Uit die Beek 2013. Attie van Wijk
hoekom is al hierdie ou foto’s van oupa en ouma dan net swart en wit?” “Dit is omdat die wêreld destyds regtig so gelyk het, my kind. Kleur is eers later uitgevind,” maak sy pa hom wys. Dit is gelukkig nie waar nie, hoewel daar ’n tyd was dat jy Model-T Fords net in swart kon koop. (Dit was die enigste kleur wat destyds vinnig genoeg droog geword het.)
“Ons reënboognasie,” het president Mandela graag gesê. “Ek het nog nooit ’n reënboog gesien met swart daarin nie,” het een ou boer gebrom.
Die kleurvolle reënboog het egter ’n boodskap van genade vir ons. Nooit weer sal alle mense op aarde tot niet gaan nie. Dit is dus ’n teken van God se onverdiende liefde. Watter vreugde is dit nie om ’n volledige – selfs dubbele – reënboog te sien nie! Kyk maar vandag om jou, en probeer jou indink hoe dinge sou gelyk het as ons oë nie kleur kon onderskei nie.
Ons wonderlike Skepper en Vader maak die skepping nie net mooi nie. Hy gebruik dit om ons van sy liefde te verseker. Hy gebruik die reënboog, die son, maan en sterre – en selfs mense! Wys iemand vandag hoe lief Hy hom of haar het.
GEBED: “Dankie dat U ons op so baie maniere van u liefde verseker, Hemelvader.”
Lees vanaand in Genesis 10:1–12 waar die verskillende volke van vandag vandaan kom. Almal is familie!
SATERDAG 12 JANUARIE 2013
Lees eers Genesis 10:13–32
Familie sonder grense
“Uit húlle het die nasies oor die aarde versprei ná die oorstroming” (Gen 10:32).
GESELSVRAAG: Waar het ons oral familie?
“Ja, dit is net soos jul witmense is,” verklaar ’n plakker met oortuiging. “Julle klim in die ark in en seil weg, en julle los die res van ons buite sodat ons almal verdrink.” Hy het seker nie mooi gedink nie. As sy voorouers almal verdrink het, dan het hy mos nie bestaan nie!
As daar een ding is wat die Bybel vir ons wil duidelik maak, is dit dat alle mense familie is. Sommige van ons is meer bevoorreg as ander, maar ons bly familie. Ook in ’n ander opsig word ons familie, die oomblik as ons Jesus Christus as Verlosser aanneem (Joh 1:12). Jy word ’n broer of suster van elke ander kind van God. Maar ’n mens voel darem nader aan sommige as aan ander. Ek onthou eenkeer toe ek by ’n sendingkonferensie in Singapoer was, en ’n Xhosa-kollega daar instap. Skielik het ek baie nader aan hom gevoel as aan die Amerikaners en Australiërs wat in die meerderheid was. Ons was albei van Afrika! Ons is broers!
Daarom is dit so hartseer as xenofobie mense uit mekaar dryf. Ons sien mense as ’n bedreiging in plaas van ’n geleentheid. Tydens ons eerste besoek aan Hongkong het ons die eerste Sondag na ’n internasionale erediens in die hotel gegaan. Die Sjinese gelowiges het moeite gedoen om ons tuis te laat voel. Dit het ons beskaam, want ons kon ons toe voorstel hoe daardie Sjinese gelowiges in ons tuisgemeente verwelkom sou word! Of nie.
GEBED: “Dankie dat ons aan u familie kan behoort, Hemelvader.”
Lees vanaand in Genesis 11:1–9 hoe die ongehoorsaamheid van mense tot vandag se taalverwarring gelei het.
SONDAG 13 JANUARIE 2013
Lees eers Psalm 81:1–11
Geesdriftige kerkgangers
“Jubel tot eer van God ons sterkte, juig tot eer van die God van Jakob!” (Ps 81:2).
GESELSVRAAG: Wat moet verander sodat ons met lus kerk toe gaan?
“Ons is nie haastig huis toe nie. Dit is mos lekker by die kerk!” verduidelik ’n swart lidmaat waarom hul dienste twee tot vier ure lank duur. Hulle sing met lus, en harmoniseer outomaties. Beurtsange is geen probleem nie. Die manne doen dit sonder om geleer te word. Hoe meer kere die lied herhaal word, hoe beter. En almal se lywe swaai saam. Hulle kan nie verstaan hoe ons die Here kan loof terwyl ons soos stywe pilare staan nie. Ons gesigte wys ook nie juis dat ons bly is oor die Here nie.
