Kies die lewe. Solly Ozrovech
nie verhef tot die hoogste goed nie. Jy moet God eerste plaas op die agenda van elke dag. Hy is immers die Eerste en die Laaste; uit Hom, en deur Hom en tot Hom is alle dinge. Hy eis die hoogste prioriteit in jou bestaan, nie alleen omdat Hy die reg daartoe het nie, maar ook omdat jou lewe daardeur sy hoogste doel bereik en wen aan diepte en kwaliteit.
As Hy eerste in jou lewe is, sal Hy elke terrein van jou lewe beïnvloed wat aan Hom ondergeskik gemaak word.
Vereer God met jou tyd, jou talente, jou besittings, jou planne en laat sy Gees toe om te heers oor al die aspekte van jou bestaan. Dan sal jy die opwindende ontdekking maak dat, wanneer God eerste geplaas word in jou lewe, jy perspektief in die lewe kry. Dan sal jy vrede hê met jouself en met ander.
Hemelse Vader, leer my deur u Heilige Gees dat my primêre taak is om U eerste te plaas. Daarop moet dit vir my wesenlik aankom. Doen dit in my lewe deur die verdienste van Jesus Christus, wat geleef en gesterf het om U te verheerlik.
8 Februarie
Romeine 8:31–39
’n Almagtige bondgenoot
God is vir ons, wie kan dan teen ons wees? – Rom 8:31
~
Moontlik is jy op die oomblik besig om hard te stry teen ’n gevoel van onbekwaamheid en mislukking. Die duiwel is so magtig dat jy voel soos ’n man wat veg met een arm agter die rug vasgemaak. Jy weet dat jy triomfantelik moet uitstyg bo elke bedreiging en tog vrees jy die dreigende neerlaag.
Daar sal ’n ommekeer in jou denke moet kom. Jy moet ingestel wees op oorwinning en nie op neerlaag nie. Jy moet vanuit die oortuiging leef dat, al is Satan magtig, God Almagtig is. Maak seker dat jy aan God se kant is as dit jou begeerte is om oorwinning te ken.
’n Mens kan nie op paaie loop wat jou eie dwase hart beplan en dan God se seën daarop verwag nie. Soek eers sy wil vir jou lewe en skik jou dan na sy wil. Jou gehoorsaamheid en sy almag kan onbeperkte oorwinnings vermag.
As jy in harmonie met God werk, bring dit nie alleen doelgerigtheid en krag in jou lewe nie, maar ook die karaktereienskappe wat noodsaaklik is vir ’n lewe van oorwinning.
Hierdie vreugde put jy uit die Bron van alle ware vreugde. Jy ervaar ’n gewaarwording van vrede in God, wat deur niks vernietig kan word nie. Selfs in die stormagtigste oomblikke, kom daar vredevolle berusting in jou hart en denke.
Skenk my die geloof en geestelike waagmoed, o Here, om my lewe onlosmaaklik aan U te koppel, sodat ek deur almag, triomfantelik kan lewe.
9 Februarie
Matteus 10:16–25
Moed hou: ’n Christelike deug
Maar wie tot die einde toe volhard, sal gered word. – Matt 10:22
~
Christus het nêrens beloof dat die Christen se pad altyd maklik sal wees nie. Inteendeel, Hy praat dikwels daarvan dat jy jou kruis moet dra. Moontlik het jy jouself al heimlik afgevra of dit die moeite werd is. En tog, na wie toe anders sal jy gaan? As jy eenmaal ’n ervaring met die lewende Christus gehad het, sal jy nooit met die naasbeste tevrede kan wees nie.
As jy deur ’n donker tydperk van depressie in jou lewe gaan en jy gedwing voel om jou geloof te laat vaar, moenie oorreageer nie. Identifiseer die rede waarom jy jou houvas op geestelike waardes verloor het. Wees absoluut eerlik met jouself. Lê dit by ’n afgeskeepte gebedslewe? Of verwaarloosde Bybelstudie? Bevind jy jou in geselskap wat nie tot geestelike groei bydra nie? Het jou toewyding aan die Meester verslap? Die skuld lê nie by God nie, maar uitsluitlik by jou.
In die vernuwing van jou geloof moet jy vlerke kry na Christus toe. Los alle verskonings en argumente wat verwarring in jou geestelike lewe skep. Christus het jou nie laat los nie. Herbevestig jou geloof dat Hy in jou leef. Hou moed en volhard in die geloof en vertrou op die onsterflike liefde van Jesus Christus.
