Uit die beek 2014. Attie van Wijk
raaksien. Waar sien jy Hom werk?
Maandag 17 Maart 2014 Lees eers Markus 6:14-20
Skuldige gewete
Toe Herodes dit dan hoor, het hy gesê: “Die Johannes wat ek onthoof het, is uit die dood opgewek.” – Mark 6:16
GESELSVRAAG:
Wat glo nie-Christene?
“As iemand nie in God glo nie, sal hy sommer enigiets glo,” skryf iemand op die internet. Die waarheid hiervan is duidelik te sien. Mense wat nie in God glo nie, glo in geeste, en toorkuns, en ruimtewesens en superhelde met bonatuurlike vermoëns.
Die mense in Jesus se tyd het maklik geglo dat iemand uit die dood opgestaan het. Dit was vir hulle die verklaring van Jesus se wonderwerke. Ook koning Herodes was daarvan oortuig dat hy Johannes was wat uit die dood opgestaan het. Mense het dit maklik geglo. Maar toe Jesus werklik uit die dood opgestaan het, wou hulle dit nie glo nie. Selfs vandag sal ongelowiges enigiets glo, behalwe dat Jesus is soos ons Hom in die Bybel leer ken.
Herodes het groot respek vir Johannes die Doper gehad. Hy het Johannes wel op aandrang van sy vrou laat arresteer, maar het tog gereeld na hom geluister. Hy het geweet dat hy ’n boodskapper van God is. Dit was nie lekker om te hoor sy verhouding met Herodias was sondig nie (sy was immers Herodes se broer Filippus se vrou), maar hy het geweet hy was ’n man van God. Nadat hy in die slagyster getrap het en gedwing was om Johannes te laat onthoof, het hy geen vrede daaroor gehad nie. Jou sonde haal jou altyd in.
GEBED:
Here, ek wil U leer ken soos U werklik is. Maak dus u Woord elke dag vir my oop dat ek kan verstaan.
Lees vanaand in Markus 6:21-29 hoe Johannes ná ’n dans sy kop verloor het.
Dinsdag 18 Maart 2014 Lees eers Markus 6:30-34
Vakansie!
[…] Kom julle alleen saam na ’n stil plek toe en rus ’n bietjie. – Mark 6:31
GESELSVRAAG:
Hoekom het ons soms vakansie nodig?
“’n Predikant moet altyd sy vakansie vat. Al het hy dit nie nodig nie, dan het sy gemeente wel,” het oom Hannes graag geskerts. Deesdae verplig kerkrade hul leraars om verlof te neem, anders moet hulle volgens die jongste arbeidswetgewing uitbetaal word vir die ongebruikte rustyd.
Die apostels is uitgestuur as deel van hul indiensopleiding. So ’n tyd veroorsaak nogal heelwat stres, want jy werk elke dag met mense se probleme, en jy kom ook soms teenstand teë. Ná so ’n tyd van uitgee voel jy soos ’n uitgedroogde lap, al leer jy gou dat jy ook elke dag jou tenkie moet volmaak sodat jy meer het om uit te gee. Toe die dissipels terugkom, het Jesus eerste van alles vir hulle die kans gegee om te vertel wat alles gebeur het. Hierdie ontlonting (debriefing) is baie belangrik, of jy nou op ’n korttermyn- of langtermynuitreik was.
Die dissipels het seker uitgesien na hierdie tydjie van rus – en toe werk dit heel anders uit. Weg van die skare het daar al weer ’n ander skare gewag – almal mense wat die Here nodig gehad het. So het hulle geleer dat jou vakansie ook vrugbaar kan wees. En hulle sou sommer ’n paar baie belangrike lesse byleer. Ons het seker al geleer die Here is ook in ons vakansies met ons besig!
GEBED:
Dankie vir tye van rus, Here. Help my om dit ten beste te gebruik sodat selfs sulke tye tot u beskikking is.
Lees vanaand in Markus 6:35-44 hoe die Here in noodgevalle kan voorsien, wanneer ons alles gee wat ons het.
Woensdag 19 Maart 2014 Lees eers Markus 6:45-52
Tyd vir toetsing
[…] Wees gerus, dit is Ek. Moenie bang wees nie. – Mark 6:50
GESELSVRAAG:
Watter tyd in jou lewe was vir jou besonder moeilik?
