Wanneer God jou vashou. Johan Smit
is
Hy laat my rus in groen weivelde. Hy bring my by waters waar daar vrede is. Psalm 23:2
~
In die Ou Testament word water dikwels voorgestel as die verskil tussen lewe en dood. Die Ou Testament speel af in ’n halfwoestynwêreld. Droogte het hulle eerstehands ervaar. En gebrek aan water het gewoon net op die dood afgestuur. Stel jou ’n skaaptroppie voor wat in die warm woestynson agter ’n herder aanloop terwyl die drang na water toeneem. Weet die herder waarheen hy op pad is?
Die Here is my herder … Hy bring my by waters waar daar vrede is. By geleentheid het die psalmdigter die volgende lied gesing: “Soos ’n wildsbok smag na waterstrome, so smag ek na U, o God. Ek dors na God, na die lewende God. Wanneer kan ek gaan en voor God verskyn? Dag en nag is ek in trane, want sonder ophou sê hulle vir my: ‘En waar is jou God nou?’” (Ps 42:2–4).
Ons moet eers ’n oomblik lank hier stilstaan, by die man wat soos ’n wildsbok na water smag, na sy God smag. Dors na God – waarom? Wanneer? Gebeur dit nie gewoonlik wanneer jou lewe bedreig word nie? Wanneer jy lewensin verloor het nie? Wanneer niks tog meer sin maak nie? Dan dors jy na die lewe. En dan soek jy dit by die lewende God. En ja, jy hoor hoe mense spottend jou geloof bevraagteken, jou God verkleineer. Waar ís my God?
Psalm 23 kom sê vir jou die Here, jou lewende God, is jou herder. Hy sal jou by die waters bring waar daar vrede is. Vrede is die mooi woord wat “heelmaak” beteken. God wil graag hê dat ons heel mense sal wees.
God wil vir jou ’n vervulde lewe gee te midde van ’n stukkende wêreld.
7 Februarie
Waters van vrede
Hy bring my by waters waar daar vrede is. Psalm 23:2b
~
’n Oase, ’n plek wat water vir die moeë woestynreisiger bied, bly sekerlik een van die mees gesogte woestynervarings. Dit kan ongelukkig ook ’n lewensgevaarlike plek wees. Boosdoeners kan hulle daar skuilhou om niksvermoedende reisigers te beroof. Dit kan ’n plek van onrus en geweld wees. Daarom is die herder bedag op die moontlike gevare. Hy ken die pad. Hy weet waar die veilige waterbronne is. Hy lei sy skape na waters waar daar vrede is.
Ons hoef nie oor ons behoefte aan vrede veel te sê nie. Dit is en bly een van die brandendste behoeftes van ons tyd. Ons is moeg van spanning en geweld en onrus. En selfs wanneer ons soek na omstandighede waar ons in vrede kan ontspan en die lewe kan geniet, word dit so dikwels in tonele van geweld omskep. Dink maar aan plaasmoorde waar die duiwel ’n oase van rus en vrede omskep in ’n toneel van onsinnige geweld en moord.
Ons smag na waters waar daar vrede is. En ons Herder ken die pad daarheen. Vertrou Hom. Volg op sy voetspore. En ervaar wat vrede beteken, naamlik om met God en mens en omgewing in harmonie te verkeer. Vrede is lewensvervulling, om jou doel te bereik, om dié mens te wees wat God vir jou bedoel het om te wees.
En wat van al die onrus, onvrede? Wees jý die draer van die vredesboodskap. Vertel jý vir die wêreld van die Herder wat ’n mens by waters van vrede bring. Begelei jý mense na die Bron van rus en vrede.
Wees jy die herder wat mense na die Bron van vrede begelei.
8 Februarie
Nuwe krag
Hy gee my nuwe krag. Psalm 23:3a
~
Die sleutelwoord in hierdie teksvers is “krag”. Waarvoor het ’n mens krag nodig? Nee, kom ons begin by die skaap – waarvoor het ’n skaap krag nodig? Ek reken die digter het lewenskrag in gedagte, die krag om op te staan en die pad vorentoe aan te durf.
Lewenskrag. Ek het al so baie kere gehoor dat iemand sê dat hulle nie meer krag het om aan te gaan nie. Hulle is moeg, uitgeput, heeltemal van lewenslus en lewenskrag beroof. Die impak van slegte omstandighede, ’n uitmergelende siekte, ’n stormagtige verhouding of ’n geldelike krisis was net te oorweldigend.
