Uit die beek 2014. Attie van Wijk
nie,” sê Martin Luther. George Washington het bely: “Dit is onmoontlik om die wêreld reg te regeer sonder God en die Bybel.”
Ons maak vandag klaar met die eerste Bybelboek wat ons vanjaar sal lees. Watter verskil het dit aan ons gemaak? Ons het in vandag se gedeelte nege keer gelees dat Moses gedoen het net soos God hom beveel het. Is dit waar van jou ook? Die Bybel het alles te doen met ons lewe elke dag; daarom is dit so gevaarlik om tevrede te wees met ’n dagboek en nie die Bybel self te lees nie.
Kom ons blaai vandag terug oor die afgelope twee maande se stukkies. Is daar een wat ons lewe verander het? Indien nie, waar lê die fout?
GEBED:
Help my om elke dag te doen wat U vir my in u Woord sê, Here.
Lees vanaand in Eksodus 40:34-37 hoe die magtige heerlikheid van die Here die tabernakel gevul het.
Welkom by die Evangelie volgens Markus
Skrywer:
Tradisioneel word dié evangelie gekoppel aan Johannes Markus, neef van Barnabas (Kol 4:10). Hy het saam met Paulus gewerk (Hand 13:13; 2 Tim 4:11). Hy was dalk die kaalnaeler van wie ons in Markus 14:51-52 lees.
Eerste lesers:
Die eerste lesers was Romeine, want Markus moes Hebreeuse woorde vir hulle vertaal (Mark 5:41). Hy gebruik ook soms Latynse woorde.
Datum:
Dié evangelie is waarskynlik eerste geskryf en is gegrond op Petrus se vertellings kort voor sy tereggestelling, ongeveer 64-67 n.C. Die ander sinoptiese evangelies (Matteus en Lukas) herhaal baie van wat Markus ook vertel.
Doel:
Hy wou die evangelie (goeie nuus) aangaande Jesus aan die Romeine oorvertel (1:1). Hy gebruik dié woord drie keer in die eerste hoofstuk.
Hooftrekke:
Inleiding (1:1-8).
Jesus begin met sy bediening (1:9 – 3:12).
Jesus se dissipels en gelykenisse (3:13 – 6:13).
Jesus se gewildheid en hoe Hy Hom onttrek het (6:14 – 9:29).
Jesus se reis na Jerusalem (9:30 – 10:52).
Jesus se laaste week in Jerusalem (11:1 – 13:37).
Jesus se kruisdood (14:1 –15:47).
Jesus se opstanding en opdrag (16:1-20).
Let op na:
Die erns en verskeie woorde wat op haastigheid dui (“dadelik”); die klem op Jesus se dade eerder as woorde; Jesus wat tyd maak vir mense wat in nood is.
Christus in MARKUS:
Markus lê baie klem op Christus as die Dienskneg. Hy vertel niks van Jesus se geboorte en kinderdae nie, maar begin by sy werk en hoe Hy baie mense gehelp het. Selfs in sy laaste sin vertel hy nog hoe Jesus vandag nog werk en wonders laat gebeur.
Saterdag 1 Maart 2014 Lees eers Markus 1:1-11
Goeie nuus!
Die evangelie van Jesus Christus, die Seun van God, begin só: […] – Mark 1:1
GESELSVRAAG:
Wat is die beste nuus wat jy hierdie week gehoor het?
“Ai, ek wil nie meer die koerant lees of na die TV-nuus kyk nie, want al die nuus is net sleg,” sug ’n vriend. Ons ken almal daardie gevoel. Dit lyk asof die duiwel besig is om die oorhand te kry. Die Bybel se boodskap word nie meer aanvaar nie. Baie gemeentes loop leeg en moet sluit. Onreg, korrupsie en misdaad het algemeen geword. Ons het goeie nuus baie nodig.
