Uit die Beek 2013. Attie van Wijk
jy weet jy gaan net die hele tyd lag. Hulle lag vir hulself. By ander mense is dit ’n pyn om te gaan kuier, want hulle kla oor alles. Niks is goed nie. Mense probeer hulle maar vermy. Van watter soort is jy?
Ons lees keer op keer van lag in Isak se geskiedenis. Abram en Sarai het gelag toe hulle die eerste keer hoor dat hulle wel nog ’n kind sal kry. Maar hy het nie opgedaag nie. En nou, toe Abraham 100 jaar oud is en sy vrou 90, daag die beloofde seun eers op. En daar word gelag. Geen wonder dat die seuntjie die naam Isak (lag) gekry het nie. Sou hy self ’n vrolike seuntjie gewees het? (Soms wonder ek waarom sy pa eers 40 jaar later ’n bediende moes stuur om vir Isak ’n vrou te soek. Sou hy dalk vreeslik skaam gewees het?)
Vreugde is een van die vrugte van die Heilige Gees. Die Here het nie bedoel dat ons met lang gesigte moet rondloop nie. Toe, glimlag ’n slag! Ontdek vandag hoe aansteeklik dit is.
GEBED: “Dankie vir die vreugde wat net U kan gee, Here.”
Lees vanaand in Genesis 21:9–21 oor die moeilike tyd wat Hagar en Ismael deurgemaak het, en hoe God vir hulle gesorg het.
SATERDAG 26 JANUARIE 2013
Lees eers Genesis 21:22–34
Goeie bure
“Beloof my dan nou met ’n eed ... dat jy net so eerbaar sal optree teenoor my en teenoor die land waarin jy nou woon, as wat ek teenoor jou opgetree het” (Gen 21:23).
GESELSVRAAG: Wat help goeie verhoudings tussen bure aan?
Sonde met die bure het CJ Langenhoven sy boek genoem waarin hy gespot het met die verhoudings wat so maklik tussen bure skeefloop. Dit is duidelik dat die probleme nie net van een kant af gekom het nie. Ons het almal bure. Dit is nie altyd so maklik om die buurman of -vrou se optrede te verstaan of te aanvaar nie. ’n Onbedagsame buurman kan die lewe regtig onaangenaam maak.
Abraham en sy buurkoning het hul verhouding herstel nadat Abraham vir Abimelek probeer bedrieg het (Gen 20). Dit is weer die ongelowige wat die eerste stap tot versoening neem. Hy kon sien dat die Here vir Abraham gehelp het (v 22). Daarom soek hy ’n vaste ooreenkoms tussen die twee partye. Abraham het weer gekla oor die put wat van hom weggeneem is. Abimelek het dit ook reggestel, en Abraham het weer met geskenke gereageer. Dit was ’n wen-wen-situasie.
Wat moet ons doen as ons buurman se seun sy musiek te hard speel? Of sy bal oor die heining skop? Of ’n eier teen jou muur stukkend gooi? Dit help niks om jou eie musiek net so hard terug te speel nie. Gaan praat dit uit. Sommige mense is wel baie selfsugtig en onbedagsaam. Moenie een van hulle wees nie.
GEBED: “Here, maak ons goeie bure met almal om ons.”
Lees vanaand in Genesis 22:1–14 die dramatiese verhaal van Abraham se grootste geloofstoets en hoe die Here voorsien het.
SONDAG 27 JANUARIE 2013
Lees eers Psalm 84:1–8
Krag vir elke dag
“Dit gaan goed met mense wat hulle krag in U vind en graag na u tempel toe gaan” (Ps 84:6).
GESELSVRAAG: Wanneer gaan jy graag kerk toe?
“Minder as ’n derde van ons lidmate gaan nog Sondag kerk toe,” het ’n ondersoek bevind. Hoe kan dit dan wees? Het hulle dan nie op die dag toe hulle in die openbaar hul geloof bely het, belowe om getrou te wees nie? Kan dit wees dat hulle nie die eredienste sinvol vind nie? By die gemeente waar ons kinders in die VSA inskakel, is die kerkbywoning Sondae drie maal hul lidmaattal. Hulle moet drie oggenddienste hou, want hul kerkgebou kan net ’n duisend mense op ’n slag hanteer. Hul Sondagskool vir volwassenes is stampvol. Hulle ondersteun meer as 200 sendelinge. Hulle doen iets reg.
