Uit die Beek 2013. Attie van Wijk
aan dié wat nog onervare is,” getuig Dawid in Psalm 119:130.
Waar ons die nuwe jaar saam begin, en vir mekaar ’n voorspoedige Nuwejaar toewens, kan ons begin deur vir mekaar die nodige lig toe te wens, sodat ons die regte keuses sal maak. Die Bybel is bedoel om lewens te verander, en dit sal ook met jou in hierdie jaar gebeur as jy gewillig is om na God se Woord te luister. Dan word jy ook deel van die lig vir die wêreld (Matt 5:14). Kom ons skyn vir die Here op hierdie dag vir elkeen wat ons gaan ontmoet.
GEBED: “Here, gee my u lig, sodat ek lig kan wees.”
Lees vanaand Genesis 1:14–25 en let op hoe die tweede stel van drie dae by die eerste drie pas.
WOENSDAG 2 JANUARIE 2013
Lees eers Genesis 1:26–2:4a
God se verteenwoordiger
“God het die mens geskep as sy verteenwoordiger, as beeld van God het Hy die mens geskep, man en vrou het Hy hulle geskep” (Gen 1:27).
GESELSVRAAG: Waar en hoe moet ons God vanjaar verteenwoordig?
“As ons dan na die beeld van God geskep is, beteken dit dat Hy ook hande en voete soos ons het?” is ’n gewilde vraag in die katkisasieklas. God is Gees, alomteenwoordig en het dus nie ’n liggaam soos ons dit ken nie, al het so baie skilders Hom al as ’n ou man met ’n baard probeer voorstel. Paulus sê ons moet al hoe meer na die beeld van God verander word: “Julle gees en gedagtes moet nuut word; lewe as nuwe mense wat as die beeld van God geskep is: lewe volkome volgens die wil van God en wees heilig” (Ef 4:23–24). Ons is dus geskep om volmaak gehoorsaam en toegewy te lewe.
Ons moet erken dat ons almal nog ’n ver pad het om te gaan. Daarom moes Jesus kom as die volmaakte beeld van God (2 Kor 4:4; Kol 1:15). Hoe meer ons soos Jesus word, hoe meer word ons wat God bedoel het dat ons moet wees. Dit kan net gebeur as ons baie tyd met Hom deurbring en Hom al beter leer ken. Hoe meer ons onsself aan die Heilige Gees oorgee, hoe meer word ons soos Jesus.
Orals waar ons vandag gaan beweeg, is ons God se verteenwoordigers. Die mense moet iets van Jesus in ons sien. Wat moet verander? God wil deur ons werk en na ander uitreik.
GEBED: “Maak my al meer soos Jesus, o Heilige Gees.”
Lees vanaand in Genesis 2:4b-17 wat die Here se opdragte aan die mens was en is. Dink wat dit vandag beteken.
DONDERDAG 3 JANUARIE 2013
Lees eers Genesis 2:18–25
Die gelukkige huwelik
“Daarom sal ’n man sy vader en moeder verlaat en saam met sy vrou lewe, en hulle sal een word” (Gen 2:24).
GESELSVRAAG: Hoekom is so min huwelike werklik gelukkig?
“Dit is nie goed dat die mens alleen is nie,” (v 18) het ons een seun op sy Skype-bladsy geskryf terwyl sy vrou sonder hom in ander lande moes reis. En hy was die een wat meermale gesê het dat hy nooit wil trou nie, want so min van sy maats is gelukkig getroud. Maar dit was voor hy vir Esther ontmoet het. Vandag is hulle baie gelukkig saam, al moes hulle baie kultuurgrense oorwin. Sy is Sjinees van geboorte! Maar hulle vul mekaar wonderlik aan, en is saam baie vrugbaar in die Here se diens.
Toe die Fariseërs vir Jesus oor die huwelik uitgevra het, het Hy dadelik na vers 24 hierbo verwys (Matt 19:6). Paulus het ook dadelik aan hierdie vers gedink toe die Korintiërs hom oor die huwelik uitgevra het (1 Kor 6:16). Jesus en Paulus het duidelik nie hierdie verse as legendes en mites beskou nie, maar as die gesaghebbende en geïnspireerde Woord van God.
Walter Trobisch wys in een van sy boeke die drie dele van ’n gelukkige huwelik: “verlaat” (openbare huweliksluiting), “aankleef” (liefde en trou) en “een vlees wees” (die seksuele aspek). As ons probleme met een aspek het, moet ons dadelik daaraan werk, sodat ons waarlik saam die beeld van God kan wees.