Elia, die profeet wat die duisende Baälpriesters op hulle neuse laat kyk het, bevind homself onder ’n besembos – kragteloos, uitgeput, gereed om dood te gaan. Waarom? Omdat omstandighede anders uitgedraai het as wat hy verwag het.
’n Mens moet daarteen waak om jou eie krag te oorskat. As jy op die kruin van die golf ry, moet jy onthou dat die golf kan breek. Sukses is soos ’n dwelmmiddel, dit laat jou kop draai en soms tred verloor met realiteite. Die oorsaak vir kragteloosheid is soms dinge van buite soos slegte omstandighede. Ander kere weer is jyself die oorsaak. Soms kan dit toegeskryf word aan depressie of ’n gevoel van minderwaardigheid of luiheid.
Stel gerus eers vas waarom jy by geleentheid (miskien vandag?) kragteloos voel. En vertel dit vir jou Herder. Vra Hom om die belofte van krag vir jou waar te maak. En wag op Hom. Soos wat Elia onverwags deur ’n engel op die been gebring is, sal die Herder jou ook ophelp.
God het nog nooit iemand wat sy algehele afhanklikheid van Hom bely het in die steek gelaat nie.
9 Februarie
Die krag van God
Die Here is my herder … Hy gee my nuwe krag. Psalm 23:1, 3a
~
Die Nuwe Testament het ook heelwat te sê oor die krag van God. Wat maar net weer bevestig dat gelowiges oor eeue heen hulle brose kragteloosheid besef het en na God uitgereik het vir krag, nuwe krag, om ’n nuwe dag met al sy uitputtende uitdagings aan te pak.
Maar hoe werk dit? Watter soort krag kry ons van God? Is dit fisieke krag, liggaamskrag, of emosionele krag, ’n soort van sielkundige toerusting? Ek reken nie ’n mens moet oor God se manier van doen te tegnies raak nie. God werk op misterieuse maniere. Soms ervaar ’n mens daardie “bomenslike” hervulling met krag wat jy net nie kan verklaar nie. Dit gebeur net. En jy weet dit kom van God. Mense sê dis alles net in jou kop, ’n positiewe gesindheid, die vibes wat net reg is. Maar jy weet dis iets anders. Iemand anders. God.
Paulus sê ons beskik oor dieselfde krag waarmee Christus uit die dood opgewek is. Dié teks verwonder my. Ek kan dit nog nie lekker kop nie. Waar is die krag? Hoe kom dit tot uitdrukking? Natuurlik praat Paulus van ’n geesteskrag. Geesteskrag? Die krag van die Heilige Gees wat in my en jou lewe teenwoordig is. Hy is daar. Stel jou lewe tot sy beskikking. Gee die strome van lewende waters kans om deur jou te vloei.
En só ervaar jy hoe die Herder jou elke nuwe dag met nuwe krag toerus. Dan ontdek jy wat Paulus bedoel as hy sê: “Ek is tot alles in staat deur Hom wat my krag gee.” Dan verstaan jy wat gebeur as die drie-enige God in volle beheer van jou lewe is.
“Maar julle sal krag ontvang wanneer die Heilige Gees oor julle kom …” (Hand 1:8).
10 Februarie
Die eer van sy Naam
Hy lei my op die regte paaie tot die eer van sy Naam. Psalm 23:3
~
Waaroor gaan dit regtig in die lewe van ’n gelowige? Aan die begin van Psalm 23 val die klem op die goeie Herder wat versorg en beskerm, wat rus en vrede gee. En dit is natuurlik presies wat ons, sy skape, so graag wil hê. Dit is hoe ons graag aan ons God dink. Dit gaan immers alles oor ons – ons gerief en veiligheid en geluk. Vandag hoor ons dat ’n keuse vir die regte pad nie in die eerste plek oor óns gaan nie, maar oor God.
Om die regte pad te volg, is ’n keuse vir God se plan vir ons lewe. Dit is ’n keuse om God se doel vir ons lewe te verwesenlik. En gevolglik is dit ’n keuse ter wille van sy Naam. God se Naam kom op die spel in die keuses wat ons uitoefen – nie as willose skape nie, maar as mense in wie se lewens die beeld van God na vore moet kom. God se Naam is ten nouste verweef met ons name. Want ons is kinders van God. Hy is nie net ons Herder nie, maar ons Vader. En mense sien in ons lewens, in ons manier van lewe, of ons al meer soos ons Vader optree, of ons in woord en daad al meer