Uit die beek 2014. Attie van Wijk
aan die sonde. – Mark 3:29
GESELSVRAAG:
Wat verstaan jy onder die “onvergeeflike sonde”?
“Het ek nie dalk reeds die onvergeeflike sonde begaan nie? Is daar nog genade vir my?” is ’n vraag waarmee baie mense worstel wanneer hulle hierdie gedeelte lees. Maar as jou sonde jou nog pla, is dit tog ’n duidelike teken dat God nog nie met jou klaar is nie. Die Heilige Gees oortuig jou nog van sonde. God het nie sy rug op jou gekeer nie. Daar is nog hoop vir volkome vergifnis (Mark 3:28).
Die gevaarlikste sonde is egter om die duidelike werk van die Heilige Gees as werke van die duiwel te beskryf. Die skrifgeleerdes het Jesus se werk aan die duiwel toegedig (Mark 3:22). Ten spyte van al die duidelike getuienis en bewyse het hulle halsstarrig geweier om te erken dat Jesus werklik die Messias was. Hy was dan so anders as wat hulle verwag het. Ons moet tog ook versigtig wees om sommer verskynsels wat anders is as waaraan ons gewoond is, aan die duiwel toe te skryf. Die Here werk soms heel anders as wat ons verwag.
Worstel jy dalk vandag nog met sondes uit jou verlede? Onthou, die Bybel sê duidelik dat alle sondes vergewe kan word. Daardie egbreuk, diefstal, moord, leuens, aborsie of watter sonde jou ook al ry, kan volkome vergewe word. “Iemand wat aan Christus behoort, is ’n nuwe mens. Die oue is verby, die nuwe het gekom” (2 Kor 5:17). Jy begin ’n nuwe lewe, skoon en vry!
GEBED:
Dankie dat U al my sondes vergewe, Here Jesus.
Lees vanaand in Markus 3:31-34 hoe Jesus se familie baie groter is as net sy biologiese moeder en broers.
Sondag 9 Maart 2014 Lees eers Psalm 133:1-3
Eensgesind
Hoe goed, hoe mooi is dit as broers eensgesind saam woon! – Ps 133:1
GESELSVRAAG:
Wat veroorsaak onenigheid in die gemeente?
“Stop! Sê gou eers julle teks op,” beveel my skoondogter. Sy het hierdie vers by haar kinders ingedril, en selfs “en susters” ingevoeg om dit meer van toepassing te maak. En dit lyk nogal asof dit help om die gewone onderonsies tussen broers en susters gou te laat bedaar. Elke keer as daar ’n stryery is, moet hulle dit in ’n spreekkoor opsê!
Dit is doodnormaal wanneer daar stryery tussen kinders ontstaan. Elkeen leer nog om hom- of haarself te handhaaf. “Ma! Chris sit sy vinger op my kant van die sitplek.” So leer kinders om binne hul eie gesin te sosialiseer. Enkelkinders mis darem baie! Maar hierdie woorde is net so waar in die gemeente en in die ander kringe waarin ons beweeg. “Die Here het darem snaakse kindertjies,” merk ’n kollega op toe hy van sy gemeente vertel. Dit is nie so maklik om die belange van ander ook op die hart te dra nie. Soveel ongelukkigheid en seerkry is dikwels die gevolg van iets wat in die gemeente gebeur het. Dit hoort tog nie so nie!
Vandag kry ons die kans om aan hierdie eenheid te oefen. Kom ons kyk dus wat ons kan doen om eenheid te bevorder. Dit is baie maklik om ander se foute raak te sien en alles te kritiseer. Kom ons kyk eerder vandag wat alles reg loop en waaroor ons dankbaar kan wees. Ons is hier om mekaar te bemoedig vir die stryd van die week wat voorlê. Eendrag maak mag!
GEBED:
Here, gee vir ons eensgesindheid in ons huis en kerk.
Lees vanaand in Psalm 134:1-3 die seënbede wat destyds op pad na Jerusalem gesing is. Ons sing dit mos vandag nog.
Maandag 10 Maart 2014 Lees eers Markus 4:1-9
Stories wat verryk
Hy het hulle baie deur gelykenisse geleer […] – Mark 4:2
GESELSVRAAG:
Watter storie steek by jou vas?