GEBED: “Here, maak ons huwelik soos U dit bedoel het.”
Lees vanaand in Genesis 3:1–13 hoe die sondeval alles op die aarde beskadig het. Daarom moes Jesus kom om alles te herstel.
VRYDAG 4 JANUARIE 2013
Lees eers Genesis 3:14–24
Sonde vernietig
“Stof is jy, en jy sal weer stof word” (Gen 3:19).
GESELSVRAAG: Hoekom is dit goed om te weet die lewe is tydelik?
“Mamma, Dominee sê dat mense uit stof gemaak is. Hy sê ook dat ons eendag weer stof gaan word.” “Dis waar, Jannie. Wat wil jy vra?” “Mamma moet kom kyk. Daar onder my bed is daar iemand besig om te kom of te gaan.”
Die hartseergeskiedenis wat ons vandag gelees het, lui die tema in wat ons weer en weer in die Bybel lees: Die ongehoorsaamheid van een oomblik kan ’n leeftyd van spyt meebring. Ons het dus nodig dat die Here ons keer op keer herinner aan wat reg is, sodat ons die regte keuses sal maak. Adam en Eva se huwelik het ’n lelike knou gekry. Hulle het gedink hulle doen reg toe hulle ongehoorsaam was – die versoeking het tog so logies geklink – maar nou ly die hele wêreld en ook hul nageslag aan die gevolge.
Versoekings is altyd aantreklik – anders sou ons tog nie daarvoor geval het nie. Maar die bitter vrugte wat op die toegewing aan versoeking volg, wys vir ons waarom ons liefdevolle Hemelvader ons wil voorkeer sodat ons nie seerkry nie. Kom ons neem ons voor om elke dag na God se Stem te luister, sodat ons staande kan bly.
Hierdie geskiedenis herinner ons ook daaraan dat die lewe maar net tydelik is. Ons is op pad na die ewigheid. Daarom moet ons ons tyd, en die mense en besittings wat die Here aan ons toevertrou, só bestuur dat dit ewigheidswaarde kan hê.
GEBED: “Here, bewaar ons vandag teen versoekings.”
Lees vanaand Genesis 4:1–16 en let op die drie draaipunte in Kain se lewe.
SATERDAG 5 JANUARIE 2013
Lees eers Genesis 4:17–26
’n Skrefie hoop
“In daardie tyd het die mense begin om die Naam van die Here aan te roep” (Gen 4:26).
GESELSVRAAG: Hoe kan ons optrede ons kinders seermaak?
“Alle sonde is die gevolg van selfsug,” het professor Paul Krishna eendag teenoor my genoem. Hoe meer ’n mens daaroor nadink, hoe meer is ’n mens geneig om saam te stem. Kain se verskoning ná Abel se moord is ’n toonbeeld van liefdeloosheid. As hy sy straf hoor, dink hy nog steeds net aan homself. Nooit vra hy God of sy ouers om vergifnis nie. Selfs sy nageslag se woorde teenoor sy vrouens wys hoe selfsugtig hierdie geslag was (v 23–24).
“As God ’n deur toemaak, dan maak Hy ’n ander een oop,” hoor ek meermale. In Adam en Eva se geval was dit waar. Hul verkeerde keuse het ook hul kinders geraak. Op een dag het hulle albei hul seuns verloor. Abel is vermoor. Kain is weggejaag van die ander mense af. Sy ouers het alleen agtergebly. En toe kry hulle nog ’n seun: Set. Sy naam beteken “bly woon” of “plaasvervanger”. Met Set het ’n nuwe geslag begin. Uit hom is Noag gebore en uiteindelik ook Jesus Christus, die Messias. God was met Set besig, en in sy leeftyd het hulle weer begin om te bid.
Dalk het jou ouers – of jou kind – jou baie seergemaak. Moenie uit selfsug jou seer vertroetel nie. God gee tweede kanse. Jy kan ’n nuwe lewe saam met Hom begin.
GEBED: “Here, dankie dat my verlede my nie hoef terug te hou nie.”
Lees vanaand Genesis 5:1–24 en let op dat net Set se nageslag genoem word.
SONDAG 6 JANUARIE 2013
Lees eers Psalm 80:1–12
’n Nuwe begin
“Almagtige God, laat dit weer met ons goed gaan, verskyn tog tot ons redding!” (Ps 80:8).
GESELSVRAAG: Wat is jou een groot gebed vir hierdie jaar?
“Wat kan ons vandag vir ons land bid?” is ’n goeie beginpunt vir hierdie jaar. In baie gemeentes word die eerste week van die jaar,