Uit die beek 2014. Attie van Wijk
horings uitgebeeld het! Die gedagte was seker ook nie dat Moses se gesig geblink het van die sweet nadat hy die twee swaar klippe tot op die berg en weer af gedra het nie. Dit sou nie genoeg wees om Aäron en die volk bang te maak nie. Paulus skryf hieroor: “Hierdie heerlikheid, wat tog gou sou verdwyn, het op die gesig van Moses so geskitter dat die Israeliete nie na hom kon bly kyk nie” (2 Kor 3:7). Dit was duidelik vir almal dat Moses ’n ware ontmoeting met die Here gehad het.
Ek onthou nog goed die nag toe my skoolvriend Freddie sy lewe aan die Here oorgegee het. Die volkome vrede op sy gesig was so totaal anders as die bekommerde uitdrukking waarmee hy by ons huis opgedaag het. God verander selfs jou gesig!
GEBED:
Here, laat elkeen vandag op my gesig sien dat ek by U was.
Lees vanaand in Eksodus 35:1-9 hoekom die dankoffers van die Israeliete nodig was om die tabernakel te bou.
Donderdag 20 Februarie 2014 Lees eers Eksodus 35:10-29
Vrywillige gawes
Elke Israelitiese man en vrou wat vrywillig iets wou bring vir die werk wat die Here vir Moses beveel het om te doen, het dit vir die Here gebring. – Eks 35:29
GESELSVRAAG:
Wat maak dat ’n mens graag vir die kerk gee?
“’n Mens praat nie oor geld in die kerk nie, al praat ons op elke ander plek daaroor,” is die gevoel van die meeste lidmate. Ons voel ongemaklik as die dominee oor ons dankoffers praat. Tog is ons bydraes vir die Here so belangrik dat Hy kyk wat elkeen gee (Mark 12:41). “Dit lyk my die lidmate dra ruim by as dit vir ’n spesifieke projek is,” noem een van ons leraars toe ons geld vir dakplate vir kerkgeboue in Malawi ingesamel het.
Die tabernakel was ’n projek wat die volk opgewonde gemaak het. Hulle wou die Here daardeur eer. Hulle het ruim bygedra met die goue versierings wat hulle destyds by die Egiptenaars gekry het. Maar elkeen wat kon houtwerk doen of bokhaar kon spin of watter kunsvorm ook al beoefen, het sy en haar deel gedoen. Dit was heerlik om saam te werk.
So het ons dit ook ervaar toe ’n gemeente in die VSA uitgedaag is om twee vraghouers aan te koop en dit in klaskamers te omskep en na Suid-Afrika te verskeep. Aan hierdie kant het ons die houers in ontvangs geneem, die vensters en deure ingesny, dit klaar geverf en die houers geplaas en saamgevoeg. So het ’n pragtige bewaarskool tot stand gekom waar daar eers net ’n geroeste sinkkrot gestaan het. Dis lekker om saam vir die Here te werk!
GEBED:
Wys my hoe ek ook in u diens kan staan, Here.
Lees vanaand in Eksodus 35:30 – 36:1 hoe die knap vakmanne hul kennis en ervaring in die Here se diens gestel het.
Vrydag 21 Februarie 2014 Lees eers Eksodus 36:2-7
Meer as genoeg
[…] Die volk bring meer as wat nodig is om die werk te doen wat die Here beveel het. – Eks 36:5
GESELSVRAAG:
Wat maak dat mense maklik opoffer en gee?
“Sal dit nie wonderlik wees as hierdie woorde weer gesê word nie?” sê ’n Amerikaanse sendelingvriend nadat hy die oggend vandag se gedeelte gelees het. Die Here Jesus se Groot Opdrag was om die evangelie na alle nasies te neem, maar daar is altyd te min geld beskikbaar om dit deeglik te doen. Die sendelinge moet van gunste en gawes lewe en met onbetroubare motors tevrede wees in die mees onherbergsame dele. Hulle moet hul kinders maar tuisonderrig, want geld vir ’n internasionale skool is daar nie. Mense wat alles verkoop en prysgegee het in antwoord op God se sendingroeping word weer teruggeroep omdat die tuisgemeente ander prioriteite ontwikkel het. Ai tog!
In Moses se dae was dit anders. Mense het met vreugde gegee totdat hulle gevra is om op te hou gee – daar was oorgenoeg om die taak te volbring. So lees ons dat Wellington se gemeente in 1883 opgeoffer het om die Sendinginstituut op te rig waarvandaan honderde sendelinge die wêreld ingestuur is. Baie van die studente was arm, en het beurse nodig gehad. Maar die lidmate se sakke was oop, want die gemeente het twee keer herlewing ervaar.
