Uit die beek 2014. Attie van Wijk
Jesus was beslis ’n ongemaklike mens om mee te doen te kry, want waar Hy gekom het, het hy mense ontstel en hul lewens verander. Maar is dit nie presies wat ons land nou nodig het nie? Ons het ’n boodskap gekry oor iemand wat lewens verander. Met wie het jy al hierdie boodskap gedeel? Of hou jy dit net vir jouself?
GEBED:
Here Jesus, U het alle mag in die hemel en op aarde. Kom verander ook die mense wat hier om my woon. Begin by my.
Lees vanaand in Markus 1:32-39 hoe Jesus vir mense omgee – ook vir dié wat nog nie van Hom gehoor het nie.
Dinsdag 4 Maart 2014 Lees eers Markus 1:40-45
Jesus kan en wil help
[…] As U wil, kan U my gesond maak. – Mark 1:40
GESELSVRAAG:
Wat is vandag jou grootste begeerte?
“Kan hierdie Jesus van jou mense gesond maak?” vra die Indiese amptenaar vir kollega Sam wat besig was om traktaatjies uit te deel op die strand. “Natuurlik!” was sy antwoord. “Nou ja, dan kom haal ek jou môre dat jy die minister kan gesond bid,” sê die amptenaar. Sam vertel hy het daardie nag maar sleg geslaap. Hoe kon hy weet of dit God se wil was om die minister te genees? Hy is dan ’n Hindoe. Maar die volgende dag het hy vir die minister gaan bid – en sy gebed is uit genade verhoor. Dit het die deur vir die evangelie ook verder oopgemaak.
“Geloof is nie om te glo God kan dit doen nie, maar dat Hy dit sal doen,” staan op ’n plakkaat in ’n gastehuis in die Midde-Ooste. In vandag se Skrifgedeelte het die melaatse man met groot vertroue na Jesus toe gegaan. Hy was nie toegelaat om as melaatse met ander mense te meng nie, maar het nogtans deurgedruk en by Jesus uitgekom. Jesus doen die ondenkbare: Hy raak ’n melaatse aan en genees hom. Daardie dag is ’n lewe totaal verander. Hy kon net nie ophou om te getuig nie, al het Jesus hom belet. As hy sou stilbly, sou hy bars.
Het jy ook so ’n sterk begeerte om ander mense na Jesus toe te lei? Is jou lewe ook deur Hom verander? Vind jy dit ook onmoontlik om stil te bly? Of moet ons ook maar eers soos die melaatse op ons knieë voor Jesus begin?
GEBED:
Dankie dat U ons kan en wil help, Here Jesus.
Lees vanaand Markus 2:1-12 en kyk wie se geloof eintlik die verlamde man genees het. Wat was sy grootste behoefte?
Woensdag 5 Maart 2014 Lees eers Markus 2:13-17
Aswoensdag
Net vir sondaars
[…] Ek het nie gekom om mense te roep wat op die regte pad is nie, maar sondaars. – Mark 2:17
GESELSVRAAG:
Wie ken ons wat Jesus regtig nodig het?
“In baie westerse kerke is Aswoensdag die begin van die vastyd (Lent) waartydens die gelowiges hulle voorberei vir Goeie Vrydag. Meer as ses weke lank sal hulle iets opgee as teken dat hulle berou het oor hul sonde. Op Aswoensdag sal die leraar of priester dan as op elkeen se voorkop sit as teken van hul berou,” antwoord ’n leraar ’n vraag oor dié gebruik wat nie orals bekend is nie.
As ons nie verlore sondaars was nie, was dit nie nodig vir Jesus om aarde toe te kom nie. Maar Hy verduidelik in vandag se teks dat Hy juis vir sondaars gekom het. Hy kan net sondaars red. As jy nie jou sonde wil bely nie, kan Hy jou nie help nie. Levi (Matteus) die tollenaar het die Here se roepstem gehoor en gehoorsaam. Hy het dus sommer dadelik ’n feesmaal gereël om Jesus ook aan sy tollenaar-vriende voor te stel. So het die goeie nuus onder die tollenaars versprei.
Baie gemeentes moedig mense, sodra hulle tot bekering kom, dus aan om “Matteus-etes” in hul huise vir hul ongelowige vriende aan te bied. Die meerderheid van die gaste moet dan ongelowiges wees, sodat hulle tuis kan voel. Maar by daardie ete sal iemand dan die kans kry om die goeie nuus met almal te deel. Wat ’n wonderlike gedagte. Wie wil jy nooi?