Deur u onbeperkte krag en genade, Vader, sal ek volhard en my geloof deur ’n lewe van algehele oorgawe en toewyding herbevestig. Help my daartoe deur die werk van u Heilige Gees.
10 Februarie
Hebreërs 11:1–6
Stormgeteisterde geloof
As ’n mens nie glo nie, is dit onmoontlik om te doen wat God wil. Wie tot God nader, moet glo dat Hy bestaan en dat Hy die wat Hom soek, beloon. – Heb 11:6
~
Ons leef nou, meer as ooit tevore, in moeilike en gevaarlike tye. Daar is ’n universele gewaarwording dat dinge op die wêreldtoneel na ’n klimaks toe beweeg. Daarom is dit noodsaaklik dat jy ’n geloof besit wat onwrikbaar sal bly staan as alles rondom jou in duie stort. Alleen ’n mens met ’n onstuitbare geloof in die doel van God met hierdie verskeurde wêreld, sal die toekoms met vertroue kan tegemoetgaan.
Die mens wat ernstig oor die lewe nadink, word meer en meer daarvan bewus dat hy in ’n unieke keerpunt lewe. Oor die wêreld heen hunker die mensdom na ’n versekering dat God wéét, dat Hy omgee en dat Hy iets kán doen. Al lyk dit nie aldag so nie, is hierdie nóg God se wêreld.
In sy soeke na geestelike sekerheid het die mens vele paaie gevolg en die leerstellings van Jesus op verskillende maniere vertolk. Baie dissipels van die Meester leef in groot verwarring. Maar Christus het nie ’n nuwe teologiese dogma kom verkondig nie. Hy het ’n nuwe lewe kom bied aan hulle wat dit wil aanneem. Hy bied ook die krag van geloof – ’n geloof wat staande sal bly, selfs onder die aanslae van die Bose.
Wanneer Christus sentraal staan in jou lewe en sy Gees jou lewe beheers, het jy ’n fondament waarop jy doelgerig kan bou. Die bouwerk wat op hierdie fondament verrys sal die magte van die duisternis weerstaan.
Here, dankie dat ek by U vrede en stilte kan ondervind. Versterk my geloof en lei my op u pad.
11 Februarie
1 Timoteus 4:6–16
Die vrymoedigheid om te getuig
Oefen jou liewer om in toewyding aan God te lewe. – 1 Tim 4:7
~
’n Mens kan Christus nie in die geheim volg soos Nikodemus nie. Óf die geheim vernietig jou Christenskap óf jou Christenskap vernietig die geheim. Sommige mense is traag om oor hul geloof te praat. Hul godsdienstige oortuigings is só intiem dat dit selfs van hul beste vriende versteek is.
Hiervoor is daar baie redes: Sommige mense is inherent teruggetrokke of skaam. Of die geselskap waarin jy jou bevind, mag dalk spottend verwys na enigiets wat met godsdiens te doen het. Die gevaar bestaan miskien dat jy vanweë jou godsdienstige oortuigings uit sekere groepe uitgesluit sal word. Entoesiasme oor jou geloof mag jou brandmerk as ongebalanseerd. Gevolglik swyg jy oor die heel belangrikste aspek van jou lewe.
As jou geloof vir jou ’n werklikheid is, sal jy dit nie verborge kan hou nie. Jou lewe sal dit wys. Dit is alleen wanneer ’n persoon se lewe nie ooreenstem met sy geloofsoortuiging nie, dat hy die feit probeer wegsteek dat hy ’n gelowige volgeling van Jesus Christus is.
Wanneer Christus sentraal staan in jou geloof en godsdiensbeoefening en jy bewus is van jou verbintenis met Hom – soos die loot in die wingerdstok – is dit nie meer belangrik wat ander sê of doen nie. Jy weet vir jou is Christus die lewe en jou hoogste ideaal is om Hom te gehoorsaam. Jy sal jou blydskap en opwinding nie wil wegsteek nie, maar dit liewer met ander wil deel.
Jesus Christus, U is die Bron van al my vreugde. Dankie dat U elke dag ’n lewende werklikheid in my lewe is.
12 Februarie
Romeine 7:12–20
Gevaarlike selfminagting
Ek, ellendige mens! Wie sal my van hierdie doodsbestaan verlos?