“Watter preek sal jy nooit vergeet nie?” het ek gereeld gevra wanneer ek kerkraadslede gehelp het om boodskappe voor te berei. Feitlik sonder uitsondering vertel hulle dan nie van ’n teks nie, maar van ’n illustrasie wat ’n prediker gebruik het wat in hul geheue vasgesteek het! Mense onthou eenvoudig stories makliker. Eeue lank was die stories wat om die kampvuur vertel is, die manier van onderrig. Sommige mense het eenvoudig die gawe om ’n storie so te vertel dat jy aan sy of haar lippe hang.
Jesus het ook hierdie metode gebruik. Hy het graag voorbeelde uit die alledaagse lewe gebruik om diep lesse duidelik te maak. En die mense het om Hom saamgedrom en sy stories geniet. Hulle het nie altyd mooi verstaan wat Hy bedoel het nie, en daarom het sy dissipels Hom soms agterna gevra wat die les is, soos ons sal sien.
Ons kry ook almal die geleentheid om stories te vertel. Is dit stories wat opbou of afbreek? Is dit sommer net skinderstories? Oppas – dit kan jou uit die koninkryk van God hou (1 Kor 6:10). Sulke stories doen groot skade. Kom ons oefen om goeie gelykenisse uit te dink. Hoe kan jy die voorbeeld van ’n motor, of ’n fiets, of ’n hond, of ’n vlieg gebruik om iets duidelik te maak? Hou jou oë oop vir dinge wat elke dag gebeur. Dalk het jy ook die gawe om stories só te vertel dat lewens daardeur verryk word.
GEBED:
Here, leer my om my stories in u diens te gebruik.
Lees vanaand in Markus 4:10-12 hoekom sommige mense soms nie die eintlike boodskap van ’n storie kan snap nie.
Dinsdag 11 Maart 2014 Lees eers Markus 4:13-20
Vrugbaar luister
Die saaier saai die woord. – Mark 4:14
GESELSVRAAG:
Waaroor het verlede Sondag se preek gegaan?
“Sjoe! Dit was ’n bom-boodskap!” merk ’n mede-student op terwyl ons by die Studentekerk uitstap. Dit het my verstom, want ek het self daar uitgestap met die gedagte dat daar darem vanaand niks aangegaan het nie. Hoe kan dieselfde boodskap vir die een tot seën wees en vir ’n ander nie? Miskien wil die Here Jesus deur vandag se gelykenis ’n belangrike les aan ons oordra. Die verskil lê nie soseer by die Prediker nie, maar by die ontvanger.
Die verskil van die vrug het nie in die saad gelê nie. Die saad was dieselfde. Die verskil was in die voorbereiding van die grond. Jesus sê sommige mense se harte is soos ’n pad – kliphard en vasgetrap. Satan neem die saad weg voordat enigiets kan gebeur. Die saad in die klipbanke word wel met vreugde aanvaar, maar gou weer verloor, sodra daar vervolging of beproewings kom. Dit kom nie by vrug dra uit nie. Die saad tussen die onkruid verwys na die baie dinge wat ons aandag van die Here aftrek: bekommernis, of besittings of begeertes na ander dinge – wat soms nie eens sondig is nie. Die vrugbare grond was goed voorberei. Die maat van sukses is of dit vrug dra – kan dit voortplant? Word dit meer?
Wees nou eerlik. Hoe was jou hart verlede Sondag? Wat het die afgelope twee dae met daardie saad gebeur? Hoe kan jy jouself beter voorberei vir volgende Sondag?
GEBED:
Berei my hart deeglik voor vir u Woord, Here Jesus.
Lees vanaand in Markus 4:21-25 en kyk of jy die boodskap van die lamp en die maatemmer reg verstaan.
Woensdag 12 Maart 2014 Lees eers Markus 4:26-32
God laat groei
[…] Hoe sal ons die koninkryk van God voorstel, of met watter gelykenis sal ons dit uitbeeld? – Mark 4:30
GESELSVRAAG:
Is jul gemeente besig om te groei of te krimp?
“Onthou, as jy die voorreg het om iemand na die Here te lei, is dit nie omdat jy so goed is nie. Jy is maar net ’n baie klein ratjie in ’n baie groot masjien,” het prof. Kolie ons herinner. “Baie mense voor ons het die grond biddend voorberei en die saaiwerk en die natmaak getrou gedoen. God het die groei gegee. Dit is nie die sekel wat die vrug gee nie!”
Enige boer is verstom oor die wonderwerke wat elke dag op die plaas gebeur. Die harde, droë mieliepit word ’n pragtige groen plant wat uiteindelik