Uit die Beek 2013. Attie van Wijk
eers Genesis 46:1–7
Nooit alleen nie
“Ek gaan saam met jou Egipte toe ...” (Gen 46:4).
GESELSVRAAG: Wanneer het jy die eensaamste gevoel?
“Ek was baie bekommerd toe ons oudste in sy dienspligjare grens toe gestuur is, tot ek besef het dat die Here ook daar is. En Hy kan beter vir ons kinders sorg as wat ons dit kan doen.” Ons God is nie net ’n plaaslike godjie nie. Hy is die Skepper en onderhouer van die heelal. Daar is geen plek in die ondenkbaar groot heelal waar Hy nie is nie.
Jakob was seker ook onrustig toe hy genooi word om na Egipte te versit. Moet hy dan nou die God wat so dikwels met hom gewerk het, agterlaat? Was die offer wat hy gebring het, dalk ’n manier om totsiens te sê? Die Here het toe weer aan hom in ’n visioen verskyn om hom te verseker dat Hy nie agterbly nie. Hy is ook in Egipte. Jakob hoef dus nie bang te wees nie. God sal ook daar vir hom sorg. God sal hom daar ook seën en sy nageslag sou ’n groot nasie word.
Miskien moet jy ook verhuis. Dalk dink julle aan emigreer, of jy word verplaas na ’n ander deel van die land of die wêreld. Onthou, God is ook daar. Jy sal ook daar ander kinders van die Here raakloop. Julle sal mekaar daar ook kan bemoedig. Of as jy na ’n plek moet gaan waar daar geen ander kinders van die Here is nie, moet jy weet dat die Here jou met ’n doel daarheen stuur. Hy is reeds daar besig om harte voor te berei. Hy wil jou gebruik om die goeie nuus van Jesus met iemand anders te deel.
GEBED: “Here, U kan my na enige plek toe stuur. Dankie dat U ook daar is.”
Lees vanaand in Genesis 46:8–34 van die blye ontmoeting tussen vader en seun ná soveel jare van hartseer.
DINSDAG 5 MAART 2013
Lees eers Genesis 47:1–12
Die wêreld is ons woning nie
“Ek is nou al honderd en dertig jaar ’n vreemdeling hier op aarde” (Gen 47:9).
GESELSVRAAG: Waar is jou ideale woonplek?
“Miskien is ons volgende jaar in Jerusalem,” het die Jode in die Oosblok-lande mekaar getroos toe hulle swaar verdruk was. En vir sommige van hulle het dit waar geword. Hul woonplek was maar net tydelik in Rusland. Hulle kon verhuis. Nadat Totius se dogtertjie voor hom deur die weerlig doodgeslaan is, het hy ook baie met die seer van die dood geworstel. En keer op keer het die refrein gekom: “Die wêreld is ons woning nie.”
Jakob het waarskynlik nog maar min van die lewe ná die dood geweet. Tog het hy soos ’n vreemdeling op aarde gevoel. Hy was maar net ’n trekboer – hy en sy kudde het al agter weiding aan getrek. Nêrens het hy vaste eiendom besit nie, al was hy volgens die standaarde van daardie tyd heel welgesteld. Hy het sy hele lewe as tydelik beskou. Daar wag mos iets beters.
Jesus het ons ook geleer dat ons eintlike huis nog op ons wag: “In die huis van my Vader is daar baie woonplek. As dit nie so was nie, sou Ek nie vir julle gesê het Ek gaan om vir julle plek gereed te maak nie. En as Ek gegaan het en vir julle plek gereed gemaak het, kom Ek terug en sal julle na My toe neem, sodat julle ook kan wees waar Ek is” (Joh 14:2–3). Ons is vreemdelinge hier – dáár is ons ewige woonplek.
GEBED: “Dankie, Here Jesus, dat U vir my ’n plek voorberei.”
Lees vanaand in Genesis 47:13–26 hoe Josef die land tot die farao se voordeel bestuur het sonder om self korrup te word.
WOENSDAG 6 MAART 2013
Lees eers Genesis 47:27–48:9
Oupa se seën
“Bring hulle hier na my toe. Ek wil hulle seën” (Gen 48:9).
GESELSVRAAG: Hoe kan ons ons kleinkinders seën?
“Ek wonder watter rol ons voorouers se gebede nog in ons lewens en in dié van ons kinders speel,” wonder iemand nou die dag toe ons gesels oor ons voorouers se gebedslewe. Dit is nogal interessant om te lees hoeveel leiers in Suid-Afrika afstammelinge van dominee Andrew Murray van Graaff-Reinet is. Hy het baie tyd spandeer aan gebed vir herlewing en vir sy kinders. Woorde wek, maar voorbeelde trek. Sy kinders het sy voorbeeld gevolg.
