Uit die Beek 2013. Attie van Wijk
nodig. Ons besef dat ons absoluut van ons almagtige God afhanklik is. Sonder Hom is daar geen sekuriteit nie.
“Hierdie is ’n gebed vir nasionale herlewing,” skryf Matthew Henry oor dié psalm. Dit is geskryf ná die koninkryk van Israel in twee geskeur het, en waarskynlik nadat die noordelike koninkryk reeds weggevoer is, want net die stamme van Juda word genoem. Dit was ’n tyd van militêre bedreiging en onsekerheid. Daarom begin hulle ook by die regte plek – by God. Die selfsug van mense lei net tot verwoesting en die dood. Maar God se redding verander harte en maak mense nuut.
Verlang jy ook na ’n magtige werking van die Heilige Gees in hierdie jaar? Dit gaan opoffering en baie gebed kos. Is jy daartoe gewillig? In die Naam van Jesus kan ons bid en ’n antwoord op ons gebede verwag. Hy belowe dit (Joh 16:23).
GEBED: “Openbaar u almag tog weer in ons land, o Heer!”
Lees vanaand in Psalm 80:13–20 hoe God se inisiatief die basis van hierdie gebed vorm. Hoe troos dit jou?
MAANDAG 7 JANUARIE 2013
Lees eers Genesis 5:25–6:4
Genadetyd gaan verby
“Metusalag was dus 969 jaar toe hy gesterf het” (Gen 5:27).
GESELSVRAAG: Wanneer kan ons praat van ’n ontydige dood?
“Was daardie ou mense se jare net so lank soos ons s’n?” wonder ’n vriend nou die dag tydens ’n telefoonoproep. Selfs die 120 jaar van Genesis 6 klink nogal lank in vergelyking met vandag se lewensverwagting. Volgens die CIA se boek van wêreldfeite leef die mense van Macau die langste (gemiddeld 81 jaar) en dié van Swaziland die kortste (gemiddeld 31 jaar). Suid- Afrikaners se lewensverwagting is glo 43 jaar vir mans en 41 vir vrouens. Dit is natuurlik die gevolg van die vigs-pandemie. Dit is die gemiddelde. Baie kinders sterf voor hulle ’n jaar oud is, en ander steek die eeu verby.
Dis interessant om te let dat Metusalag oorlede is in die jaar van die groot vloed. Sou hy dan ook in die oorstromings omgekom het? Dit kan wees, want ons lees dat net Noag en sy kinders volgens God se wil geleef het (Gen 6:9, 12).
Die belangrike boodskap uit al hierdie syfers is seker dat elke mens se lewe net tydelik is. Joune en myne ook. Ons moet dus die beste van elke geleentheid maak om God se wil te soek en te doen (Ef 5:16). Die Here het aan elkeen van ons ’n beperkte tyd op aarde gegee, wat van mekaar verskil (Ps 139:16). Daar is dus nie iets soos ’n ontydige dood nie. En ons kan nie waag om ons bekering uit te stel nie. Eendag gaan dit te laat wees. Gebruik elke geleentheid om van Jesus te getuig (Kol 4:5).
GEBED: “Here, help my om vandag ten volle te benut.”
Lees vanaand in Genesis 6:5–12 hoe die mensdom in sonde verval het. Is ons vandag enigsins beter?
DINSDAG 8 JANUARIE 2013
Lees eers Genesis 6:13–22
Geloof lei tot gehoorsaamheid
“Noag het alles gedoen presies soos God hom beveel het” (Gen 6:22).
GESELSVRAAG: Wat moet jy doen as jy voel dat God jou ’n opdrag gee?
“Die meeste mense is al so hard tot gepreek dat hulle nie God se Woord meer ernstig opneem nie,” kla ’n student wat deelgeneem het aan ’n uitreik in Stellenbosch se omgewing. En baie predikante kom ook tot daardie slotsom as hulle week na week hul harte uitpreek en daar geen reaksie is nie.
Min mense het so ’n lewende verhouding met die lewende God dat hulle God se opdrag in besonderhede verstaan, soos ons hier van Noag lees. Die Here het hom presies voorgesê wat om te doen. Dit was ’n onmoontlike opdrag. Dink net hoeveel bome moet jy afkap om ’n skip te bou wat heelwat langer as ’n rugbyveld is! En drie verdiepings hoog. En dan moet jy genoeg voer vir ’n jaar daarin laai, nog voordat die eerste dier opgedaag het. En die skip moet heeltemal waterdig gemaak word – jy kry nie ’n tweede kans nie.