GEBED:
Dankie dat U juis vir sondaars gekom het, Here Jesus.
Lees vanaand in Markus 2:18-22 wat die vraag oor vas was en wat Jesus se verrassende antwoord was.
Donderdag 6 Maart 2014 Lees eers Markus 2:23-28
Die Here van die rusdag
[…] Kyk daar! Waarom doen hulle iets wat nie op die sabbatdag gedoen mag word nie? – Mark 2:24
GESELSVRAAG:
Wat mag ’n mens alles op ’n Sondag doen? En wat nie?
“Jy mag nie op ’n Sondag hekel of brei nie, want dan steek jy ’n naald in God se oog!” is ons oumas geleer toe mense die rusdag nog met groter erns as vandag bejeën het. Die Fariseërs het ook regtig hard probeer om aan die wet gehoorsaam te wees. Hulle is geleer jy mag nie op die Sabbat ’n vlooi vang nie, want dit is jag. Jy mag niks van ’n boom afpluk nie, want dit is oes. Wanneer ’n dier in ’n put val op die Sabbat, mag jy dit uithaal. Maar as ’n mens dit doen, moet hy daar bly, want hy moes van beter geweet het.
Jesus leer ons sulke gedagtes is belaglik. Dit gaan nie oor die dag nie, maar oor die mense. Die mense het die rusdag nodig, nie andersom nie; daarom is daar geen fout as die dissipels van die are pluk en uitvryf as hulle honger is nie. Daar is ook niks verkeerd daaraan om mense wat in nood is, te help nie, soos ons vanaand sal sien.
Die groot vraag is egter watter plek die Here van die Sabbat in ons beplanning inneem. Hy gee ons daardie rusdag sodat ons liggaamlik kan rus, maar ook geestelik verkwik kan word. Hy wil ons voorberei en toerus vir die uitdagings van die week wat voorlê. Dit is ’n dag van vreugde en uitreik na ander mense. Geniet dit!
GEBED:
Hemelse Vader, dankie dat U ons so ontwerp het dat ons een dag per week moet rus. Help my om dit reg te gebruik.
Lees vanaand in Markus 3:1-6 hoe haat die uiteenlopendste groepe kan bymekaarbring.
Vrydag 7 Maart 2014 Lees eers Markus 3:7-12
Jesus is die Seun van God
As mense wat van onrein geeste besete was, Hom sien, het hulle voor Hom neergeslaan en geskreeu: “U is die Seun van God!” – Mark 3:11
GESELSVRAAG:
Hoe is Jesus anders as ander godsdienstige leiers?
Sal die regte Jesus opstaan, asseblief? is die titel van ’n boek wat ’n rukkie gelede verskyn het. Daar was ’n groot debat oor wie Jesus werklik was. Sommige meen dat Hy net die buite-egtelike kind van ’n jong meisie was. Ander meen dat Hy ’n groot leermeester of profeet was, net soos Boeddha of Mohammed. Vir Markus was daar geen onduidelikheid nie – en ook nie vir die demone wat van sommige mense besit geneem het nie. Hulle het geweet dat Hy die Seun van God was en is.
Dit beteken natuurlik nie Hy was die produk van ’n buite-egtelike verhouding tussen God en Maria nie, soos sommige Moslems dink Christene glo. In die Bybel leer ons Hom ken as een Persoon van die Goddelike Drie-eenheid: Vader, Seun en Heilige Gees. Hy is almagtig; daarom kon Hy die skare mense help wat agter Hom aan gegaan het. Hy het hulle genees en van demoniese magte bevry. En dan kon Hy maklik van die skare af wegkom en na die volgende dorpie gaan deur van ’n vissersboot gebruik te maak. Hy het nie roem gesoek nie. Hy het die mense wat Hy gehelp het, belet om daaroor te getuig. Sy tyd het nog nie gekom nie. Hy het eers heelwat later die groot opdrag tot getuienis aan sy volgelinge gegee. Dit is ook óns opdrag vandag.
GEBED:
Seun van God, ek aanbid U vir wie U is.
Lees vanaand in Markus 3:13-19 hoe Jesus twaalf apostels gekies het om op te lei. Let op hoe Hy hulle toegerus het.
Saterdag 8 Maart 2014 Lees eers Markus 3:20-30
Die onvergeeflike sonde
Wie