Ook in Bybelse tye was die mense baie bewus van die krag van ’n seën wat ’n sterwende vader of grootvader se woorde kon inhou. Ons het al vanjaar van verskeie sulke voorbeelde gelees. In vandag se gedeelte lees ons hoe die bejaarde Jakob sy seun Josef se kinders seën. Dit klink asof die handeling ’n profetiese invloed gehad het. ’n Mens wonder hoe die oorvertel van die toneel wat ons vanaand sal lees, die afstammelinge van die twee seuns beïnvloed het.
Wat is die beste wat ons vir ons kinders kan doen? Iemand het gesê dit is om vir hul ma lief te wees. Daar is baie waarheid in, maar nog beter is om self ’n voorbeeld van toewyding en godsvrug te wees. Kinders leer die beste deur wat hulle sien. As hulle sien dat hul ouers nie leef volgens hul belydenis nie, kan dit hul geestelike groei baie skade aandoen.
GEBED: “Here, ons bid vir ons kinders en kleinkinders. Lei hulle op u pad, en verhoed dat ons voorbeeld hulle verkeerd lei.”
Lees vanaand in Genesis 48:10–22 hoe Jakob tussen Josef se kinders gediskrimineer het.
DONDERDAG 7 MAART 2013
Lees eers Genesis 49:1–13
Die Messias kom!
“Jy sal altyd heers, jy sal aanhou regeer totdat Silo kom, die heerser aan wie die volke hulle sal onderwerp” (Gen 49:10).
GESELSVRAAG: Beskryf jou ideale regeerder.
“Ek bid maar dat Christus gou weer sal kom,” sug ’n VGK-leraar toe hy vertel hoe moeilik dit is om die regte leiding te gee. Dit maak nie saak wat hy doen of sê nie – daar is altyd mense wat vol kritiek is. Hy en sy familie is selfs met moord en brandbomme gedreig omdat hulle nie ten gunste van geweld as antwoord was nie. Wat ons land – en die wêreld – nodig het, is ’n liefdevolle, regverdige, alwetende, almagtige regeerder. En dit kan net Jesus Christus wees.
Jakob se oudste drie seuns het hul eersgeboortereg as leiers deur hul optrede verbeur. Jakob gee die leierskap dus aan Juda en sy nageslag. Uiteindelik het Dawid, die koning uit Juda, die land verenig en groot oorwinnings behaal. En die Here het aan hom belowe dat iemand uit sy nageslag altyd op die troon sal wees. Jakob noem Hom eeue vantevore Silo (Rus). Die Jode het Hom as die Messias geken. Jesaja noem Hom die Vredevors (Jes 9:5).
In die laaste boek van die Bybel word Christus “die Leeu uit die stam van Juda” genoem (Op 5:5). Hy het dus hierdie profesie vervul. Hy is die finale regeerder wat tot in ewigheid sal regeer, want Hy is God. Hy is die hoogtepunt van die geskiedenis. Sy koms sal alles tot ’n einde bring en alles weer nuut maak.
GEBED: “Ons het U baie nodig. Kom tog gou, Here Jesus!”
Lees vanaand in Genesis 49:14–33 watter seën Jakob vir elke seun gee, en hoe hy sy finale opdragte gee.
VRYDAG 8 MAART 2013
Lees eers Genesis 50:1–14
Staatsbegrafnis
“Gaan, en begrawe jou vader soos hy jou met ’n eed laat beloof het” (Gen 50:6).
GESELSVRAAG: Hoe wil jy graag eendag begrawe word?
“Ek was nie by sy begrafnis nie, maar ek het ’n mooi kaartjie geskryf om te sê dat dit my goedkeuring wegdra,” het Mark Twain oor een van sy kennisse vertel. “Die mense wat aandring op ’n gestrekte lykswa met ses wiele en ’n monument van ’n grafsteen is juis dié wat dit nie kan bekostig nie,” sê ’n begrafnisondernemer onlangs. Dit is tog eienaardig hoe mense dink dat ’n goeie begrafnis verkeerde sake kan regmaak. By die begrafnisdiens word so baie mense salig verklaar wat beslis nie daarvolgens gelewe het nie.
Farao het baie respek vir Josef gehad, en daarom het hy gesorg dat daar ’n behoorlike begrafnis gehou word, met al die regte toesprake deur hoogwaardigheidsbekleërs en professionele huilendes en al. Die stoet was indrukwekkend, sodat die mense van die buurt vir geslagte daarna nog daaroor gepraat het. Dié begrafnis het selfs