Vandag kom Markus met daardie nuus. In sy tyd was daar groot verdrukking deur ’n buitelandse moondheid. Die geestelike leiers was swak voorbeelde. Alles het hopeloos gelyk. En toe kom Jesus op die toneel! Markus sê hy het goeie nuus gebring (die letterlike betekenis van “evangelie”). Hy het gesê die goeie nuus gaan oor ’n Persoon. Hierdie Jesus is die Christus, die langverwagte Messias. Maar Hy is so totaal anders as wat die gelowiges verwag het. Hy was nie ’n soldaat nie. Hy het nie wapengeweld nodig gehad nie. Sy wapen was liefde. In die volgende paar weke sal ons Hom beter leer ken. En Hy is gister en vandag dieselfde en tot in ewigheid (Heb 13:8). Markus begin direk met Jesus se bediening, nie sy geboorte nie. Hy vertel van Johannes die Doper se getuienis oor hierdie Jesus. As jy Jesus ken, besef jy Hy is veel hoër as jy. Jy buig voor Hom.
GEBED:
Here Jesus, ek wil U beter leer ken. Maak my hart oop om te ontvang wat U vir my in hierdie Evangelie weggesteek het.
Lees vanaand in Markus 1:12-20 hoe die Here ’n roeping vir elkeen van sy volgelinge het. Wat is joune?
Sondag 2 Maart 2014 Lees eers Psalm 132:1-10
In God se teenwoordigheid
Kom ons gaan sy woning binne, kom ons buig daar in aanbidding voor Hom. – Ps 132:7
GESELSVRAAG:
Waar en wanneer was jy nog die diepste van God se teenwoordigheid bewus?
“Daardie Woensdagaand toe ek gekniel het om my lewe onvoorwaardelik aan die Here oor te gee, het ek nie geweet wat sou gebeur nie. Maar skielik was ek net van God se teenwoordigheid bewus. Sy liefde het my omvou. My lewe was sedertdien nog nooit weer dieselfde nie.”
Vandag is Sondag. Die kinders van die Here gaan in hul miljoene bymekaarkom in kerke, sale, huise en selfs in die opelug. Duisende sal dit nie openlik mag doen nie. Dalk sal hulle nie eens waag om te sing nie. Ander is in eensame opsluiting omdat hulle Jesus volg. Hulle word gemartel, maar God is ook daar by hulle. Hulle is gewillig om die prys te betaal om God se kind te wees.
Maar daar is ook baie lidmate wat nie eens daaraan sal dink dat vandag Sondag is nie. Hulle sal besig wees met die Sondagkoerant, die Sondagsport en met hul inkopies. Vir hulle is dit nie meer God se dag nie. Dit is die mens se dag. Hoe arm sal hulle nie aan die einde van hierdie dag wees nie!
Ek en jy kry ook die keuse wat ons met hierdie dag wil gaan doen. Dawid twyfel nie meer nie. Hy weet wat die beste is. Kom ons gaan sy woning binne, kom ons buig daar in aanbidding voor Hom. Hoe voel jy vandag oor hierdie woorde? Jou dade sal wys.
GEBED:
Ek wy myself aan U, sodat die hele week aan U behoort.
Lees vanaand in Psalm 132:11-18 watter seën Dawid ervaar het nadat hy die Here eerste gestel het in sy lewe.
Maandag 3 Maart 2014 Lees eers Markus 1:21-31
Jesus die leraar
[…] Ek weet goed wie U is; U is die Heilige van God! – Mark 1:24
GESELSVRAAG:
Wat dink vandag se mense van Jesus Christus?
“Van die studente het by die hoof gaan kla dat ek hulle nie respekteer nie en teen hul sondige verhoudings preek,” vertel ’n geestelike werker. Sy was glad nie bewus van die sondige verhoudings wat daar aan die gang was nie. Sy het net ’n paar Bybeltekste gelees en die Heilige Gees het dit toegepas. En die feit dat hul sonde hulle begin pla het, is tog ’n duidelike teken dat God met hulle besig is.
So het Jesus daardie Sabbatdag in die sinagoge van Kapernaum begin leer. In die gemeente was ’n mens wat van ’n onrein gees besete was, en hy het luidkeels beswaar aangeteken. Die uiteinde was dat hy van die gees bevry is. Dit is duidelik dat Jesus met gesag gepraat het – selfs die bose geeste moes gehoorsaam (Mark 1:27). Waar Jesus werk, gaan dinge nie altyd so rustig soos waaraan ons gewoond is nie! Jesus is baie sterker as enige onrein gees. Later die middag het Hy aan Petrus