan!
Jesus het sy dissipels ook verras toe Hy op die see na hulle toe aangestap kom en Homself aan hulle bekend maak. Saulus van Tarsus het Hom ook so op ’n onverwagte manier op pad na Damaskus leer ken, en dit het sy lewe vir altyd verander. Elkeen van ons het seker ook ’n storie van hoe Christus Homself aan ons openbaar het. Hy het gekom sodat ons die ware lewe kan hê!
GEBED: “Dankie vir my grootste verrassing, Here Jesus.”
Lees vanaand in Genesis 45:14–28 hoe die goeie nuus by Jakob uitgekom het.
SONDAG 3 MAART 2013
Lees eers Psalm 89:12–18
Eienaarskap
“Aan U behoort die hemel, aan U behoort ook die aarde, die wêreld en alles daarin” (Ps 89:12).
GESELSVRAAG: Watter reg het die Here op ons besittings?
“My plaas is my plaas; my geld is my geld; ek het hard gewerk daarvoor en ek het ryk geword deur dit nie weg te gee nie,” sê ’n ou boer toe die diaken by hom kom kuier. Hy was nie gewillig om enige dankoffer te gee nie. Hy het vergeet dat sy plaas nie eintlik aan hom behoort nie, maar aan die Here. Sy liggaamskrag het hy van die Here gekry. So ook sy vermoë om te beplan. Die reën kom van die Here af. Die suurstof wat hy elke dag inasem om van te lewe, kom van God af. God het beplan dat plante suurstof vir ons moet produseer. Die groeivermoë van elke plant is God se werk. Die oeste is God se seën. Die grond is sy skepping en behoort nog steeds aan Hom.
Ons kan dus verstaan dat dit sy hart seermaak as sy skepsels Hom nie wil erken nie. Hulle wil nie tyd maak om saam te kom om Hom te loof nie. Hulle is doelbewus ongehoorsaam aan sy gebooie wat Hy vir hul eie beswil gegee het. Hulle kies om in sonde te lewe. Hulle maak self hul eie afgode om op sy dag te dien.
Nietemin het die Here Jesus aarde toe gekom om ’n pad oop te maak dat sondaars gered kan word. Hy het kom ly en sterf sodat ons sondes weggeneem kan word. Hy het ons rekening kom betaal. Hoe kan ons anders as om Hom vandag heelhartig te dien?
GEBED: “Ek loof U vir u groot liefde, Here Jesus. Dankie dat U u lewe vir my kom gee het.”
Lees vanaand