Die Afrika-manier van aanbidding is baie nader aan die Bybelse manier as die manier waarop ons dit doen. Lees weer die beskrywing van die sang en musiekinstrumente. Daar is geen orrel om die sang te oordonder nie. Ons kan mos nie meer harmoniseer nie. Almal sing dieselfde note. Of bly saam stil!
Kom ons neem ons voor om vandag die Here skaamteloos te loof, al sê of dink ander mense ook wat. Dit gaan nie oor wat die mense sê nie, want ons kom saam om God te loof. Hý is die middelpunt van die aandag, nie die mense nie. Ons gaan nie kerk toe om vermaak te word nie, maar om te aanbid.
GEBED: “Here, gee ons vandag ’n ware ontmoeting met U.”
Lees vanaand in Psalm 81:12–17 hoe mense God se seën misloop deur hul ongehoorsaamheid.
MAANDAG 14 JANUARIE 2013
Lees eers Genesis 11:10–32
Die Messias se voorgeslagte
“Sarai was onvrugbaar; sy het nie kinders gehad nie” (Gen 11:30).
GESELSVRAAG: Wat omtrent jou voorgeslagte maak jou bly?
“Ai, ek is so jammer dat ek nooit my ouers en grootouers oor die voorgeslagte uitgevra het nie,” sê iemand nou die dag. Dit is so interessant om te weet wie jou voorgeslagte is en wat hulle gedoen het. Vir my was dit hoogs interessant om die spoor van die Van Wijks terug te neem tot 1620 toe die vroegste bekende Adriaan in Wijk by Duurstede in Holland gebore is.
“My voorouers was uit die Franse adel in die vyftiende eeu,” spog ’n hoogmoedige vrou. “En joune?” “Nee, ek is bevrees ons rekords het met die sondvloed verlore gegaan,” antwoord haar vriendin met ’n glimlag.
Genesis 1–11 is die voorspel vir God se werk met mense. Ons het vandag van Abram gelees, en hy is die voorvader van Jesus, die Messias. Ons gaan nog baie keer oor hom lees, want die verbond wat God met hom gesluit het, geld tot vandag toe nog. As jy ’n gelowige Christen is, dan is jy ook ’n afstammeling van Abraham (Gal 3:9, 14, 29). Ons moet dus mooi oplet wat ons van Abraham sal leer, want hy is ons voorvader. Dit is van ons familie wat ons hier meer gaan leer! Dieselfde God wat met Abraham en Sara gewerk het, werk ook met ons en ons kinders. Kom ons loof Hom daarvoor! Hy wil ons en ons nageslag gebruik om die wêreld te verander. Niemand hoef kinderloos te wees nie, want ons kan mense help om kinders van God te word. Dan is ons hul geestelike ouers.
GEBED: “Dankie dat U ook na my toe uitreik, liefdevolle Vader.”
Lees vanaand Genesis 12:1–9 en let op die twee kante van die verbond wat die Here met Abraham gesluit het.
DINSDAG 15 JANUARIE 2013
Lees eers Genesis 12:10–20
Vrees lei tot leuens
“Waarom het jy my nie gesê sy is jou vrou nie?” (Gen 12:18).
GESELSVRAAG: Wanneer raak ons so maklik oneerlik? Noem op.
“Dis nie ek nie, dis Sussie,” sê ons kleinseun met ’n onskuldige gesiggie, al was hy die skuldige. Ai, die erfsonde darem! “Al loop die leuen ook hoe snel, die waarheid agterhaal hom wel,” sê die spreekwoord. “Dit is moeilik om te glo dat iemand anders die waarheid praat, as jy self in sy plek sou gelieg het,” het Henry Louis Mencken iewers geskryf. “Iemand wat glo ’n wit leuentjie is toelaatbaar, word gou kleurblind,” het iemand anders gesê.
Selfs die geloofsheld, Abram, het ook maar sy swak oomblikke gehad. Hy was bang dat die Egiptenaars hom sou doodmaak ter wille van sy mooi vrou, en was selfsugtig genoeg om haar liewer op te offer om sy eie voordeel te verseker. Is dit hoe ’n geloofsheld maak? God het seker gemaak dat die waarheid uitkom. God haat leuens. Dit is een ding wat jou uit die hemel sal hou (Op 21:8).
Ons moenie vir Abram so gou veroordeel nie. Wie van ons kan eerlik sê dat ons nog nooit ’n leuen vertel het nie? As jy dít sê, is dit beslis ’n leuen. Praat jy net die hele waarheid as jy iemand anders bespreek? Erken jy jou skuld as die verkeerskonstabel jou voorkeer? Vul jy jou inkomstebelastingvorm pynlik eerlik en volledig in? Is jy altyd eerlik teenoor jou lewensmaat of jou kinders? En as jy jou ou