“Ek hoor en ek vergeet; ek sien en ek onthou; ek doen en ek verstaan,” het Confucius gesê. Ander mense het weer beweer dat ’n mens net 10% onthou van wat jy lees, 50% van wat jy sien en hoor, en 80% van wat jy doen. Dit is natuurlik ’n growwe veralgemening. Maar ’n mens kan nie uit ’n boek leer viool speel sonder om een in jou hande te hê nie. Dit is net deur oor en oor te oefen dat ’n mens enige musiekinstrument kan baasraak.
Die dissipels het baie gehoor van wat Jesus sê. Hulle het ook gesien wat Hy doen. Toe moes hulle leer deur te doen. Die eerste les was gehoorsaamheid. Jesus het hulle beveel om in die skuit te klim en sonder Hom oor te vaar na die westekant van die meer. Toe moes hulle leer vertrou terwyl alles teen hulle was. Hulle moes steeds vertrou toe ’n spook op die water na hulle aangestap kom nadat hulle reeds uitgeput was van die roei. En toe vind hulle uit die “spook” was Jesus wat nog steeds besig was om hulle op te lei. Jesus het hulle nie vergeet nie. Hy was besig om vir hulle te bid, daar op die berg, en Hy was besig om hulle dop te hou om te sien wat hulle doen (Mark 6:45, 48).
Ons kry ook soms moeilike opdragte. Dit is ’n toets vir gehoorsaamheid. Ons geloof word getoets in die storms wat ons lewe oorval, en ook deur die dinge wat met ons gebeur wat ons nie kan verstaan nie. Hou moed! Jesus bid vir jou. Hy vorm jou daardeur.
GEBED:
Vorm my, Here, tot u eer – ook deur die toetstye.
Lees vanaand in Markus 6:53-56 hoe gewild Jesus was terwyl Hy mense gehelp het.
Donderdag 20 Maart 2014 Lees eers Markus 7:1-13
Tradisie
So ontneem julle die woord van God sy gesag deur julle oorgelewerde gebruike wat julle op julle beurt weer oorgelewer het […] – Mark 7:13
GESELSVRAAG:
Aan watter vreemde tradisies kan ons dink?
“Jy weet, ek kan dit nie vat as ’n man bly sit wanneer ’n dame die kamer binnekom nie. Hoe is hulle dan geleer?” vra oom Willie. Dit lyk nie asof almal dieselfde tradisie het nie. “Julle kan ons enigiets leer, wys ons net waar staan dit in die Bybel,” sê kerkleiers van die Afrika Onafhanklike Kerke. Toe hulle dus vra om hulle te help om ’n kerkorde saam te stel, het ek gou my Kerkorde van die rak af gehaal. Maar o wee, baie min van wat daarin staan kom uit die Bybel. Is ons tradisies vir ons belangriker?
Die Fariseërs en die skrifgeleerdes het van kleins af geleer hoe ’n mens dinge doen. Maar daardeur het hulle juis nie meer die Bybel gehoorsaam nie, soos ons vandag gelees het. Uiterlike dinge was vir hulle so belangrik dat hulle nie meer gevra het wat vir God belangrik is nie.
In die verlede het die Kerkorde selfs bepaal dat die drag tydens vergaderings swart pakke en wit dasse moes wees. Dit het meegebring dat sinodale besluite nie wettig was indien almal nie só geklee was nie! Dit is mos belaglik. Deesdae is die kleredrag in die meeste gemeentes baie meer informeel. Jesus en sy dissipels het doodgewone drag gedra. Ons kan ook.
GEBED:
Here, help my om aan die gesag van u Woord vas te hou.
Lees vanaand in Markus 7:14-23 die belangrike les dat wat vanuit ons harte kom dikwels meer skade doen as wat ons in ons lywe sit.
Vrydag 21 Maart 2014 Lees eers Markus 7:24-30
Menseregtedag
Regte behandeling
[…] Here, die hondjies eet darem onder die tafel die kindertjies se oorskiet. – Mark 7:28
GESELSVRAAG:
Hoe weet ons wat die regte ding is om te doen?
“Ons eis ’n 12%-verhoging, al is die inflasiekoers net 4%,” sê die vakbond. Maar daardie geld moet iewers vandaan kom. Indien die inkomste nie met 12% groei nie, moet 12% van die werkers dan afgedank word, of die maatskappy moet sluit en dan is almal werkloos. Dit is deesdae