Die digter van hierdie psalm het gevoel dat die eredienste vir hom baie gehelp het. Dit was ’n plek van vreugde (v 3). Dit was die plek waar mense krag gekry het vir die week wat voorlê (v 6). Die lofliedere het in hul koppe gedraai en hulle het dit elke dag gesing (v 5). Fonteine van seën het met hulle gegaan waar hulle ook al gaan (v 7). Dit het nie oor die gebou of die preke gegaan nie, maar oor die Here wat hulle daar saam met die gelowiges ontmoet het (v 6).
Het jy krag nodig vir die week wat voorlê? Daar is mos ’n plek waar ons dit kan kry. As jy die week saam met die Here begin, kan dit nie anders as om ’n wonderlike week te wees nie.
GEBED: “Here, vandag het ek U baie nodig vir die week wat voorlê. Rus my toe vir elke uitdaging wat moontlik wag.”
Lees vanaand in Psalm 84:9–13 hoe ons verhouding met die Here die lewe die moeite werd maak.
MAANDAG 28 JANUARIE 2013
Lees eers Genesis 22:15–24
Die seën van gehoorsaamheid
“In jou nageslag sal al die nasies van die aarde geseën wees, want jy het My gehoorsaam” (Gen 22:18).
GESELSVRAAG: Hoe kan ons vir al die nasies tot seën wees?
“Mag ek Andrew Murray se kerk van binne sien?” vra ’n Koreaanse besoeker aan Wellington. Dit blyk toe dat hy as dwelmsmokkelaar in ’n Sjinese tronk tot bekering gekom het deur die lees van een van Andrew Murray se boeke wat in Sjinees vertaal is. Die Here het sy lewe omgekeer en vandag is hy ’n kerkleier in Korea. Andrew Murray se graf en kerkgebou was vir hom ’n heiligdom, want dit was die instrument wat die Here gebruik het om hom in die koninkryk in te bring. So gebruik die Here sy kind nog steeds ’n eeu later om mense te seën.
Vir Abraham was dit ’n geweldige beproewing om sy geliefde seun te moet afgee. Maar hy was nietemin gehoorsaam. God het eerste in sy lewe gekom. En die uiteinde was dat die Here hom kon gebruik om miljoene mense meer as drieduisend jaar later te kon seën. Hy is vandag nog die held van elke Christen, Jood en Moslem. En deur hom het die Messias gekom wat aan die kruis die pad na vergifnis kom oopmaak het.
Wil jy ook vir alle nasies tot seën wees? Gee jouself onvoorwaardelik aan die Here oor. Deur jou gebede, jou gawes en jou getuienis kan jy ook vir baie ander mense tot seën wees. Miskien wil Hy jou vandag nog gebruik.
GEBED: “Hier is ek, Here, gebruik my vandag in u diens.”
Lees vanaand in Genesis 23:1–9 hoe Abraham ’n familiebegraafplaas bekom het.
DINSDAG 29 JANUARIE 2013
Lees eers Genesis 23:10–20
Familiebegraafplaas
“So het die stuk grond met die grot daarop ... oorgegaan na Abraham as begraafplek wat aan hom behoort” (Gen 23:20).
GESELSVRAAG: Waar sou jy graag begrawe wil word?
“O, ek sou darem graag hier begrawe wou word, met hierdie pragtige uitsig op die Bolandse berge,” sê ’n vriendin tydens ’n besoek aan Wellington se begraafplaas. So het ons elkeen seker maar ons finale droomplekkie. Of met so baie grafte wat deesdae geskend en besoekers wat aangerand en beroof word, dink jy dalk eerder aan ’n gedenkmuur. Dit is goed om voor te berei vir die dag dat ons finaal afskeid moet neem. Dit maak dit makliker vir dié wat agterbly. (Is jou testament nog op datum en geldig?)
Vir Abraham was dit baie swaar om van sy vrou afskeid te neem toe sy ná 127 jaar te sterwe kom. Hy het geen vaste eiendom besit nie. Hy was ’n trekboer. Daarom het hy ’n geskikte plek gesoek en gekoop waar Sara – en later ook hyself en sy nageslag – begrawe kon word. Dit is nogal interessant om te lees hoe hulle op tipies Oosterse manier oor die prys van die grond redekawel.
Dit is interessant dat Abraham nie soos ’n plakker die reg in eie hande geneem het en sy vrou sommer net daar begrawe het nie. Hy wou alles reg doen, want God se eer was op die spel. God was met hul gesin op pad. Die verbond het alles verander. Geen wonder dat Abraham vandag nog orals hoog geag word nie.
GEBED: “Here, help ons om voorbereid te wees vir ons sterfdag.”
Lees vanaand in Genesis 24:1–14 die aangrypende verhaal van die biddende slaaf wat vir Isak ’n vrou moes gaan soek.
WOENSDAG 30 JANUARIE 2013
Lees eers