Duet. Johan Ferreira
begin van ’n nuwe week.
Francois skryf vandag toets by die universiteit en is reeds op. Self sou ek graag eerder nog ’n rukkie wou slaap. Ek het nie lus om nou al op te staan nie en in ’n poging om weer te probeer insluimer, trek ek die lakens en duvet tot onder my ken.
Nog voordat ek behoorlik aan die slaap kon raak, lui Johan se wekker klokslag sesuur. Dié sit hy summier af, draai om en slaap verder. Maar vir my het die dag nou aangebreek. Ek lê ’n ruk lank en luister na die voëls, voor my gedagtes in die rigting van die dag se verpligtinge begin beweeg. Ek raak sommer benoud. Dis ’n besige week wat voorlê.
Joyce Meyer se woorde oor rus in God kom in my gedagtes op. Ek luister graag na haar CD-preke in die motor op pad werk toe. In dié spesifieke preek fokus sy daarop oor hoe ons slegs deur te rus in God die elkedagse uitdagings van ons lewe en oorvol skedule kan hanteer. Hy is ons bron van rus. Sy krag stel ons in staat om te doen waarvoor Hy ons geroep het. Hy nooi ons om in Hom te rus. Sy genade en liefde sorg vir rus vir ons siel, al is ons ook hoe besig.
Bekyk jul skedule – is alles noodsaaklik? Het julle tyd ingeruim vir mekaar of het die eise van werk en skool jul lewe oorspoel?
Liefdevolle Vader, U ken elkeen se dagboek. Leer ons om in U te rus en u teenwoordigheid elke oomblik in te asem. Amen
5 Maart
Vind jou balans in God
Maleagi 4:2 – Maar vir julle wat eerbied het vir my Naam, sal die son van redding skyn met genesing in sy strale. Julle sal vry word en bokspring soos vetgemaakte kalwers.
Die lewe is ’n dolle gejaag: dis werk, huis, kinders en familie, en dan nog die voorreg van vriende ook. Êrens in die week moet jy by alles uitkom. Tyd is die groot vlieg in die salf, want jy kan gewoon nie meer tyd in die dag maak as wat daar is nie. Is daar werklik mense wat die uitdaging van volkome balans baasraak?
’n Paar jaar gelede woon ek ’n geestelike retreat by en word gekonfronteer met die gedagte dat die versorging van my liggaam ’n geestelike ritueel kan wees. Hoe ek kies om te leef, wat ek eet, waar en hoe ek oefen, hoe gereeld en goed ek slaap, en dan ook my emosionele belewenisse kan deel van my geestelike reis met God wees.
Ek worstel maande lank met die nuwe idees. Het die hele aard en wese van my bestaan nou eintlik tog wel alles met God te doen? Wel, die uiteinde van my soektog is: Sowaar, die begeleier van die retreat het toe waarlik iets beet! Dit is egter nie ’n plek van aankoms nie, maar ’n voortdurende proses van groei en bewuswording van God se teenwoordigheid op alle vlakke van my lewe. Ek word opnuut bewus van vreugde in my lewe sonder dat ek soek na die lekker.
Wat kan ek doen om alle vlakke van my lewe en menswees vas te maak aan my belewenis van God?
Hemelse Vader, ek smag na die strale van die son wat uit u hand kom. Help my om te sien waar ek u vreugde in my lewe kan beleef. Amen
6 Maart
Wil jy reg of gelukkig wees?
Spreuke 25:28 – Iemand wat homself nie in bedwang kan hou nie, is soos ’n stad sonder ’n muur wat beskerming bied. (NLV)
Balans kom nie vanself nie – nie vir kindertjies nie, en skynbaar ook nie vir grootmense nie. Soos die kleintjies met onseker treetjies vorder, so lyk die stadige groei na balans dikwels ook in ons lewe.
In die huwelik is verhoudingsbalans kritiek. Die twee mense verskil inderdaad in vele opsigte, en dit is heel dikwels ’n ewige bron van konflik. Vra paartjies maar wanneer hul konflik begin het. Die antwoord is dikwels: Dit was maar so van die begin van die verhouding af.
Die meeste mense is gewoonteslawe. Aangeleerde gedrag kom meestal van ouers af, wat impliseer dat ’n persentasie goed én sleg saamkom na die nuwe verhouding. Gewoonlik word die nuwe lewensmaat dan as die uitdager van hierdie gedrag ervaar, want daardie maat kom met sy of haar eie stel aangeleerde goed en sleg.