Hoe lyk jul gemeente se begroting? Oorleef julle net-net? Of het julle sendelinge onder die mees onbereikte volksgroepe?
GEBED:
Here, help my om u werk met vreugde en ’n oop beursie te ondersteun.
Lees vanaand in Eksodus 36:8-30 hoe die ambagsmanne noukeurig volgens God se plan gewerk het.
Saterdag 22 Februarie 2014 Lees eers Eksodus 36:31-38
Net die beste vir die Here
Die rame is met goud oorgetrek en vir hulle is goue ringe gemaak om die dwarslatte deur te steek. Die dwarslatte is ook met goud oorgetrek. – Eks 36:34
GESELSVRAAG:
Hoe het die tabernakel gelyk toe dit klaar was?
“Ek het my nooit kon voorstel hoe die rame van die tabernakel inmekaar gesteek het totdat ek ’n illustrasie op die internet raakgeloop het nie,” skryf ’n Bybelstudent. Daar is inderdaad pragtige volkleurtekeninge op die internet beskikbaar. Dit sou ’n goeie projek vir die kinders wees om ’n bietjie navorsing te doen en die tekeninge uit te druk sodat almal kan sien.
Een ding wat egter baie duidelik is, is dat die raamwerk bedoel was om te hou. Al hout wat beskikbaar was, was doringhout. Maar elke deeltjie daarvan was met goudplaat oorgetrek om dit te bewaar. Die tabernakel kon dus eeue lank hou, al was dit net ’n tent. Die tent was ook met vier lae materiaal en velle bedek om dit te beskerm. Die verskillende dele moes presies volgens maat gemaak word, sodat dit volgende keer maklik weer opgeslaan kon word. Nogal ’n uitdaging in ’n tyd toe noukeurige meetinstrumente nog nie bestaan het nie!
Vandag het ons nie meer die tabernakel nodig nie. Elkeen van ons is ’n tempel van die Heilige Gees (1 Kor 3:16). Mense kan God nie sien nie, maar hulle kan ons sien. Hulle gaan die Heilige Gees beoordeel volgens wat hulle in ons lewens sien. Is jy ook ’n sieraad tot eer van God?
GEBED:
Here, maak my ’n sieraad vir u koninkryk.
Lees vanaand in Eksodus 37:1-16 hoe die ark van die verbond en ander toerusting gelyk het.
Sondag 23 Februarie 2014 Lees eers Psalm 130:1-8
Wag op die Here
Ek wag op die Here meer as wat die wagte op die môre wag, wagte op die môre. – Ps 130:6
GESELSVRAAG:
Wanneer is dit nodig om op die Here te wag?
“Ek bid nog daaroor of ek vandag kerk toe moet gaan,” sê ’n dametjie in Pretoria toe ek haar saamnooi kerk toe. Vir my was dit nie ’n kwessie nie. Ons mag mos nie die samekomste van die gemeente misloop nie (Heb 10:25). (Tensy jy natuurlik ’n duidelike opdrag van die Here het om iets anders te doen.)
In hierdie psalm moedig die Jerusalemgangers mekaar aan. Ons hoef nie te wag vir vergifnis nie. Die Here Jesus het reeds vir ons vergifnis voorsiening gemaak. Al wat Hy van ons vra, is dat ons ons sondes moet bely (1 Joh 1:9). Die psalm sê egter dat ons soms nodig het om te wag op die vervulling van God se beloftes (Ps 130:5). Hy gebruik die voorbeeld van die wagte wat dwarsdeur die nag op wag is en verlang dat die donker nag verbygaan. Maar al wag ons op die Here, hoef ons nie te twyfel dat Hy die uitkoms sal gee nie. By Hom is die verlossing seker!
Dalk is dit nie ons wat vir die Here moet wag nie. Dalk is dit Hy wat op ons wag. Ons is tog so besig met ander dinge dat ons nie die belangrikste afspraak van almal nakom nie. Kan dit wees dat die Here vandag ’n belangrike ontmoeting vir ons gereël het? Wanneer ons nie daar is nie, gaan dit ’n groot verlies wees. Ja, ons kan Hom by die huis ook ontmoet – maar dalk wil Hy vandag deur iemand anders met ons praat. Kom ons wag op Hom!
GEBED:
Here, ek het U nodig. Ek wag op u stem.