Noag wil ons iets leer van gehoorsaamheid. “Omdat Noag geglo het, het hy God eerbiedig gehoorsaam toe hy gewaarsku is oor dinge wat nog nie gesien kon word nie. … Sy geloof was ’n veroordeling van die wêreld, maar dit het hom erfgenaam gemaak van die vryspraak wat deur die geloof kom” (Heb 11:7). Die Here Jesus het meermale na hom verwys (Matt 24:37; Luk 17:26).
GEBED: “Here, help my vandag luister en gehoorsaam.”
Lees vanaand in Genesis 7:1–12 hoe die begin van die vloed beskryf word. Let op die klem op gehoorsaamheid.
WOENSDAG 9 JANUARIE 2013
Lees eers Genesis 7:13–24
Plek van veiligheid
“Net Noag en dié by hom in die ark is gespaar” (Gen 7:23).
GESELSVRAAG: Waar is die veiligste plek in krisistye?
“Die land is tans so onveilig. Moet ons nie maar liewer na ’n ander land emigreer nie?” is ’n vraag waarmee baie landgenote tans worstel. En dan emigreer hulle weens die misdaadvlaag in Suid-Afrika, en word in Australië beroof of in Kanada vermoor. Die beste plek om te wees is in die middel van God se wil. En dit is wat die verhaal van Noag ons wil leer.
Baie mense betwyfel deesdae of daar werklik so iemand was. Maar as hy nie gelewe het nie, dan het Esegiël God verkeerd gehoor (Eseg 14:14), dan was Jesus ’n leuenaar (Matt 24:37) en dan was Petrus op ’n dwaalspoor (1 Pet 3:20; 2 Pet 2:5). Ons moet onthou dat die Bybel nie as ’n geskiedenisboek of wetenskaphandleiding bedoel is nie, maar om lewens te verander (2 Tim 3:14–17). Ons moet dus altyd soek na die boodskap wat vir ons bedoel is. As ons dit kan verstaan, sal dit ons lewe ook verander.
’n Boom word aan sy vrugte geken. Kyk mooi wat gebeur as iemand die Bybel ernstig opneem. Sy lewe verander ten goede. En as iemand die Bybel verwerp? Dan loop alles sommer verkeerd. Verstaan dus dat Christus die enigste manier is om gered te word. Hy lewe en wil sy ewige lewe in jou oorplant. Slegs dan sal jy vir ewig veilig wees. En jou huisgesin ook (Hand 16:31).
GEBED: “Here Jesus, ek vertrou op U. Red my en my huisgesin.”
Lees vanaand in Genesis 8:1–12 hoe Noag probeer vasstel het hoe laag die vloed gedaal het. Hoe meet jy jou uitdagings?
DONDERDAG 10 JANUARIE 2013
Lees eers Genesis 8:13–22
Saam op pad
“Gaan uit die ark uit, jy en jou vrou en jou seuns en hulle vrouens” (Gen 8:16).
GESELSVRAAG: Hoe weet ons dat die Here altyd by ons is?
“Die Here sê nie vir Noag ‘Kom uit die ark’ nie, maar ‘Gaan uit die ark uit’. Dit impliseer dat God die hele tyd saam met hulle in hierdie tyd van gevaar en afsondering was,” skryf Matthew Henry as hy hierdie gedeelte behandel. En dit is ’n troos vir ons, maak nie saak wat ons omstandighede vandag is nie.
“Die TV-evangeliste in Indië verkondig ’n voorspoedteologie. As jy net na Jesus toe kom (en groot donasies aan hulle gee), sal dit altyd voorspoedig met jou gaan. Jy is ’n koningskind, en jy moet dus met duur motors ry en altyd gesond wees,” vertel my kollega uit Indië. Daardie soort boodskap is natuurlik nie waar nie. Jesus en sy apostels het diep armoede geken, en Paulus en sy medewerkers het gesondheidsprobleme ervaar al was hulle gelowig en al was hulle aan die Here gehoorsaam. Die Here belowe nie noodwendig voorspoed nie, maar wel dat Hy in alle omstandighede saam met ons sal wees.
Jy voel dalk ook dat jy die laaste ruk in ’n ark ingehok was, sonder uitkomkans. Wees maar rustig. Die Here weet alles, want Hy is daar saam met jou.
GEBED: “Baie dankie dat U in elke omstandigheid saam met my is, Here.”
Lees vanaand Genesis 9:1–11 en let op die maniere waarop die Here die mens se lewe beskerm.
VRYDAG 11 JANUARIE 2013
Lees eers Genesis 9:12–29
Reënboog van genade
“Die reënboog sal in die wolke wees, en wanneer Ek dit sien, sal Ek dink aan die ewige verbond tussen My en