God het ’n duidelike plan met die huwelik: Elke individu kan hierdeur groei tot ’n beter weergawe van hom- of haarself. In ’n gesonde huwelik word sulke geleenthede gesien as groeikanse. In die meer uitdagende verhouding is dit bronne van konflik. Die magstryd om jou maat te verander kan die doel van die verhouding word. Die Goddelike doelwit van die huwelik raak dus verlore in die stryd om reg te wil wees.
Vra jou af: Wil ek reg of gelukkig wees? As ons wil reg wees, gaan daar konflik wees. Die stad se muur gaan afwesig wees en die verhouding is kwesbaar. Geluk bring die uitdaging van samewerking, en dikwels ’n kompromis. Maar hierdie stad staan veilig.
Wil ek reg of gelukkig wees in my huwelik?
Heilige Gees, rig my denke en my wil na die diep behoefte aan geluk met my maat. Amen
7 Maart
Waarom wegkruip vir uitdagings?
Romeine 8:37 – Tog is ons ten spyte van al hierdie dinge besig om ’n klinkende oorwinning te behaal – deur Christus wat sy liefde so duidelik aan ons bewys het. (NLV)
Balans het sekerlik iets met deursettingsvermoë te doen. Ek het onlangs maar eers die uitdagings begin aanneem waarmee ek nie van nature goed is nie. Van leer, swem en tuinmaak weet ek iets, skynbaar so gebore in die plan van God. Van kleins af druk ek takkies in die grond en raak opgewonde oor die eerste nuwe blaartjies. ’n Boek is nog altyd my vriend en water pas my lyf goed.
Een middag dwaal ons in die strate van Jerusalem se ou stad en ek sien ’n plakkaat vir die Jerusalem-marathon. Daar en dan besluit ek om die halfmarathon volgende jaar te kom hardloop. “Is jy ’n drawwer?” vra ’n reisgenoot. Glad nie, maar ek gaan begin. Die Vader het seker breed geglimlag!
En daar begin die grootste uitdaging van my lewe. Ek is skynbaar toe nie ’n natuurlike drawwer nie, want ek sukkel maande lank. Dit word stadig minder sleg, maar van lekker is daar nie sprake nie. Baie soos die lewe, spot ’n ernstige vriend. Maar ek byt vas, want hierdie aktiwiteit wil ek wen.
Met die Jerusalem-verbintenis voltooi, gaan draf ek een oggend deur die strate van my eie woonbuurt. En op ’n stil en gewone Dinsdag terwyl mense koffie drink en kinders aantrek vir skool gebeur dit: Ek ontdek die vreugde van hardloop, want hardloop wen jy nooit. Jy hou net aan hardloop. Baie soos die lewe, hoor ek die vriend se stem eggo.
Watter uitdaging in my lewe vermy ek?
Vader God, maak my oë oop vir daardie uitdagings wat my nader aan U bring. Amen
8 Maart
Laat God jul tuiste afrond
Spreuke 24:3-4 – Met wysheid word ’n huis gebou. Insig is nodig om dit te onderhou. Kennis is nodig om sy kamers te meubileer met allerhande kosbare en waardevolle artikels. (NLV)
Vandat die seuns klein is, ry ons fiets. Ons al vier kan dit baasraak tussen die lae spiertonus wat ons gene kniehalter. Soos die tienerjare ons seuns oorval met testosteroon en slegte buie, woed hulle dit uit in ’n kragmeting met hul pa. Fietsry is nie meer op en af ry teen die spruitwalle in ons buurt nie, want daar is nou tegnologie wat ons in tyd en krag teen mekaar meet.
Sulke tye raak Christine verlore tussen die stof, modder en bloed. Sy doen haar bes om deel te bly, maar die adrenalienstryd en wildheid raak te veel vir haar ma-hart en -senuwees. Dis teen die wal van ’n stofbank waar ons drie manne een middag sit en wonde lek dat ons die gesprek oor groter seuns en hul ma’s moet hê.
So tussen die ratte, wiele en geskaafde elmboë leer hulle van manwees teenoor vrouwees, van tee drink en gesels oor kuns. God het ons so gemaak, so anders, so ver van bekend, maar onlosmaakbaar deel van mekaar. En net soos Mamma vir jare saam al die manne-goed gedoen het, moet ons nou die vrou in ons lewe eer.
Ek kyk terug na ons emosionele huis en sien God se hand in die afronding daarvan. Die fynopgevoede vrou wat bestof die pad op fiets agter drie manne aan volg, versamel kosbaarhede vir haar hart. En dan drie doodgewone manne wat nou kan kook, tafel dek en ’n fantastiese koppie tee maak.
In watter dele van my lewe